Данлыҡлы 112-се Башҡорт кавалерия дивизияһының легендар командиры, генерал-майор М.М. Шайморатовтың исемен мәңгеләштереү мәсьәләһе бер мине генә түгел, бөтә Башҡортостан халҡын борсой. 2013 йылда уның батырҙарса һәләк булыуына 70 йыл тулыу уңайынан яҡташыбыҙға Герой исемен биреүҙе һорап, 100 меңгә яҡын ҡултамға йыйып, Рәсәй Президенты В.В. Путинға мөрәжәғәт ебәрелгәйне.

Президент, беҙҙең мөрәжәғәткә яуап итеп, Алкин ҡасабаһында урынлашҡан хәрби часҡа данлыҡлы генералыбыҙҙың исемен биреү тураһында Указға ҡул ҡуйҙы. Был һәйбәт, әлбиттә, ләкин был ғына аҙ. Өфө урамдарының береһенә Генерал Шайморатов исемен биреп, һәйкәлен урынлаштырырға кәрәк. Бының өсөн, минеңсә, Әй урамы тап килә.

Беренсенән, Белорет – Өфө һәм Ырымбур – Өфө юлдарынан килгән пассажирҙар ағымының күбеһе ошо урам аша үтә. Тимәк, уны баш ҡала­быҙҙың көньяҡ ҡапҡаһы тип әйтергә була. Икенсенән, Салауат Юлаев проспектынан боролоп, юл үткәргес аша Әй урамына ингән ерҙә уның һәйкәлен ҡуйыу өсөн бик һәйбәт урын бар. Был һәйкәл Салауат Юлаев һәйкәле кеүек бик алыҫтан күренеп, ҡунаҡтарҙы үҙенә әйҙәп, баш ҡалабыҙға йәм биреп торор ине.

Ошо тәҡдимде быға тиклем дә күтәреп сыҡҡайным инде. 2014 йылда мине Башҡортостан радиоһына тура эфирға саҡырғайнылар. Шунда был фекеремде әйттем. Икенсе тапҡыр 2016 йылда Ҡоролтайға хат яҙып ебәрҙем. Һөҙөмтәлә “Өфөлә М.М. Шайморатов исемен йөрөткән урам бар” тигән яуап килде. Баҡтиһәң, баш ҡалабыҙҙың Черниковка биҫтәһенең төпкөлөндә бер нисә ябай ғына ауыл өйөнән торған бәләкәй генә тыҡрыҡ Генерал Шайморатов исемен йөрөтә икән. Минеңсә, был уның исемен мәңгеләштереү түгел ул.

Әлбиттә, аңлайым, бындай эште башҡарып сығыу өсөн байтаҡ сығым талап ителәсәк. Был йәһәттән дә тәҡдимем бар: республикабыҙҙа “Генерал Шайморатов” фондын ойош­то­рорға һәм, махсус иҫәп асып, “Башҡорт­остан”, “Кызыл таң”, “Республика Башкортостан” гәзиттәре аша ярҙам итеү­ҙәрен һорап, халыҡҡа, ҙур предприя­тиеларға махсус хат менән мөрәжәғәт итергә кәрәк. Минеңсә, был сараға күптәр шатланып ҡушыласаҡ. Үҙем, мәҫәлән, пенсия аҡсамдан ун мең һум­ды бөгөндән сығарып һалырға әҙермен. Әйткәндәй, быйыл М.М. Шаймора­тов­тың тыуыуына 120 йыл тула. Мәсьә­ләнең ыңғай хәл ителеренә өмөтөм ҙур.