Вконтакте facebook Вконтакте Вконтакте
Гәзитте ойоштороусылар:
Башҡортостан Республикаһы
Дәүләт Йыйылышы — Ҡоролтай,
Башҡортостан Республикаһы Хөкүмәте
» » Иң ҡәҙерле кеше
Бер кем дә көтмәгәнен белһә лә, Илнара өйөнә йүгереп ҡайтты. Яҙҙың тәүге айы башланып ҡына тора, ә яғырға утын бөткән. Портфелен иҙәнгә ҡуйҙы ла тышҡа сығып китте. Ирей ҙә башламаған ҡар аҫтынан самалап, яғырлыҡ ҡалдыҡ-боҫтоҡ эҙләй башланы. Йоҡа ғына бирсәткәһенең һыуланыуына иғтибар итмәҫкә тырышып, һәрмәнә торғас, тапты тәки бер-ике түмәр башын! Улары елле генә булыуға ҡарамаҫтан, көсө етте: ҡар аҫтынан сығарып, ах та ух килеп тәгәрәтте.

Бәхетле көндәр

Иҫке утын һарайынан балта сығарҙы. Атаһының уның үткерлеген тикшергәнен хәтеренә төшөрөп, баш бармағы менән эш ҡоралының йөҙөн һыйпаны... Үтмәҫләнеп тә бөткән икән... Эсендә аслыҡтан олоған “бүреләрен” тыйыпмы, әллә атаһын юҡһыныу тойғоһон йүгәнләүҙәнме, Илнара бар көсөнә йәнтәслим иттереп түмәргә һуҡты. Бәләкәс кенә ҡыҙҙан бындай уҡ көстө көтмәгән түмәр “дыңҡ” итеп уртаға ярылды ла ҡуйҙы...
Илнара ике түмәрҙе тураҡлап бөткәнсе шыбыр тиргә батты. Өҫтөндәге еңел курткаһын сисәйем тип төймәләренә тейҙе лә һипһенде. Өләсәһенең атаһына: “Ҡапыл һалма кейемеңде, улым, тирең ҡатҡанын көт, сир инер тәнеңә, юғиһә”, – тигәне иҫенә төштө.

Ярылған утынды иллә-алла менән тоҡандырып ебәргәс кенә, өҫтөн алмаштырҙы. Шул арала электр плитәһенә сәйнүген ҡуя һалып, өйҙө йыйыштырырға тотондо. Әсәһе дүрт көн элек күрше ауылдағы әхирәтенә “хәл белергә” киткәйне, ҡасан ҡайтырын кем белә. Плитә боҙола башлаған, күрәһең, бер сүмес һыуы бик оҙаҡ ҡайнамай аптыратты. Инде лә сәйен тиҙ генә һемереп, ҡустыһын алырға балалар баҡсаһына йүгерҙе. Тәрбиәсе Сулпан апай бөгөн Наилде матур итеп кейендереп алып килгәне өсөн Илнараны маҡтаны. Ә тегеһе инде, апаһын күреү менән йүгереп килеп, муйынынан бәләкәй генә йылыҡай ҡулдары менән ҡосаҡлап алды ла ҡолағына: “Әсәй ҡайттымы?” – тип бышылданы. Тәрбиәсегә күрһәтмәҫкә тырышып, Илнара “юҡ” тип баш һелкте.

