Социаль-иҡтисади һөҙөмтәләр буйынса Октябрьский лайыҡлы рәүештә “Йыл ҡалаһы” исеменә лайыҡ. Быйыл ул байтаҡ күрһәткестәр буйынса Рәсәй кимәлендә еңеүгә өлгәште.

Бөтә Рәсәй “Иң яҡшы муниципаль практика” конкурсының төбәк этабында “Халыҡ менән бәйләнеш булдырыу, территориаль йәмәғәт үҙидаралығын үҫтереү һәм граждандарҙы үҙидаралыҡҡа йәлеп итеү” номинацияһында беренсе урынды яуланы. Ошо уҡ конкурстың төбәк этабында “Муниципаль сәйәсәт, ҡала һәм ауыл округтарында муниципаль финанстарға идара итеү”, “Ҡала төҙөү сәйәсәте, халыҡтың йәшәү эшмәкәрлеген һәм торлаҡ-коммуналь хужалыҡты үҫтереү өсөн уңайлы шарттар тыуҙырыу” номинацияларында икенсе урынға сыҡты. Ә инде Бөтә Рәсәй “Иң яҡшы муниципаль практика” конкурсында “Муниципаль иҡтисад сәйәсәте һәм муниципаль финансҡа идара итеү” номинацияһында беренсе урынға лайыҡ булды.

Быйыл йәй Башҡортостан Сауҙа һәм ҡулланыусылар хоҡуғын яҡлау буйынса дәүләт комитеты коллегияһында йыл һөҙөмтәләренә байҡау яһалды. Унда муниципаль берәмектәр араһында ҡулланыусылар баҙарын үҫтереү йәһәтенән былтырғы һөҙөмтәләр буйынса Октябрьский ҡалаһы, хатта Өфөнө артта ҡалдырып, беренсе урынды яуланы.

Милли мәҙәниәтте үҫтереү буйынса ла һынатмайҙар. Ҡала мәҙәниәт һарайы Бөтә Рәсәй “Массалар театры” милли премияһының “Иң яҡшы милли байрам” номинацияһында еңеп сыҡты. “Ҡурай байрамы-2017” проекты иң юғары баһа алып, сара “Рәсәйҙең иң яҡшы ҡала байрамдары” йыйынтығына индерелде.

“Бизнес-уңыш” милли премияһы сиктәрендә Октябрьский ҡала округы “Күмәртәләп һатып алыу өлкәһендә асыҡлыҡ өсөн” грамота менән бүләкләнде.

Быйыл республикала беренселәрҙән булып Октябрьский “Сәләмәт ҡалалар, райондар һәм ауылдар” ассоциацияһына инде. Ҡалала сәләмәт тормош рәүешен таратыу һәм спортты үҫтереү буйынса төрлө саралар аҙна һайын ойошторола, спортсылар ил, донъя кимәлендә юғары ҡаҙаныштар күрһәтә.