Мәктәптәрҙә Берҙәм дәүләт имтихандары дауам итә. Дөрөҫөн әйтергә кәрәк, сығарылыш класс уҡыусылары өсөн дә, уларҙың ата-әсәләре, уҡытыусылары өсөн дә бик көсөргәнешле мәл. Бигерәк тә былтырғы шау-шыуҙан һуң республика икеләтә тиерлек контролгә алынды. Шуныһы ҡыҙғаныс: хаталарҙан һаман һабаҡ алырға өйрәнмәйбеҙ — закон буйынса БДИ-ға кеҫә телефоны менән килеү тыйылһа ла, Өфө һәм Кушнаренко райондары уҡыусылары был йәһәттән “батырлыҡ” күрһәтеп өлгөрҙө лә инде.

Ғөмүмән, Берҙәм дәүләт имтихандарына бәйле һорауҙар бик күп. Имеш-мимештәргә, шик-шөбһәләргә лә урын ҡала. Ҡыҫҡаһы, халыҡ асыҡлыҡ яғында. Ошо йәһәттән Рәсәйҙең Йәмәғәт палатаһында — 8-800-700-83-63, Башҡортостандың Мәғариф министрлығында 273-20-87 һандары буйынса “ҡыҙыу линия” эшләй. Бында имтихандарға бәйле һәр төрлө һорау буйынса мөрәжәғәт итергә мөмкин.
Бынан тыш, Берҙәм дәүләт имтиханының рәсми мәғлүмәт порталы ла эшләй (www.ege.edu.ru). Унда БДИ тапшырыласаҡ бөтөн предметтар буйынса күргәҙмә материалдарҙы ҡарарға, on-line режимында тест үтергә, бланктар тултырыу ҡағиҙәләре, имтихандар теҙмәһе, юғары һәм урта махсус уҡыу йорттарына уҡырға инеү шарттары менән танышырға була. Төбәк кимәлендәге мәғлүмәтте www.reoirb.narod.ru адресы буйынса Башҡортостандың Төбәк мәғлүмәт эшкәртеү үҙәге сайтында таба алаһығыҙ.