Ишетмәй тормай инде ауыл кешеһе был ғаиләнең хәлен! Сулпан апаһы ипләп кенә Наилде уйын бүлмәһенә кире индерҙе лә Илнараға һораулы ҡарашын төбәне. Әллә инде ошо наҙ тулы ҡараштарҙы көткән тиһең, әллә был мөләйем апайҙы яҡын күргәнгәме, ҡыҙыҡай әсәһенән бына инде дүртенсе көн хәбәр юҡлығын һәм ҡайтһа ла өйҙә башҡа кешеләр менән эсеүен дауам итеүен бер тында һөйләп бирҙе. “Ашарығыҙға бармы? Өйөгөҙ һыуыҡмы? Ай, Аллам, утынығыҙ ҙа юҡ ине шикелле”, – тип тәрбиәсе апай борсолоуын белдерҙе. “Юҡ, апай, беҙҙең бөтә нәмәбеҙ ҙә бар, рәхмәт, борсолмағыҙ”, – тип Илнара һүҙҙе икенсегә борорға маташты. Тағы ла һорауҙар яуҙыра башлаһа, түҙмәҫмен, илап ебәрермен тип ҡурҡып, ҡустыһын етәкләп, тиҙ генә баҡсанан сығыу яғын ҡараны.

Юл буйы тәтелдәк Наил баҡсала нимә ашағанын, кем менән уйнағанын – бөтәһен тәфсирләп һөйләп килде. Эй, ҡыҙыҡ та инде был бәләкәс малаҡай!

Өйҙә ҡыҙ уны үҙе бешергән бутҡа менән һыйланы ла дәрестәренә ултырҙы. Мейесенә бер-ике утын өҫтәп ебәрҙе. Наил төндә асынып йоҡлай, өшөмәһен. Өләсәһе лә, хәрәкәтһеҙ тәнде һыуыҡ тиҙ ялмай, ти торғайны бит...

13 йәшлек ҡыҙ бынан дүрт йыл элек кенә булған тормошон һағынып иҫкә алды. Атаһының: “Бына, Илнара, һиңә ҡусты алып ҡайттыҡ, исеме – Наил! Һин хәҙер ҙур кеше – апай булдың!” – тип сикһеҙ ҡыуанғанын, әсәһенең бәхеттән балҡыған йөҙөн онотоп буламы һуң?!

Был малай бигерәк теремек, тип доғаларын уҡый-уҡый йыуындырырҙар, кейендерерҙәр, сисендерерҙәр ине күмәкләп... “Бер бәләкәс кенә кеше өсөн ни тиклем сабышҡан булалар, фи! Ә мин “бишле” алдым бөгөн!” – тип үпкәләгән саҡтары ла булды хатта ҡыҙыҡайҙың. Ә һуңынан ул мәктәптән ошо “тәмлекәс” тубырсыҡты һағынып йүгереп ҡайтыр булып китте. Тегенең күҙҙәренән осҡон сәсеп йылмайыуын, берсә шарҡылдап көлөп ебәреүен, берсә иренен бүлтәйтеп үпкәләүен Илнара тамаша ҡылып күҙәтер ине. Шул ваҡытта ул “Ҡустымдың уңыштары” тигән дәфтәр тота башланы.

Илнара өләсәһенең ярҙамы менән Наилдың устарын, табандарын һүрәткә төшөрөп, хатта үлсәүҙәрен күрһәтеп ҡуйҙы. Шунан инде яйлап был дәфтәргә ҡустыһының тәүге йылмайыуы, тәүге теше, тәүге китабы, тәүге аҙымы кеүек “бик мөһим” яңылыҡтар теҙелде... Был эштә уға өләсәһе ныҡ ярҙам итте. Һәр биттә күпте күргән, күпте кисергән әбекәйҙең тапҡыр, мәғәнәле һүҙҙәре яҙылды: “Бишектәге бала бишкә төрләнә – беҙҙең Наил бер көн әсәйемә оҡшап йылмайып ҡуйһа, икенсе көн хас та атайым булып танауын сирылта!” “Баланы табыу һөнәр түгел, ә бағыу һөнәр” тигәненең аҫтында әсәһенең ҡулы менән: “Баланы бағыу бик еңел, янымда һеҙҙең кеүек ярҙамсыларым булғанда! Рәхмәт һеҙгә, ҡыҙым, ҡәйнәм!” – тип яҙылған. Бына көндәлектең бер битендә сүкеш һүрәте аҫтына “Бөгөн Наил тәүге тапҡыр сүкеш тотто!” тип яҙылған, аҫтараҡ ҡыҙыл ҡәләм менән “Атанан күргән – уҡ юнған!” тип тә өҫтәп ҡуйылған.

