Лира ЯҠШЫБАЕВА, яҙыусы:

– Ун ике йылдан торған мөсәлде Ҡабан йылы тамамлап ҡуйыуын кешеләр көтөп ала. Бар халыҡ: “Ҡабан йылы килә, илгә байлыҡ, муллыҡ, бәрәкәт килә”, – тип шатлана. Был йылда бала тыуһа: “Ҡабан йылында тыуҙы, иншаллаһ, балабыҙ бәхетле, тәүфиҡлы, иманлы булыр”, – тип ҡыуаналар. “Туған йәнле, әҙәм ыңғайлы, йомшаҡ күңелле, шәфҡәтле булһын”, – тип теләк теләйҙәр.

Минең дә тыуған йылымдан уңдым тип әйтергә хаҡым бар. Әле йондоҙнамәмде уҡып ултырҙым, бик күп сифаттарым ошо йылдың ҡылыҡһыр­лауына тап килә икән. Аллаһ һаулыҡ-сәләмәт­леген йәлләмәй биргән. Уйлаған уйыма, изге ниәтемә ирешмәй, алдыма алған эште еренә еткермәй ҡуймайым. Таш яуһа ла, барыр еремә барам, эшемде башҡарып ҡуям. Сәйәхәт итергә лә яратам. Тәү ҡарашҡа йыуаш ҡына күренһәм дә, һайлаған юлымдың хаҡлығына инанһам, ул юлдан мине һис кем тайпылта алмай.

Һәр нәмәгә үҙ фекерем бар. Ошо сифатым арҡаһында халҡыбыҙ изгеләре хаҡында яҙа алғанмындыр. Хатта үҙемдең ҡәләмдәштә­ремдән ауыр-ауыр һүҙҙәр ишетергә тура килһә лә, барған юлымдан ситләшмәнем, башлаған эшемде ярты юлда ташлап ҡуйманым. Халҡым күңеленә сәскән орлоҡтарым, ниһайәт, шытып сыҡты, тамыр ебәрҙе, гөрләп үҫеп китте. Халҡым дингә ҡайта.

Бер сифатым бар, йондоҙнамәлә ул кире сифаттан һанала, кешене йәлләйем, кешегә ышанам. Бер ҡатлымын, хәйлә, мәкергә маһир түгелмен. Ваҡ-төйәктә алданһам да (мәҫәлән, берәй нәмә алалар ҙа бирмәйҙәр), яҙмышҡа ҡағылышлы етди хәлдәрҙә Аллаһым аяны, Ҡабан йылы һәр саҡ һаҡланы. Минең һымаҡ етем ҡыҙға кем өйләнһен, кейергә йүнле кейемем юҡ. Башҡалар ял итә, театрға йөрөй, ә мин дәрестәрҙән һуң эшләйем, тип уйлай инем. Яҙмышым миңә үҙе тапты бынамын тигән юлдашты. Вахит исемле егет, миңә тормошҡа сыҡ, тип тәҡдим яһаны. Ҡайнар мөхәббәт һүҙҙәрен һөйләп торманы: “Мин һиңә нужа күрһәтмәм, кәм-хур итмәм, гел ҡәҙерләп кенә йәшәтермен”, — тине. Вахитым йәш саҡта әйткән һүҙенә тоғро ҡалды, мин уның менән бәхетле булдым, балаларымдан уңдым.

Үҙемде алғы планға ҡуйманым. Был да Ҡабандарға хас сифат. Шул арҡалы хаҡлы ялға сыҡҡас ҡына яҙышыр өсөн ҡулыма ҡәләм алдым. Яҙған бер әҫәрем гәзит-журналдарҙа баҫылып торҙо. Бөгөн тәржемәләрем менән бергә һанағанда, егермеләп китап авторымын. Хикәйәләрем өсөнсө-алтынсы кластарҙың “Туған тел” дәреслектәрендә баҫылып сыҡты.

Ҡабан сусҡаһы йылына ҡыуанып, имен-аман аяҡ баҫабыҙ. Һәр ҡайһыбыҙ унан тик изгелек көтә, алдағы көндәргә яҡты өмөт бағлай. Яҡшылыҡҡа яҡшылыҡ тартыла, изгелектән изгелек ярала.