Һауа торошо сентябрҙә бер төрлө генә түгел: бер ҡараһаң, сыуаҡ, ҡояш йылыта, көндөң икенсе яртыһында иһә һыуытып ебәреп, ямғыр яуа башлауы ла ихтимал. Шуға бәйле балыҡтарҙың да йәшәү рәүеше үҙгәрә. Улар йылғаларҙа тәрәнгә төшөп ята, күл-бы­уа­ларҙа ла соҡорҙарға йыйылыу­сан.

Шулай ҙа, сентябрь – йылтырма менән тотоусылар айы, тиһәм, хата булмаҫ. Әммә фидерҙы, ҡалҡыуыслы ҡармаҡты йыйып ҡуйырға иртәрәк. Бынамын тигән алабуға, сабаҡ, табан, опто, ҡорман балыҡтарын ҡаптырырға мөмкин. Ҙур йылғаларҙа иһә йәйен эләгеүе ихтимал. Әммә ваҡ балыҡ бик яй ҡаба. Суртан, алабуға, һыла тотоусылар йылтырмаға өҫтөнлөк бирә. Тере селбәрәгә яр буйҙарында һыла эләгеүе мөмкин. Ҡырау төшкән төндәрҙә шамбы ҡаба, уны бер нисә селәүсен ҡуйылған ҡармаҡҡа тотаһың. Бәрҙене, бағрыны йәшенеп тороп ҡармаҡларға кәңәш ителә. Сентябрь аҙағында табан балығын тотоу ауырлаша, әммә етәрлек алырға мөмкин.

Октябрҙе балыҡсылар “бысраҡ” ай тип атай. Быҫҡаҡлап ямғыр яуа, туҡтамай ел иҫә, ай аҙағында ҡары ла ҡушылһа... Был ваҡытта балыҡсылар буласаҡ табышының ҡышлауына ашыға, сөнки бөтөнөһө шунда – тәрәндә, соҡорҙарҙа. Икмәккә лә, селәүгә лә эләгәсәктәр. Кәмәлә ултырғанда, түңәрәктәрҙе емләп ебәрергә була. Һыу туңа башлағас, алабуғаны рәхәтләнеп тоторға мөмкин. Йәйге ҡармаҡтарыңды ҡышҡылыҡҡа майлап һалып ҡуйырға кәрәк.

Ноябрь – ҡараңғы ай. Төнөн ҡармаҡлауҙың файҙаһы юҡ тиерлек. Һалҡын ел үҙәктәрҙе өҙә. Һыу өҫтөндә лә тынлыҡ, балыҡ та ҡарпымай. Тик ротан ғына, ҡомһоҙлоғо сәбәпле, ҡармаҡҡа ла яҡшы эләгә. Ноябрҙә ҡышҡа селәүсен әҙерләргә тотонорға кәрәк. Биҙрәгә тиреҫ, алма, сәй шамаһы һалаһың да шунда яҙ еткәнсе һаҡлайһың.

Был айҙа тәүге боҙ барлыҡҡа килгәс, балыҡ тотҡанда һыуға төшөп киткән кешеләр күбәйә. Бөтә урында ла бер төрлө туңмай бит. Боҙ алты-ете сантиметр ҡалынлыҡҡа етмәйенсә, йылға-күл буйына барырға ярамай. Һәр саҡ иптәш алырға кәрәк.

Ноябрҙә алабуғаның бәләкәйҙәре ихлас эләгә, ҙурҙары иһә яр буйындараҡ, ҡамыш араһында була. Селбәрәгә боҙ аҫтынан суртан, алабуға эләктерергә мөмкин. Флажоклы ҡармаҡҡа (жерлицаға) тере балыҡ ҡуйыу яҡшы һөҙөмтә бирә. Боҙ аҫтынан йылтырмаға ла тоторға мөмкин.

Ҡалҡыуысҡа ла эләктерергә була, ырғаҡҡа ҡыҙыл ҡарышлауыҡ ҡуйыу – иң отошлоһо. Ғөмүмән, тәүге боҙ аҫтынан балыҡ тотоу – үҙе бер байрам. Тәүҙә бер генә ҡарышлауыҡҡа тотоп ҡарарға кәрәк. Һуңынан, ихлас эләгә башлаһа, икәү-өсәүҙе ҡуйырға мөмкин. Шулай уҡ кейемдең йылы, уңайлы булыуы ла мөһим.