Денис Өмөтбаев донъяға башҡорт шиғырҙарын яңғырата.

– Миңә ете йәш булғанда, ағайым автостоп менән ауылдарға сығып китте. Үҙе менән алмағанға, ҡала ситендә илап тороп ҡалдым. Шунда “ҙурайып алһам, үҙем йөрөйә­сәкмен” тигән маҡсат яралды ла инде. Ун бер йәш тулғас, Баймаҡ һәм Хәйбулла райондары ауылдары буйлап автостоп менән үҙем йөрөп килдем.

Ун дүрт йәштән өйҙән ситтә уҡы­ным, юлға өйрәндем. Поезд менән диңгеҙгә барыу хыялым ҙур ине. Студент булғанға тиклем шул хыялдан айырылманым. Егерме бер йәшемдә Бөйөк Британияға сығып китеп, сәфәрҙә алыҫ юл тәмен татыным. Әлегә тиклем 25 илде күр­ҙем: Бөйөк Британия, Швеция, Финляндия, Украина, Һиндостан, Ҡа­ҙағс­тан, Ҡырғыҙстан, Үзбәкстан, Беларусь, Польша, Чехия, Словакия, Австрия, Германия, Нидерланд, Азер­байжан, Грузия, Әрмәнстан, Монголия, Черногория, Македония, Сербия, Босния, Герцеговина, Албания.

Сәйәхәт хаҡында һүҙ алып бар­ғанда, минең өсөн иң ҡыйыны – унан туҡтап ҡалыу. