Хәҙерге заманда компьютерһыҙ, планшетһыҙ, смартфонһыҙ йәшәүҙе күҙ алдына килтереп булмай. Кешеләр күп ваҡытын ошо гаджеттар менән үткәрә. Транспортта барғанда ла, урамда йөрөгәндә лә, уҡығанда ла йәштәр уларҙы ҡулдан төшөрмәй.

Мәғлүмәт менән танышҡанда, ҡыҙыҡлы фильм ҡарағанда йәки социаль селтәрҙәрҙә ултырғанда кеше иҫ киткес ҙур көсөргәнеш кисерә. Айырыуса күреү һәләтенә зыян килеүе бар. Әгәр ҙә ошо ябай ғына ҡағиҙәләрҙе үтәһәгеҙ, гаджеттарҙы йыш ҡулланған осраҡта ла, күҙҙәрегеҙҙең сәләмәтлеген һаҡлап ҡала алаһығыҙ, ти белгестәр.

Беренсенән, транспортта хәрә­кәт иткәндә, яҡтылыҡ етешмәгәндә смартфондарҙан файҙаланмағыҙ, бары музыка тыңлап барыуығыҙ хәйерле.
Икенсенән, күҙҙәр менән гаджет араһы яҡынса 30 сантиметр тирәһе булырға тейеш.

Өсөнсөнән, смартфондың яҡты­лығын һәм шрифттарҙың ҙурлығын дөрөҫ көйләү мөһим. Тексты һеҙ күҙ мускулдарына көсөргәнеш төшөрмәйенсә уҡырға тейешһегеҙ.

Дүртенсенән, тоноҡ һаҡлағыс пленканы ҡулланыу күҙҙәрҙе яҡты нур шәлкеменән һаҡлар.

Бишенсенән, дөрөҫ туҡланығыҙ. А витамины күп тупланған аҙыҡ-түлек — балыҡ, йомортҡа, ҡара көртмәле — күреү һәләтенә яҡшы тәьҫир итеүсән.
Смартфондарҙы дөрөҫ һайлай белеү, ышаныслы етештереүсе­ләрҙән һатып алыу хәүефһеҙлекте гарантиялай.

Күҙҙәрҙе ял иттереү өсөн ябай ғына күнегеүҙәр ҙә ярҙам итер. Электрон ҡорамалдарҙа эш барышында ярты сәғәт һайын күҙ ҡарашығыҙҙы тәҙрәгә төбәп ял иттереп алығыҙ. Күҙҙәрегеҙҙе йомған килеш ҡара­шығыҙҙы төрлө яҡҡа йүнәлтеү ҙә сәләмәтлекте һаҡлауға булышыр.