“Туймазы ҡала электр селтәрҙәре” акционерҙар йәмғиәтенең үткәне һәм бөгөнгөһө ҡаланың тарихы менән үрелеп бара.

1960 йылда электр сел­тәрҙәре контораһы булараҡ төҙөлә ул. Предприятиеға Туймазы ҡалаһынан тыш Ҡандра, Серафимовка ҡасабаларын һәм Баҡалы, Шаран райондарын электр энергияһы менән тәьмин итеү бурысы йөкмәтелә.

Ҡала тиҙ үҫеш ала. Бер үк ваҡыт­та электр энер­гияһына ла ихтыяж арта. Үткән быуаттың 90-сы йылдарынан башлап предприятие күп төрлө үҙгәреш ки­серә. 2015 йылда ул “Туймазы ҡала электр селтәр­ҙәре” акционерҙар йәмғиә­тенә әүерелә. Предприятие Туймазы ҡалаһында, Серафимовка, Ҡандра, Тү­бәнге Троицк, Собханғол ауылдарында йәшәүселәр­ҙе, ундағы сәнәғәт һәм аграр предприя­тиеларҙы, социаль-мәҙәни объекттарҙы өҙлөкһөҙ электр энергияһы менән тәьмин итә.

Заман алға барған һа­йын энергетика ресурстарына ихтыяж үҫә. Ҡулла­ныу­сыларҙың арта барған ихтыяжын тулыһынса ҡә­нәғәтләндереү, хеҙмәтлән­дереү сифатын тағы ла яҡ­шыртыу өсөн электр сел­тәрҙәрен үткәреү мөмкин­леген үҫтереү буйынса эшлекле саралар күрелә. Ошо маҡсатта алты кВ көсөргә­нешле линиялар 10 кВ ҡеүәтлеһенә алмаштырыла.

Үҙгәртеп ҡороу эштәре алдынғы технологияларға нигеҙләнеп һәм заманса материалдар ҡулланып баш­ҡа­рыла. Әйтәйек, изо­ляция­ланған үткәргестәр (СИП) файҙа­ланыу электр тапшырыу линияла­рының юға­ры сифатын һәм ыша­ныс­лы­лығын гарантиялай, электр монтер­ҙарының хеҙ­мәтен уңайлы һәм хәүеф­һеҙ итә. Хәүефһеҙлек йәһә­тенән уны ҡулланыусылар ҙа юғары баһалай.

Предприятиеның техник һәм технологик ҡеүәттәре йылдан-йыл үҫә. Улар республикала тәүгеләрҙән булып ПЭВМ эске иҫәпләү селтәр­ҙәрен, компьютер графикаһын ҡуллана башланы.

Туймазы энергетиктары инвестиция программаларында әүҙем ҡатнаша. Инвестициялар йәлеп итеп, үҙ селтәрҙәрен үҙгәртеп ҡороу һәм яңыртыу, шулай уҡ яңы объекттар төҙөү буйынса мөһим эштәр башҡа­рылған. Мәҫәлән, былтыр трансформаторлы ике ярҙамсы станция төҙөп файҙаланыуға тапшырған­дар. Ул ҡаланың биологик таҙартыу ҡоролмаларын электр энергияһы менән тәьмин итә. Түбәнге Троицк ауылында ла яңы ярҙамсы станцияны эшкә ҡушҡан­дар, ҡаланың канализация насос станцияһына һуҙыл­ған электр селтәрҙәрен яңыртҡандар.

Серафимовка ауылында өҫтәмә рәүештә ике яңы электр тапшырыу линия­һын һуҙғандар, Собхан­ғолда иҫкергән кабелде яңыға алмаш­тырғандар. Быйылғы йыл да уңышлы булған. Ҡаланың “Химмаш” заводы менән тоташты­рылған ике яңы линия һуҙа башлағандар. Ҡала электр селтәрҙәрен яңыртыу килә­сәктә лә дауам итәсәк.

Электр энергияһын ур­лауға юл ҡуймау һәм нормативтан тыш юғалтыу­ҙарҙы кәметеү маҡсатында былтыр электр энергияһын иҫәп­ләүҙең автоматлаш­тырылған информацион-үлсәү системаһын (АСКУЭ) индерә башлағандар. Был алым, шулай уҡ СИП тө­рөн­дәге үткәргестәр ҡул­ланыу селтәрҙәрҙәге юғал­тыуҙарҙы, мәҫәлән, һуңғы ике йылда 16,3 проценттан 13,5 про­центҡа түбәнәйтер­гә мөмкинлек биргән.

“Туймазы ҡала электр селтәрҙәре” төбәк селтәр ойошмаһы булып тора. Әле билдәләп үткәнсә, уның төп бурысы – ҡулланыусы­ларға электр энергияһын даими тапшырыу. Коллективта белемле, һөнәри әҙерлекле хеҙмәткәрҙәр эшләй. Булдыҡлы коллек­тивҡа сирек быуат уның алыштырғыһыҙ директоры Рәйес Ғүмәров етәкселек итә. Рәйес Фазылйән улы­ның тәрән белеме, тәж­рибәһе, ныҡышмалығы, киләсәкте күҙаллап дөрөҫ иҡтисади сәйәсәт алып барыуы һөҙөмтәһендә Туймазы төбәгендә энергетика тармағын заман талаптарынан сығып үҙгәртеп ҡо­роуға һәм яңы бейеклеккә күтәреүгә өлгәшелгән.

Предприятие “Баш­ҡорт­остан Республикаһы иҡти­садын үҫтереүҙәге лайыҡ­лы хеҙмәте өсөн” дипломы менән бүләкләнгән. Ә уның директоры Рәйес Ғүмәров “Рәсәй ерен төҙөклән­дер­гән өсөн” премияһына ла­йыҡ булған. Ул шулай уҡ өҫтөнлөклө милли проект­тарҙы тормошҡа ашырыу­ҙағы уңыштары өсөн “Иҡтисад ғорурлығы” ордены менән дә бүләкләнгән.