Шәфҡәт Ғәбитов бер нәмәнән дә ҡурҡмаҫҡа кәңәш итә.

– Бала саҡтан, тамырҙар тартҡанғамы, “сәйәхәт” иткәнем хәтерҙә. Мәҫәлән, дүрт-алты йәшлек сағымда мин, игеҙәгем, ике ағайым ҡышҡыһын ике саҡрым алыҫлыҡта ятҡан күрше ауылға еҙнәйҙән бәке алырға барҙыҡ, йәнә яҙғы ташҡын ваҡытында 12 саҡрымда ятҡан Асҡар ауылына барабыҙ тип өйҙән сығып киттек. Әлбиттә, һуңғыһында маҡсатыбыҙға өлгәшеүебеҙ шикле булды, әммә маташып ҡараныҡ.

Инде ысынлап сәйәхәт итә башлауым егерме йәшемдә булды. Иң беренсе ҙур сәфәрем тәжрибәле сәйәхәтселәр Азамат Юлдашбаев, Денис Өмөтбаев менән Ҡаҙағстан, Ҡырғыҙстан илдәре буйлап 11 көнлөк автотур ине. Рәсәй менән Ҡаҙағстан араһындағы сикте сыҡҡандағы тәьҫораттар һаман да хәтерҙә. Ҡурҡытты ла, шул уҡ ваҡытта бик ныҡ тулҡынлан­дырҙы ла. Унан һуң тағы бер нисә илде барып күрҙем. Минеңсә, был шөғөл ҡыҙыҡһыныуға бәйле: үҙең өсөн яңы илдәрҙе, ерҙәрҙе, мәҙәниәтте, телде өйрәнәм тип, ҡабат-ҡабат юлға сығаһың.

Санкт-Петербург ҡалаһы күңелемдә матур тәьҫораттар ҡалдырҙы. Илебеҙҙең мәҙәни баш ҡалаһындағы, матур-матур һарайҙарға, күперҙәргә һоҡланмау мөмкин түгел. Унда барып ҡайтырға һәр саҡ әҙермен, сөнки ҡаланың үҙенсәлекле бай тарихы гелән үҙенә әйҙәй.

Корея – бәләкәй, ләкин шул уҡ ваҡытта ныҡ үҫешкән ил. Майҙаны Башҡортостандың өстән ике өлөшөндәй булыуына ҡарамаҫтан, унда 54 миллион кеше йәшәй. Шуға иң беренсе башҡа “ҡайһылай кеше күп” тигән уй килде. Бөтә нәмә лә тығыҙ итеп төҙөлгән. Әгәр Башҡортостанда бер ауылдан икенсеһенә тиклем байтаҡ ара булһа, уларҙа ике ҡала араһы 10 саҡрымда урынлашҡан. Ә “ауыл” тип һаналған ҡалаларында 500 меңдән ашыу кеше йәшәй.

Төркиә – беҙгә мәҙәниәте, теле, дине менән яҡын торған ил. Уның тарихы бай, күп нәмә һаҡланып ҡалған. Илдең төньяғында йәшәгән халыҡ шул хәтлем киң күңелле булыуы менән айырылып тора.

Истанбулда аҙна дауамында йөрөп, ҡаланың тарихын, архитектураһын өйрәндем. “Иң ныҡ оҡшаған ил ниндәй?” тип һораһалар, һис шикһеҙ, Төркиә, тип яуаплар инем.

Күп кеше стереотип менән уйларға күнеккән, сәйәхәт итеү өсөн ярайһы ҙур сығым кәрәк тип һанай. Был ысынында дөрөҫ түгел. Шул уҡ аҡсаны Өфөлә лә фатирға, ашау-эсеүгә, күңел асыуға тотоналар.

Шулай уҡ күптәр үҙгәрештәрҙән ҡурҡа, ете ят ерҙә үҙҙәре менән бер-бер хәл булып ҡуйыуы ихтимал, бер кем дә гарантия бирә алмай, тигән фекерҙәр ҙә яңғырай. Кәңәшем шул: тәүәккәлләгеҙ. Бер тапҡыр үҙегеҙҙең шикләнеүегеҙҙе, ҡурҡыуығыҙҙы еңһәгеҙ, алдығыҙҙа шундай киң донъя асыласаҡ. Бөгөн мөмкинлектәр шул хәтлем күп, файҙаланырға ғына кәрәк.

Америка, Исландия, Албания илдәрен барып күрергә хыялланам.