Башта ошо фотоға ҡарағыҙ әле. Учалы районының Ҡобағош ауылында йәшәгән Рәшиҙә апай Зыкрина ҡапҡаһының ошондай ғәжәп, әкиәттәгесә матур булыуына шатланыу менән сикләнмәй, хаҡлы рәүештә ғорурлана ла – был гүзәллекте уның ейәне үҙ ҡулдары менән булдырған бит!

Рәссам Илнар Зәйтүновҡа әле ни бары ун һигеҙ генә йәш. Белорет ҡалаһында тыуған. Рәссамлыҡ һәләте сабый саҡтан уҡ беленә башлаған уның. Шуны күреп, башланғыс класс уҡытыусыһы баланы сәнғәт мәктәбенә бирергә кәңәш иткән. Унда малай кинәнеп һүрәт төшөрөргә өйрәнгән. 2016 йылда, мәктәптә туғыҙынсы класты тамамлағас, Өфө сәнғәт колледжына уҡырға ингән.

– Әле дизайн бүлегенең өсөнсө курсында уҡыйым, әммә был йүнәлеш ни тиклем ҡыҙыҡһындырмаһын, һүрәт төшөрөүҙе бер ҡасан да ташламаҫҡа ҡарар иттем, – ти һәләтле егет.

Уның ижадының бер үҙенсәлеге бар: ҡәҙимге киндер туҡымаға йәки ҡағыҙға төшөрөүҙән бигерәк, стеналарға һүрәт яһарға әүәҫләнеп алған. Был алымға осраҡлы рәүештә тотонған Илнар. Былтыр өләсәһе, ейәненең буласаҡ рәссам икәнлеген белгәс, ихата эсендәге бер стенаны нисегерәк биҙәргә, тип уның менән кәңәшләшкән. Илнар, уйлап самалағандан һуң, илһамланып ижад итергә тотонған.

Быйыл иһә Ҡобағош ауылына килеп, өләсәһе Рәшиҙә апайҙың ҡапҡаһында, башҡа туғандарының да йорт-ҡаралтыларында фотоларҙағы гүзәллекте пәйҙә иткән оҫта егет. Хәҙер, уның иҫ киткес теүәл һынландырышлы эштәрен күреп ҡалып, йорт-учреждениеларҙы биҙәргә һорап килеүселәр ҙә күбәйгән, оҫта даны тирә-йүнгә таралған.

Илнар кеүектәрҙе башҡорт халҡында “белеп тыуған” тиҙәр, ундайҙар йәш кенә көйөнсә лә күптәргә өлгө булырлыҡ. Егет менән әңгәмәләшкәндән һуң, уның гүзәл һүрәт төшөрөүенән тыш, тәрән фекер йөрөтөүенә лә хайран ҡалаһың: “Көндәлек ығы-зығы, донъя мәшәҡәттәре менән кешеләр тормош матурлығын күрмәй ҙә, күптәр аяҡ аҫтына ғына ҡарап йөрөй. Минең һүрәттәрем йәшәйеш тәмен тулыраҡ тойорға, тирә-йүндең камиллығын, нәфислеген абайларға булышлыҡ итһә, кешеләрҙе саҡ ҡына бәхетлерәк һәм шәфҡәтлерәк итә икән, бик ҡәнәғәт буласаҡмын”.

...Ҡайһы ваҡыт бәғзе күргәҙмәләрҙә йыш ҡына сәйер, төрлө төҫтәге таптар уҡмаш­ма­һын күрһәтәләр ҙә: “Был бит заман сәнғәте!” – тип һоҡланырға ҡушалар. Йәнә­һе лә, ниндәй колорит һәм композиция, иҫ киткес ижади идеялар ярылып ята. Әллә инде, ундай “юғары сәнғәт” һуҡыр тингә лә кәрәкмәй, ә бына Ҡобағош ауылындағы йорт-ҡаралтыларҙағы картиналар беҙгә ысын сәнғәт булып тойолдо – янынан битараф үтеү мөмкин түгел. Афарин!

...“Ватыҡ тәҙрә” теорияһы тураһында ишеткәнегеҙ бармы? Былайыраҡ ул: бинала берәй генә быяла ватылып, тиҙ арала яңыһы ҡуйылмай икән, күпмелер ваҡыттан бер генә теүәл тәҙрә лә ҡалмаясаҡ, сөнки кешеләр ҡул һелтәй, беҙҙә йүнле бер ни булмай ул, тип төшөнкөлөккә бирелә. Ә беҙ килтергән миҫалда ҡаршы осраҡ һүрәтләнә: ауылда берәйһе матурлыҡ булдыра икән, ҡалғандар ҙа унан ҡалышмаҫҡа тырыша башлай, сәмләнеп йорт-ҡаралтыһын матурлай. Яҡшы ҡылыҡтар ҙа йоғошло бит ул, йәмәғәт!