Иблис һыуы

...Туп-тумалаҡ ҡустыһына теүәл ике йәш тулғанда, атайҙары мәрхүм булып ҡуйҙы. Илнара ул ваҡытта ниҙәр кисергәнен аңлата алмай. “Өләс, ә ниңә Хоҙай бабай улайтты икән? Беҙгә атайыбыҙ ныҡ кәрәк бит”, – тип һулҡылданы ҡыҙсыҡ. “Сеү-сеү, балам, – тип ҡуңыр йөҙө ҡайғынан тағы ла ҡарайыбыраҡ киткән өләсәһе сәсенән һыйпаны. – Алама һүҙ тейҙермәйек Хоҙайға... Эй, кем генә әйтә алһын инде яуабын, матурым. Әммә ҡайғы килгән икән – сабыр булыу зарурҙыр. Хоҙай Тәғәләне яманлама, асыуланма, насар һүҙ бер ҡасан да сыҡмаһын тешең араһынан, ярармы? Сабыр, сабыр...” – тип әллә үҙен, әллә ҡапыл ғына олоғайып киткән ейәнсәрен йыуатты ул.

Атайһыҙ өйҙә күңелһеҙ, шыҡһыҙ булып тойолһа ла, тора-бара өйрәнделәр. Илнараны мәктәптән, Наилде балалар баҡсаһынан, әсәһен эштән өләсәһе тәмле ризыҡтар менән көтөп ала. Әсәһе кистәрен күршеләргә бәйләмен тотоп инер булып китте. “Килен, ярар, бар әхирәттәрең менән аралашып, бауыр аҫтынан ел үткәреп кил, һөйләшеп ал эсең бушағансы”, – тип оҙатыр ине өләсәһе.

Бер мәл, әсәһен көтөп ала алмағас, Илнара йоҡлап китте. Түрбашта шыбыр­лашҡан тауыштар уны йоҡоһонан уятты. “Һуң ҡайтһамсы, ҡәйнәм, әҙерәк кенә эстем мин, уныһы ла шарап, йөрәгемдең яныуын баҫыр өсөн генә бит!” – был әсәһенең тауышы. Тимәк, тағы ла иҫерек, тип уйланы ҡыҙыҡай. Артабан өләсенең: “Килен, беҙ һинең менән нисә йыл бергә йәшәйбеҙ, ҡыҙым кеүек бит һин миңә! Үлгән артынан үлеп булмай, сабырлығыңды тупла. Эй, барҙы юҡ итеүе бик тиҙ ул, килен. Өндәшмәнем бит ошоға ҡәҙәр һиҙемләһәм дә. Ҡағылма, тотма башҡаса шул иблис һыуын...” – тигәнен ишетте.

Илнара әсәһенең ипләп кенә өйҙә лә шешәнән шыйыҡса ҡойоп эскәнен күргәне бар ине, тик өләсәһенә генә әйтә алмай йөрөнө. Ошо һөйләшеүҙән һуң әсәһенең кистәрен гел генә өйҙә булыуына сикһеҙ ҡыуанды улар. Өләсе лә яғымлыраҡ, шатланыбыраҡ йөрөгән һымаҡ булып тойолдо ҡыҙыҡайға.

