Ата-әсә менән кәңәшләшеп эшләү мөһимлеген раҫлай улар.

Был төбәктә һәр ваҡыт эшсәнлек, дәрт-дарман хөкөм һөрә. Бына әле лә тырышып уңыш йыйған халыҡҡа ҡарап, көләс йөҙҙәрҙе күреп күңел күтәрелде. Ошондай уңғанлығы, асыҡ йөҙлөлөгө менән йәш быуынға ни тиклем күркәм тәрбиә бирә шишмәләр!

Район хакимиәтенең мәғариф бүлегенә юл алабыҙ. Етәксе Сөләймән Ваһапов әйтеүенсә, төбәктә сентябрь-октябрь айҙарында, белем биреү өлкәһенә бәйле байрамдар күп осорҙа, төрлө саралар, тантаналар бихисап үткәрелгән. Тәрбиәселәргә, уҡытыу­сыларға оло хөрмәт күрһәтелгән, йылы һүҙҙәр еткерелгән. “Улар, киләсә­гебеҙҙе үҫтереүселәр, һис шикһеҙ, бындай ихтирамға һәр ваҡыт лайыҡ”, – ти Сөләймән Сәйәх улы. Бүлек етәксеһе менән бергә Шишмә ҡасабаһы үҙәгендәге балалар баҡсаһына юл тоттоҡ.

– Бәхетленең ҡунағы бер көндә тигәндәй, байрамдарҙы берләштереп үткәреүҙе йола итеп алғанбыҙ, – ти “Баҙлауыҡ” балалар баҡсаһы мөдире, Рәсәй дөйөм белем биреү мәктәп­тәренең почетлы хеҙмәткәре Зөлхиә Шакирова. – Мәҫәлән, быйыл да тәрбиәселәр менән өлкән йәштәгеләр көнөн ҡушып уҙғарҙыҡ, күңелле лә, фәһемле лә ойоштороу килеп сыҡты. Байрамда малай һәм ҡыҙҙарҙың сығыштарына айырым иғтибар бүләбеҙ, уларҙың һәр береһе талантлы. Бейеү тиһәң, йәһәт сиратҡа баҫалар, ихлас күңелдән йырлайҙар, айырыуса шиғыр һөйләргә яраталар.

Бында түңәрәктәр күп. Уларҙың ниндәйен ойоштороу йәһәтенән алдан ата-әсә менән һөйләшелгән, кәңәш-тәҡдимдәр тыңланған, балалар баҡсаһы мөдиренең, тәрбиәселәрҙең фекере иҫәпкә алынған. Һөҙөмтәлә әле балалар бейеү, күнекмәле математика, физкультура, һүрәт төшөрөү һ.б. түңәрәктәргә йөрөй, логопед кабинетында айырым шөғөлләнеү мөмкинлеге бар. Өҫтәүенә быйыл “Башҡортостан ынйылары” тигәне булдырылған, унда арҙаҡлы шәхес­тәрҙең тормошон һәм эшмәкәрлеген, ижадын өйрәнәләр.

“Баҙлауыҡ” бинаһының күркәмлеге, заманса йөҙө менән һоҡландыра, балаларҙы һәр яҡлап үҫтереү йәһәтенән булдырылған мөмкинлек­тәре ҡалалағыларҙы көнләштерерлек. Унда 150 бала тәрбиәләнә. Һәр береһе ҡәләм тоторға, хәреф танырға, яҙырға, һанарға өйрәнһен өсөн тәрбиәселәр күп көс түгә. Мәҫәлән, 5-се төркөм етәксеһе Лариса Гордеева һәр бала менән айырым шөғөлләнеүгә ваҡытын йәлләмәй. Әлбиттә, ауыр, әммә булдырырға мөмкин, янда тороп аңлатыу, шәхси иғтибар сабый аңына, күңеленә көслөрәк тәьҫир итә, ти ул.

Шуныһы ла бар: ярты быуатлыҡ тарихы булған балалар баҡсаһында Зөлхиә Шакирова – өсөнсө мөдир. Мәғариф учреждениеларында шулай булырға тейештер ҙә: бала күңеле үтә һиҙгер, етәксенең йыш алмашыныуы уның тәртибенә йоғонто яһамай ҡалмайҙыр. Эйе, һәр йәһәттән дә өлгөлө ул “Баҙлауыҡ”.