Уңғандарҙың ризығы мул, тормошо болло.

Май тәпәне тышынан билдәле тигәнде раҫлап, Ғәлиевтәрҙең сымыры донъяһы әллә ҡайҙан иғтибарҙы тарта. Баҡсалары тулы сәскә-гөл, йәшелсә-емеш, ағас-ҡыуаҡ. Әсәһе Йәмилә инәй мәрхүмәгә оҡшап, юҡты бар итергә генә тора Дилбәр.

Ҡара яҙҙан урмандан ҡайтып инмәй Ғәлиевтәр. “Үгәй инә үләне сәскә атҡан мәлдән башланып китә беҙҙең эш”, – ти ғаилә башлығы Олег Марс улы.

Әйткәндәй, Ғәлиевтәрҙең өйөндә үлән төнәтмәләре, киптереп, төрлө дәүмәлдәге йәшниктәрҙә һаҡланған үләндәр өсөн айырым бүлмә, үҙҙәренсә әйткәндә, келәт бар. Вәт, исмаһам, витаминдар унда: иҙән тултырып әлморон, урман ҡарағаты, ҡыр сейәһе япраҡтары киптерергә һалынған. Тырҡыш бәшмәгенән һыҙланғанда ыуыныу өсөн төнәтмәләр эшләнгән. Болануттан, сәскә атҡан мәлдә үк йыйылып, ит турағыста боролоп, быҡтырылғандан һуң киптерелеп, бына тигән сәй әҙерләнгән.

Йәш сағы Әүжәндә үткән Йәмилә инәй үҙе донъя көтөргә бик шәп булып, 11 балаһын да шуға өйрәткән. Иҫке Собханғолда йәшәгән дүрт ҡыҙы – Вәсилә, Фәриҙә, Дилбәр, Гөлдәр – бер-береһенә ярҙам итешеп, урман-ҡырға ла бергә йөрөп, ихлас донъя көтә.

“Былтыр ерән бәшмәктәрҙе хатта Ҡағы, Үҙән яғына барып йыйҙыҡ”, – ти Дилбәр. Быйыл аҡ бәшмәккә, ҡайын бәшмәгенә Мәһәҙей, Яуымбай яғына барғандар. Әле уларҙы тоҙлап, туңдырырын туңдырырға һалып, әҙерләмәләрен баҙға төшөрөргә йөрөүҙәре.

Ғәлиевтәрҙең баҙы – үҙе бер аҙыҡ-түлек келәте. Груша, алманан повидлолар, сейә, ҡарағаттан компоттар, көртмәле, турғай еләге, шартыйҙан ҡайнатмалар, баҡсала үҫтергән йәшелсәләренән салаттар эшләгән оҫта ханым. Баҙҙың тағы бер үҙенсәлеге: ҡышҡылыҡҡа сөгөлдөр, кишерҙәр лар кеүек ҙур ағас йәшниктәрҙә һаҡлана. Бер рәт ҡом, унан йәшелсәне һалып, бер-береһенә тейҙермәй һаҡлайһың, ҡыш ҡомға әҙләп кенә һыу ҡойоп тораһың икән. Быныһы ла – аҡыл.

Ҡыҙыл, ҡара, аҡ ҡарағат, виноград, ағас еләге үҫтерә Ғәлиевтәр, йәшелсәнең ниндәй генә төрө юҡ! Теплицаны ла өй хужаһы үҙе эшләгән.

“Быйыл бәшмәк күп булды, туғандарға, күрше-күләнгә лә тараттыҡ”, – ти Дилбәр. Биргән ҡулды Аллаһ Тәғәлә ярата шул – үҙҙәренә әллә нисә тапҡыр арттырып бирә. “Ләә иләһә иллә Аллаһ, тип урманға кереп китһәң, аҙым һайын байлыҡ-ниғмәткә тап булаһың”, – тип ҡыуана тәбиғәт йәнле урман ҡыҙы. Ылаҡты йылғаһы буйҙарын ҡыҙырып, Мәһәҙейҙән ары район сигенә лә барып сыға урман-ҡыр байлығы артынан Дилбәр.

“Һарғаяла саҡта Хәбирә өләсәйгә эйәреп һарыҡ көтөргә йөрөгәндә лә биҙрә тултырып еләк-муйылын алып ҡайта инек”, – тип хәтерләй Дилбәр. Урман ҡыҙы күңеленә тәбиғәткә һөйөүҙе инәй-өләсәйҙәр, ата-бабалар һалған шулай.

Эйе, бөгөн берәүҙәр юҡтан бутҡа бешергәндә, Дилбәр кеүек уңғандар Аллаһ биргән ниғмәтте йыйып, ҡот-бәрәкәт арттыра, йәшәйешен болло итә. Уңғандарҙың эше лә, тормошо ла уң, ризығы мул, йәшәйеше бәрәкәтле.