Байрамда бүләк биреү — матур йола. Рәсәй һәм Ҡала көнө алдынан баш ҡала Советында Өфөнөң алдынғы хеҙмәткәрҙәрен тәбрикләү тантанаһы булды. Алты кешегә ҡаланың иң юғары наградаһы — Өфө ҡалаһы хакимиәтенең Почет грамотаһы бирелде, тағы ла 23 кеше ҡала Советының Почет грамотаһы менән бүләкләнде. Бүләкләнеүселәрҙең барыһы ла — изге һәм кәрәкле һөнәр эйәләре. Уҡытыусылар, табиптар, ғалимдар, төҙөүселәр, сәнәғәт предприятиелары эшселәре, мәҙәниәт хеҙмәткәрҙәре һәм башҡалар булды. Наградаларҙы Өфө ҡалаһы Советы рәйесе Евгений Семивеличенко тапшырҙы. — Ҡала көнө алдынан наградалар тапшырыу йолаһы электән бар. Беҙ үҙ эшмәкәрлеге, профессионализмы менән баш ҡалабыҙ үҫешенә ҙур өлөш индереүселәргә ихтирам һәм хөрмәтебеҙҙе күрһәтәбеҙ, — тине ул. Ҡала округы хакимиәте Почет грамотаһы менән Өфөнөң янғындан һаҡлау идаралығы начальнигы Рәмил Кәримов, “Гидравлика” Өфө агрегат предприятиеһы” асыҡ акционерҙар йәмғиәте генераль директоры Виктор Новиков, табип-офтальмолог Валентина Цепилова, табип-хирург, бүлексә мөдире Артем Ронжин, техник фәндәр докторы, профессор Семен Шапиро һәм “Academia” галереяһы директоры Роза Фәйрузова бүләкләнде. Ҡала Советының Почет грамотаһын алған Эльза Сыртланова менән әңгәмәләштек. Ул — баш ҡаланың 33-сө поликлиникаһында баш табип. Тәжрибәле Эльза Рәиф ҡыҙының “Башҡортостан Республикаһының атҡаҙанған табибы” тигән маҡтаулы исеме, Һаулыҡ һаҡлау министрлығы биргән маҡтау грамоталары бар. Ул шулай уҡ монографиялар, уҡытыу әсбаптары һәм методик тәҡдимдәр авторы ла. — Беҙҙең поликлиника — баш ҡалала иң ҙур һәм алдынғыларҙың береһе. Һәр ваҡыт заман технологияларын ҡулланабыҙ, яңы дауалау методикаларын үҙләштерәбеҙ. Беҙгә килеүселәр сират тороп йонсомай, Интернет аша яҙылыу мөмкинлеген киң файҙалана, — ти ул. — Был награда — барлыҡ коллективтың хеҙмәтенә баһа. Евгений Семивеличенко бүләкләнеүселәрҙе тағы ла бер ҡат ҡотланы. — Бергә тупланып эшләгәндә генә яҡшы һөҙөмтәләргә өлгәшергә мөмкин. Әйҙәгеҙ, артабан да яратҡан ҡалабыҙ мәнфәғәтендә тырышайыҡ. Байрам менән! — тине ул тантана һуңында.