Әбйәлил районының Байым мәктәбе – заман талаптарына яуап биргән XXI быуат белем биреү учреждениеһы. Бөгөн бында уҡыусыларға иң яҡшы тип иҫәпләнгән ҡала мәктәптәре көнләшерлек шарттар булдырылған. Уңған коллективҡа Рәсәй Федерацияһының почетлы дөйөм белем биреү хеҙмәткәре Зилә Зарипова етәкселек итә.



Бынан тыш, балаларҙы дәртләндереү маҡсатында, элекке директор Илдар Исламов иҫтәлегенә география, биология, экология, тыуған яҡты өйрәнеү фәндәре буйынса уңыштар өсөн премиялар тапшыралар. Байым ауыл биләмәһе хакимиәте лә мәктәп тормошонда әүҙем ҡатнаша һәм 2016 йылда ауыл хакимиәте премияһын булдырған. Ул Һуңғы ҡыңғырау байрамында иң яҡшы уҡыусыға бирелә. Данлыҡлы педагогтар Роза Моратованың, Зөлфәр Мәхийәновтың иҫтәлегенә булдырылған премиялар “Йыл уҡыусыһы” конкурсындағы “Рус телен яҡшы белеүсе”, “Йыл спорт­сыһы”, “Йыл алдынғыһы” номинациялары буйынса тапшырыла.

Быйыл урта мәктәпте тамамлаған ун ике уҡыусының бишәүһе юғары уҡыу йортона уҡырға ингән.

Байым мәктәбе уҡыусыларынан дөйөм гимнастика буйынса (Г.Ю. Ғилметдинова), юл хәрәкәте хәүефһеҙлеген пропаган­далаған “Тридэ” отрядында, “Пятнашки” шаяндар һәм отҡорҙар командаһында (Н.Н. Әғзәмов, Р.У. Собханғолов), тхэквондо секцияһында (Б.А. Хажиәхмәтов) шөғөл­ләнеү­селәр йыл һайын республика кимәлендә еңеүгә өлгәшә.

Ирекмәндәр йылында элекке уҡыусы­лары Клара Әхтәмова ярҙамында имән ағастарынан Ветерандар аллеяһы булдырған. Унда тағы ла 100 төп шыршы, 50 төп алмағас ултыртҡандар.

Әлеге көндә Байым мәктәбендә 217 бала белем ала, 22 уҡытыусы эшләй. Белем усағының өс филиалы бар. Мәктәп районда төплө белем биргән, бар яҡлап та үҫешкән белем усағы булараҡ танылыу яулаған. Быйыл мәктәпкә яңы автобус тапшырылған.
Нигеҙ һалыныуға – 90, урта мәктәп булып эшләй башлауына 50 йыл тулды.