Бер көн мәктәптән ҡайтҡанда, урам тулы кешеләрҙе күргәс, Илнараның мейеһен өләсәһенең: “Бәлә ағас башынан йөрөмәй, кеше башынан йөрөй” – тигән һүҙҙәре телеп үтте. Өйгә инеү менән әсәһенең илаған йөҙөнән аңланы – өләсәһе! Йөрәге алҡымына килеп тығылдымы ни, шул тиклем итеп күкрәге сәнсте, хатта Илнара тын ала алмай торҙо. “Балам, йөрәге туҡтаған да ҡуйған өләсеңдең, эштән ҡайтһам, үткәйне инде”, – тип аңлатты әсәһе. Күрше-күлән, туғандары, өләсенең йөрәге улын юғалтыуға түҙмәгән инде, тип ҡайғырышты.

Хәҙер инде Наилде баҡсаға Илнара алып бара, алып ҡайта башланы. Әсәһенең “ваҡыты юҡ”, “эше күп”, “бушамай”, “әхирәте килгән”, “әхирәтенә киткән” һәм башҡа сәбәптәре табылып ҡына торҙо. Йыш ҡына кистәрен дә ҡайтмағас, Илнара мал ҡарарға, һыйыр, һарыҡтарҙың аҫтын таҙалап, бесән-һалам һалырға, тауыҡ-ҡаҙҙарҙы мәлендә ашатырға өйрәнде. Мейескә ут тоҡандырырға, тамаҡ йүнәтергә оҫтарып алды.

Әсәһе өйҙә саҡта Илнара менән Наилдән дә бәхетлерәк кеше юҡтыр: өй йылы, таҙа, тәмле ризыҡтарҙан өҫтәл һығыла, мал-тыуарҙы ла йүгереп йөрөп үҙе ҡарай... Тик бындай мәлдәр һирәгәйгәндән-һирәгәйә, әсәһенең эскелек упҡынына оса барғанын бөтә йөрәге менән тоя ҡыҙ. Нисегерәк ярҙам итергә, кемдән кәңәш һорарға икән, тип баш ватты үҫмер. Иртәгәһенә ҡустыһын етәкләп, йүгереп баҡсаға килеп ингәндә лә мейеһен ошо уйҙар теткеләй ине. Сулпан апай Наилде сисендереште, һәр ваҡыттағыса яғымлы йомшаҡ һүҙҙәре менән хәлдәрен һорашты. “Әсәйеңде кисә барып алайыҡ тиһәк, булдыра алманыҡ, Илнара”, – был һүҙҙәрҙе ишеткән ҡыҙҙың күңел яралары әсе, әрнеткес күҙ йәштәре булып түгелде...
Тыйырға ла маташманы ҡыҙ үҙен, тормоштоң ҡаты һынауҙарынан өшөп, туңып барған бәләкәс кенә күңелен йылытырға теләпме, яғымлы, матур апайға һыйынды.

Балалар хаҡына

Шул көндә уларҙы Сулпан апаһы үҙҙәренә алып ҡайтты. Ишектән ике бала килеп ингәс, Ғәле ағай шатланып көлөп ебәрҙе: “О-о, кәләш, иртән генә бер ниндәй ҙә яңылыҡ юҡ ине артып ҡайтырың тураһында, вәт, шәпһең бит!”

Балалар, өҫтөн һалып, төпкө бүлмәгә үтте. Илнара уңайһыҙланыңҡыраһа ла, Наил иҫе китеп торманы, Ғәле ағай менән тиҙ уртаҡ тел табып алды. Илнара Сулпан апайға сәй әҙерләште, бер-ике ауыҙ һүҙ менән мәктәптәге уңыштарын һөйләне. “Ниндәй яҡшы кешеләр, ә балалары юҡ. Ниңә Хоҙай бабай беҙҙең атай-әсәйебеҙ итмәне икән ошоларҙы?” – тигән уй ҙа башына инеп сыҡҡыланы хатта.

Кисен оҙаҡ йоҡлай алмай ятты ҡыҙыҡай, үҙҙәренең бында килергә риза булыуына аптырап, артабан нисек булырын уйланы, әллә ҡайҙа йөрөгән меҫкен әсәһен йәлләне...

