Матур заман килде, мөмкинлектәрҙән файҙаланып ҡал.

Оло юл буйында урынлашҡан Ыҫлаҡбаш ауылының төҙөклөгөнә һоҡланмаған кеше һирәктер. Ҡунаҡ әҙ ултырыр, күп һынар, тигәндәй, эргәһенән тиҙ генә үтеп киткән ваҡытта ла бындағы тәртипте күрмәү мөмкин түгел. Йорттар ҙур, уның эргә-тирәһе бөхтә итеп йыйыштырылған. Күҙгә салынған ошо матур күренештәрҙең барыһы ла халыҡтың уңғанлығына бәйле. Миңә ҡалһа, был осраҡта тағы ла бер әйберҙе өҫтәргә кәрәктер. Һәр төбәктең, хатта һәр ауылдың иҡтисадына, үҫешенә йоғонто яһай алырҙай ойошмалар бихисап. Иванов исемендәге ауыл хужалығы етештереү кооперативы – шуға асыҡ миҫал.

– Тормоштоң ауырлығына зарланыу­ҙан айырмалы, алдыңа маҡсат ҡуйып, шуны атҡарып сығыу яғын ҡараһаң, меңләтә отошло, – тип башланы һүҙен К. Иванов исемендәге кооператив рә­йесе Сергей Афанасьев. – Ошо фекерҙе яҡлаусыларҙың күплеге шатландыра. “Беҙ булдырабыҙ!” девизы менән йәшәүселәргә ғүмер буйы һоҡланам һәм уларҙы өлгө итеп ҡуям. Шуны күңелем менән тоям, шул тиклем матур заман кил­де, мөмкинлектәрҙән файҙа­ланыу өсөн иркенлек бирелде.

Кооператив хужалыҡ эшмә­кәр­леген бер нисә йүнәлештә көйлә­гән. Бигерәк тә үҫемлекселектә һәм малсылыҡта һынатмайҙар. Ауыл хужалығы ерҙәре 3700 гектар тәшкил итә, шуның күп өлөшөн баҫыуҙар биләй. Йылына ҡарап ярайһы мул уңыш йыйып алғандар. Йәнә ҡуртымдағы 437 гектар ерҙәре бар. Ерҙе туңға һөрөүҙе һәм ужым сәсеүҙе ваҡытында тамам­лағандар.

Сергей Владимировичтың һүҙ­ҙәренә ҡарағанда, уй-ниәттәрҙе бойомға ашырғанда бигерәк тә Башҡортостан Хөкүмәте һәм Бәләбәй районы хакимиәтенең ярҙамын ифрат ныҡ тоялар. “500 ферма” республика маҡсатлы программаһында ҡатнашыу һөҙөмтә­һен­дә йәмғиәткә икенсе һулыш өҫтәл­гән.

Әңгәмәсем ярҙамсы хужалыҡ­тарҙы үҫтереү яҡлы, уларҙың өҫ­тә­мә килем килтереүҙә әһәмиәте ҙурлығына баҫым яһаны. Мәҫә­лән, бында умартасылыҡ терге­ҙел­гән. Умартасы Максим Мото­рин­дың һүҙҙәренә ҡарағанда, йөҙгә яҡын күс хужалыҡ өсөн сик түгел, киләсәктә лә уларҙың һанын арттырыу тураһында уйлайҙар.

Ыҫлаҡбаш – ер йөҙөнә ике клас­сик шағирҙы – Яков Ухсай менән Константин Ивановты биргән берҙән-бер ауыл. Хужа­лыҡтың Константин Василье­вичтың исемен йөрөтөүе ыҫлаҡ­баштарҙы айырыуса рухландыра.