Пенсия страховкаһы танытмаһы өлкәндәрҙең һәр береһендә барҙыр. Был “йәшел” карточканы рәсми телдә “шәхси иҫәптең страховка номеры” йәки ҡыҫҡаса СНИЛС тип йөрөтәләр. Йыл һайын илдә биш миллиондан ашыу кеше Рәсәй Пенсия фондында теркәлгәндән һуң ҡулына ошо документты ала. Уны нисек алырға, алмаштырырға мөмкин? Юғалтҡан осраҡта уны нисек тергеҙергә?

Хеҙмәт килешеүе төҙөгәндән һуң эш биреүсе ике аҙна эсендә яңы хеҙмәткәрҙең мәғлүмәттәрен һәм тултырылған анкетаны Пенсия фондының урындағы бүлексәһенә ебәрә. Страховка танытмаһы биш көндә әҙерләнеп, эйәһенә тапшы­рылырға тейеш. Он-лайн тәртибендә лә уны алырға мөмкин. Күп функциялы үҙәктәргә (МФЦ) мөрәжәғәт иткәндә, танытманы биш көн эсендә әҙерләп тапшырасаҡтар.

Хәтерегеҙҙә тотоғоҙ, СНИЛС һәр гражданға бер тапҡыр, ғүмерлеккә бирелә. Был номерға бары һеҙ генә хужа. Ә “йәшел” карточканы юғалтҡан осраҡта уны тергеҙеү ҡыйын түгел. Эшләгән урынығыҙҙа кадрҙар бүлегенә, дубликатын биреүҙе һорап, ғариза менән мөрәжәғәт итегеҙ. Ә шәхси шөғөллө кешеләр – эшҡыуар, адвокат, нотариус һ.б. – үҙҙәре теркәлгән урындағы Пенсия фондына ғариза тапшырырға тейеш. Эшләмәгән граждандар страховка танытмаһын тергеҙеү үтенесе менән теркәлгән йәки йәшәгән урыны буйынса Пенсия фонды бүлексәһенә мөрәжәғәт итергә хоҡуҡлы.

Фамилияһын үҙгәрткән кеше мотлаҡ страховка танытмаһын алмаштырырға тейеш, сөнки паспорттағы мәғлүмәт “йәшел” карточкалағы мәғлүмәткә тап килергә тейеш. Уға шул уҡ страховка номеры бирелә, әммә үҙгәртелгән яңы фамилия менән.


Өлкәндәр рекорд ҡуя

Хаҡлы ялға сығыу ваҡыты етһә лә, рәсәйҙәрҙең ярайһы ҙур өлөшө, шул иҫәптән Башҡортостан халҡы ла, эшләүен дауам итә. Сәбәптәре етерлек: лайыҡлы пенсия булмауы, бала-сағаһына йә иһә ейәндәренә ярҙам итеү теләге, кредиттар һәм ипотеканан тиҙерәк ҡотолоу уйы һ.б.

Әлеге көндә республиканың 200 меңдән ашыу пенсионеры төрлө тармаҡтарҙа эшләй. Рәсәй Пенсия фонды мәғлүмәттәренән күрене­үенсә, илебеҙҙә бер быуатлыҡ юбилейын ҡаршылаған биш йөҙйә­шәрҙең эшләп йөрөүе билдәле.
Пенсия фондына улар өсөн страховка иғәнәләре килеүен дауам итә. 2018 йылдың майына алынған мәғлүмәттәрҙән, Өфөлә 93 йәшлек ханымдың һин дә мин эшләп йөрөгәнен белеп, күптәр хайран ҡалғайны.


Сит илдә лә түләнә

“Сит илгә йәшәргә киткәндәргә пенсияға хоҡуҡ һаҡланасаҡмы?”

А. ХӘЛИТОВ.

Октябрьский ҡалаһы.

– Хәҙерге ваҡытта йәшәү урындарын алмаштырғандар күбәйҙе. Рәсәй Пенсия фонды донъяның 128 илендә йәшәгән 305 меңдән ашыу ватандашыбыҙға пенсия түләй.

Күп илдәр менән пенсия килешеүҙәре төҙөлгән, шуға күрә, ҡайһы илгә күсеүенә ҡарап, граждандарҙы пенсия менән тәьмин итеү шарттары ла төрлөсә булыуы мөмкин.