Бөгөн пионер ойошмаһы барлыҡҡа килеүгә 90 йыл тула. Ошо уңайҙан республиканың ҡала һәм райондарында төрлө саралар үтә. Ғөмүмән, атай-олатайҙарҙың, ағай-апайҙарҙың кемеһе генә пионер булманы икән? Бөгөнгө 30 йәштән үткән замандаштарыбыҙ ҙа бер йыл булһа ла ошо ойошмала торған. Элекке пионерҙар ялҡынлы йылдарҙы һағынып иҫкә ала. Ә һеҙ пионер сағығыҙҙы хәтерләйһегеҙме һәм ойошманың йәштәрҙе тәрбиәләүҙәге ролен нисек баһалайһығыҙ?

Зәйнулла АЙЫТҠОЛОВ, Рәсәйҙең атҡаҙанған юрисы, Өфө ҡалаһы:
— Хәтерләмәй ҡайҙа? Ул саҡта пионер булыу "текә" булыуҙы аңлата ине. Йәштәр өндәп түгел, ә ҙур теләк менән пионерға ылыҡты. Үҙем иһә башланғыс класты тамамлағас та пионерға инеп, туған мәктәбемдә ойошторолған әлеге хәрәкәт эшендә ҡайнаным. Хатта район пионер ойошмаһының ревизия комитетына етәкселек тә иттем. Ҡыҙғанысҡа ҡаршы, пионер хәрәкәтенең бәҫе төштө. Әлбиттә, республикала был хәрәкәт 20 йыл элек "Башҡортостан пионерҙары" исеме аҫтында яңынан тергеҙелде, әммә, кем әйтмешләй, заман башҡа — заң башҡа. Бөгөнгө йәштәр уны барыбер ҙә башлыса тарих күҙлегенән генә өйрәнә. Ә бит заманында ойошманың аңыбыҙҙы нығытыуҙа, маҡсаттарыбыҙҙы үҫтереүҙә роле ҙур булды.

Хәҙисә ИБРАҺИМОВА, мәғариф ветераны, Хәйбулла районы:
— Пионер йылдарын хәтерләй китһәң, ҡыҙыҡ та, ҡыҙғаныс та хәлдәр күп булды инде. Пионерға инергә теләгән йәштәштәрем менән бер рәттән мин дә Устав ятланым, ант бирҙем, етәкселәрҙең исемдәрен өйрәндем, ойошманың маҡсаттары, талаптары менән үҫтем. Пионерға алыныуымды әле лә хәтерләйем. Ул көндө минән бигерәк әсәйем нығыраҡ шатланды буғай. Пионер хәрәкәте ағзаһы булыуымды байрам һымаҡ ҡабул итте — тәмле бәлеш менән һыйланы, тәм-томон да теләгәнсә һатып алып бирҙе. Дөйөм алғанда, пионер тәү сиратта тәрбиә алыуҙа ҙур этәргес булды, минеңсә. Беҙ быны күңелебеҙ, аңыбыҙ менән аңлап үҫтек. "2"-ле алып ҡына ҡара — өлкән кластарҙа уҡыған комсомол ағай-апайҙар кәрәгеңде лә бирер. Ҡурҡыу түгел ине был, ололарға, йәмғиәткә, ғөмүмән, шул заманға хөрмәт билдәһе ине.

Азамат ӘХМӘҘИЕВ, шәхси хужалығы менән шөғөлләнә, Мәсетле районы:
— Ул заманда ир-егет өсөн өс баҫҡыстан үтеү шарт ине — пионер, армия хеҙмәте һәм коммунист булыу. Айырыуса пионерға алыныу абруйлы һаналды. Ҡыҙыл галстук тағып йөрөү, уны көн дә тиерлек йыуып, үтекләү әле лә хәтеремдә. Ғөмүмән, ул йылдарҙа пионер, комсомол хәрәкәтенә эләгеү, ысын мәғәнәһендә, дан кеүек тойола ине. Ниндәй генә сараларҙа ҡатнашһаҡ та, тәү сиратта ВЛКСМ ағзаһы булыу-булмауың менән ҡыҙыҡһыналар. Хатта армияға алынғанда ла комсомол булыуың төп шарт булды. Үҙемде шәп пионер йәки комсомол булдым тип әйтә алмайым, шулай ҙа совет балаһы икәнлегемде, совет идеологияһына тоғро ҡалырға тейешлегемде аңлап үҫтем. Уставты ҙур тырышлыҡ, ныҡышмаллыҡ менән ятлағаным иҫтә. Оҙаҡ йылдар һәр һүҙен хәтерҙә тоттом.

Әҙилә МӘХӘМӘҘИЕВА, хаҡлы ялда, Ишембай районы:
— Пионерға 1950 йылда индем. Район үҙәгенә беҙҙе мәктәптең комсомол ойошмаһы етәксеһе алып барҙы. Ара алыҫ. Аяҡта сабата. Илле километрҙа ятҡан район үҙәгенә йәйәү барҙыҡ. Яҙ ине, аяҡтар һыуланып бөттө. Ә кәйеф күтәренке, күңел көр — беҙ пионерға инәбеҙ! Комиссия алдында ҡаты һынау тотҡас, мине хәрәкәткә ағза итеп алдылар. Ниндәй генә һорау бирмәнеләр — "Нисек уҡыйһың?", "Ни өсөн пионер сафына инергә теләйһең?", "Ойошма ҡушҡан ергә теләһә ҡайһы ваҡытта ла барырға әҙерһеңме?" Йылдар үтеү менән үҙемә лә туған мәктәбемдә пионер эшенә етәкселек итергә яҙҙы. Был юлы инде йәш ҡыҙҙар менән егеттәрҙе район үҙәгенә мин йөрөттөм. Ул осорҙа ла талап ҡаты ине. Әле лә иҫемдә: бер уҡыусыма әсәһе Ә. Вәлидиҙең нәҫеле булғаны өсөн генә бәйләнеп бер булдылар. Бахыр бала илап, буҫығып бөттө. Бик ҡаты, әммә абруйлы, ихтирамлы, көслө ойошма булды ул пионер.

Радик КИНЙӘБУЛАТОВ, эшсе, Нефтекама ҡалаһы:
— Пионер сағымды хәтерләһәм, бер күңелһеҙ ваҡиға иҫемә төшә. Бер көн шулай галстугымды юғалттым. Бик ҡаты киҫәтеү алдым. Мине яуапһыҙлыҡта ғәйепләнеләр. Аҙаҡ, бер ауыҙ бешкәс, иғтибарлыраҡ булдым. Хәҙер уйлайым да шул йылдарҙағы тәртипкә хайран ҡалам. Бөгөнгө ҡайһы бер йәштәргә кәрәк ине ул пионер, комсомол хәрәкәттәре.