Сулпан апай яғымлы, Ғәле ағай шаталаҡ, икеһе лә гел генә көлөп-йылмайып, балаларҙың күңелен күтәрерлек һүҙ табып ҡына тора. Бергәләшеп күңелле генә итеп көн артынан көн үткәреп, йәшәп алып киттеләр. Ир менән ҡатындың үҙ-ара ипле генә һөйләшкәненән Илнара аңлай – был ғаилә уларҙың әсәһен упҡындан йолоп алыр өсөн бөтә көсөн һала. “Балалар хаҡына”, – ти Ғәле ағаһы.

Төшкө аш мәлендә берәү килеп ингәс, Илнара ла, Сулпан апаһы ла иғтибар итмәне, төпкө бүлмәлә Наил менән уйнауҙарын белде. “Һаумыһығыҙ”, – тигән таныш тауышты ишеткәс, ҡапыл малай үҙәк өҙгөс итеп “Әсәй!” тип тороп йүгерҙе. Һуңғы ике аҙнала әсәһен бер тапҡыр ҙа һорамаған ҡустыһының былай уҡ ҡыс­ҡырып ебәререн көтмәгән Илнараның күҙ алды ҡараңғыланып, хәле бөттө лә ҡуйҙы. “Кил-де, кил-де”, – тип дарһылдап типте йөрәге. Сулпан апаһы, ҡыҙҙы иңдәренән ҡосоп: “Бөтәһе лә яҡшы, тыныслан”, – тип бышылдап, бүлмәнән сығып китте. Илнара уның яғымлы итеп әсәһен түргә әйҙүкләгәнен, хәлен һорашҡанын, Наилде тынысландырғанын, тегеләрҙең илаша-ҡосаҡлаша сисенешкәнен бүлмәлә килеш тыңлап ултырҙы. Бына хәҙер сыҡһа, әсәһен күрһә, шатлыҡ-ҡыуанысынан, күңелен ялмаған аңлайышһыҙ хистәр ҡойононан ҡолап китермен, тип ҡурҡты ул.

Бөтә тәне дер ҡалтырап, күҙенән мөлдөрәмә тулы йәштәре бына-бына ҡойолам тип торғанда, әсәһе ҡурҡа-ҡурҡа ғына (Илнараға шулай тойолдо) килеп инде. Үҙенең ни тиклем яңылышҡанын ысын күңеле менән аңлаған әсә, артабан атларға ҡыймай, ғәйепле ҡиәфәт менән ҡапыл ғына олпатланған, оло кешеләр күтәрә алмаған ҡара ҡайғыны сабырлыҡ менән үткәреп килгән ҡыҙының күҙҙәренә төбәлде. “Балам, яңылыштым. Балаҡай­ҙарым, кисерегеҙ, зинһар, мине...” – тип бышылданы уның ирендәре.

“Әсәй! Әсәкәйем!” – тип кенә әйтә алды ҡыҙ. Шуны ғына көткәндәй, әсәһе Наилде ҡулынан да төшөрмәй, атылып килеп, ҡыҙын ҡосағына алды. Бәләкәс кенә үҫмер ҡыҙҙың күңелендә бик оҙаҡ йыйылып килгән үпкәһе, нәфрәте, киләсәктән ҡурҡыуы күҙ йәштәре аша түгелеп юҡҡа сыҡты һәм ул, бәхетле йылмайып, әсәһенең ҡосағына нығыраҡ һыйынды.




Беҙҙе Яндекс Дзен лентаһында уҡығыҙ

В ОдноклассникахВконтакте

Комментарий өҫтәргә






Изгелек күрһәт тә бушлай киноға, бассейнға, музейға бар

Изгелек күрһәт тә бушлай киноға, бассейнға, музейға бар 01.04.2019 // Йәмғиәт

Һуңғы ваҡытта ирекмәндәр хәрәкәте беҙҙең тормошобоҙҙа һиҙелерлек урын биләй....

