Хеҙмәт Ҡыҙыл Байраҡ ордены кавалеры һаман сафта.

— Шундай матур һәм етеш тормошта йәшәүемә сикһеҙ шатмын, таңдарыбыҙ ҙа аяҙ һәм тыныс. Шөкөр, магазин кәштәләрендә әйберҙең, аҙыҡ-түлектең ниндәйе генә юҡ, һайлап ал, — ти Ишәле ауылынан райондың алдынғы һауынсыһы, хеҙмәт ветераны Таһира Мөхәмәтова. — Йәштәргә хәҙер ялҡауланмай тырышып уҡырға, эшләргә бөтә мөмкинлектәр бар, хөкүмәт тә ярҙамынан өҙмәй. Беҙҙең быуынға, әлбиттә, күпкә ауырға тура килде, шуға ла бөгөн һәр яңы көнгә ҡыуанып йәшәйбеҙ.

Изге күңелле, алсаҡ йөҙлө инәй бар ғүмерен малсылыҡҡа арнаған. Оҙаҡ йылдар “Коммунист” колхозында һауынсы булып эшләгән, әле хаҡлы ялда. Күптән түгел оло юбилейын 90 йәшен билдәләгән Таһира Мәүлит ҡыҙы һаман да теремек, ауылдаштары араһында абруй ҡаҙанған.
Оҙон ғүмерле ағинәй 1928 йылда күп балалы крәҫтиән ғаиләһендә тыуа, өс һуғышта ҡатнашҡан атаһы ла был донъянан бик иртә китә. Ауыл мәктәбендә йыйыштырыусы булып эшләгән әсәһенә яңғыҙына балаларҙы аяҡҡа баҫтырыуы ауырға төшә, ауылдың хөрмәтле кендек инәһе, имсеһе лә була ул.

Яҙмыш Таһира Мәүлит ҡыҙын иркәләмәй. Хеҙмәт биографияһы Бөйөк Ватан һуғышы йылдарында уҡ башлана: ун өс йәшлек ҡыҙ ололар менән бер рәттән колхозда ауыр эштә була, иртә таңдан ҡара кискә ҡәҙәр хеҙмәт сынығыуы үтә.

— Эш ауыр тип илап ултырырға ваҡыт булманы, иркәләнергә атай йылыһы, әсәй наҙы етмәне. Әммә ололар алдында һынатманым, көсһөҙлөгөмдө күрһәтергә тырышманым, — тип хәтергә ала ул ваҡыттарҙы хеҙмәт ветераны.

Еңеү көнөн Таһира инәй яҡшы иҫләй, етенсе класта уҡып йөрөгән бу­ла. “Мәктәп уҡыусыларын ауыл хаки­миәте бинаһы янына демонстра­цияға йыйып, дошмандың тар-мар ителеүен әйттеләр. Халыҡтың ҡыуанғаны, шатланғаны һаман күҙ алдында, ҡатын-ҡыҙ илашып та, йырлашып та алды. Был һуғышта күптәр ирҙәрен, яҡындарын, туғандарын юғалтты, тыуған яҡтарына әйләнеп ҡайтҡандарҙы айырыуса көтөп алдыҡ”, — ти Таһира инәй.
Артабан уға белем алырға мөмкин­лек тыумай. Ярлы ғына йәшәйҙәр, өҫтөнә кейеме, аяғына иһә итеге булмай. Йәш ҡыҙ, ғаиләгә ярҙам булһын тип, колхоз һарығын көтөргә сыға. Бер иптәш ҡыҙы менән айырым төркөм алып, 100 баш һарыҡты 160-ҡа ҡәҙәр үрсетеп, хужалыҡҡа тапшыралар. Уларҙың бындай хеҙмәт өлгөһө тураһында хәбәр тиҙ арала тирә-яҡҡа тарала. Таһира инәйҙе иптәш ҡыҙы менән Өфөгә радиоға саҡыралар. Үкенескә ҡаршы, ул баш ҡалаға бара алмай. Тырыш хеҙмәте өсөн ҡыҙҙы ул йылда Маҡтау ҡағыҙы менән бүләкләйҙәр.
Шул осорҙа ауылда һөтсөлөк фермаһы асылғас, Таһира Мәүлит ҡыҙы һауынсы булып эшкә урынлаша. Бында ла уңған ҡыҙ гел алдынғылар иҫәбендә була, быҙауҙарҙың үлеменә юл ҡуймай. Етәкселек тә уның эшенән ҡәнәғәтлек кисереп, йыш ҡына маҡтап телгә ала.

Бер йылдан һуң фермаға Түбәнге Тагил ҡалаһынан ҡара-сыбар тоҡомло 80 баш һыйыр малы алып ҡайтҡас, колхоз рәйесе Таһира инәйгә 15 баш һыйырҙы ышанып тапшырып, “һинең ҡулыңдан эш ҡурҡып тора, тырыш, бәлки, киләсәктә “герой” ҙа булырһың әле” тип йәш ҡыҙҙы дәртләндереп ҡуя. Таһира инәй һөт етештереү буйынса районда алдынғылар исем­легендә була. Уның малсы­лыҡтағы уңыш-ҡаҙаныштары тураһында Мәсетле районы гәзите хәбәрселәре лә: “Һауынсы Таһира Мөхәмәтова 1973 йылда һәр һыйырҙан 4068 килограмм, йәки 1972 йылға ҡарағанда, 455 килограмға күберәк һөт һауып, район һауынсыларының социалистик ярышында беренсе урынды алды. Туғыҙынсы биш йыллыҡта ла уның был сиктән тайпылырға уйы юҡ”, — тип яҙып сыға.

Юғары күрһәткестәргә өлгәшкәне өсөн Таһира Мәүлит ҡыҙы күп кенә маҡтау ҡағыҙҙарына лайыҡ була. Әммә Хеҙмәт Ҡыҙыл Байраҡ ордены уға бигерәк тә ҡәҙерле. Алдынғы һауынсы бер нисә тапҡыр социалис­тик ярышта еңеүсе тип таныла, СССР Ауыл хужалығы министрлы­ғының төрлө билдәләре менән дә бүләкләнә. “1941–1945 йылдарҙа Бөйөк Ватан һуғышындағы фиҙакәр хеҙмәте өсөн”, I дәрәжә “Әсәлек даны”, “Туғыҙынсы биш йыллыҡ ударнигы” кеүек билдәләргә лә лайыҡ була.

Таһира инәй ете балаға ғүмер бүләк иткән. Шөкөр, уларҙың барыһы ла белем алып, төрлө өлкәлә намыҫлы хеҙмәт итә. Яратҡан әсәй, һөйөклө өләсәйҙең 15 ейән-ейәнсәре, 13 бүлә-бүләсәре бар. Олпат йәштә булыуына ҡарамаҫтан, ул теремек, аҡылы айыҡ, хәтере яҡшы. Һаман булһа илдә барған үҙгәрештәр менән ҡыҙыҡ­һынып, төрлө матбуғат саралары аша сәйәсәтте күҙәтә, үҙ фекерҙәре менән уртаҡлаша. “Бары тик илдә тыныслыҡ булһын, ә тыныс күк йөҙө матур йәшәргә, эшләргә мөмкинлек бирәсәк”, — ти Таһира инәй.