Тотош уҡырға 4 009

Һыу инергә ваҡыт етте...

Һыу инергә ваҡыт етте... 01.04.2019 // Йәмғиәт

6 апрелдә Өфө ҡалаһындағы Үҙәк баҙар янындағы Һалдат күленә килһәгеҙ, үкенмәҫһегеҙ. Унда тәүлек...

Тотош уҡырға 3 370

Мөхәббәт менән бәхет гел бергә

Мөхәббәт менән бәхет гел бергә 31.03.2019 // Йәмғиәт

– Мөхәббәт ҡайҙа юғала? – тип һораған атаһынан бәләкәй Бәхет. – Үлә. Кешеләр булғанды ҡәҙерләмәй,...

Тотош уҡырға 3 916

"Ҡайһылай оятҡа ҡалдым..."

"Ҡайһылай оятҡа ҡалдым..." 31.03.2019 // Йәмғиәт

Асыу, ярһыу кешенең бөтөн тәнен, күңелен ялмап алыусан. Шуға әҙәм балаһының бындай осраҡта...

Тотош уҡырға 3 811

Ризыҡ менән бергә өмөт-ышаныс өләшеп

Ризыҡ менән бергә өмөт-ышаныс өләшеп 31.03.2019 // Йәмғиәт

Ирекмәндәр Сибайҙа өс айҙан ашыу инде “Йәшәү ризығы” тип аталған мәрхәмәтлек акцияһы үткәрә: ауыр...

Тотош уҡырға 3 175

"Аҙыҡтың өлөшөн генә һалыр инем..."

"Аҙыҡтың өлөшөн генә һалыр инем..." 31.03.2019 // Йәмғиәт

Имам-хатип мәсеткә вәғәз һөйләргә килһә, унда бер генә кеше – йәш көтөүсе – ултыра, ти....

Тотош уҡырға 3 390

135 мең граждан саҡырыла

135 мең граждан саҡырыла 31.03.2019 // Йәмғиәт

Рәсәй Президенты хәрби хеҙмәткә яҙғы саҡырылыш тураһында указға ҡул ҡуйҙы. Ул кисә, 30 мартта,...

Тотош уҡырға 2 932

Йоҡларға ҡурҡам...

Йоҡларға ҡурҡам... 30.03.2019 // Йәмғиәт

Баҡыйлыҡҡа күскәненә тиҫтә йылға яҡын ваҡыт уҙһа ла, әсәйем һуңғы арала төшөмә йыш инә башланы....

Тотош уҡырға 3 504

Йәкшәмбелә ғаилә менән ҡайҙа барырға була?

Йәкшәмбелә ғаилә менән ҡайҙа барырға була? 29.03.2019 // Йәмғиәт

Ҡул эштәре менән булыу, аш-һыу бешереү, бейеү, һүрәт төшөрөү, спорт уйындары... Ә һеҙҙең ғаиләнең...

Тотош уҡырға 1 893

"Мин Хәйбулланан!" тип ғорурланыр йәштәр ҙә

"Мин Хәйбулланан!" тип ғорурланыр йәштәр ҙә 29.03.2019 // Йәмғиәт

Башҡортостандың 100 йыллығына арналған саралар дауам итә. Бөгөн, мәҫәлән, Хәйбулла районы үҙәге...

Тотош уҡырға 1 912

Сарыҡ нисек тегелә?

Сарыҡ нисек тегелә? 29.03.2019 // Йәмғиәт

Учалы тарих һәм тыуған яҡты өйрәнеү музейында башҡорттоң традицион аяҡ кейеме – сарыҡ тегеү буйынса...

Тотош уҡырға 2 072

15 апрелдә башлана

15 апрелдә башлана 29.03.2019 // Йәмғиәт

Учалы районы хакимиәтендә подъездарҙы төҙөкләндереү буйынса республика программаһының тормошҡа...

Тотош уҡырға 1 840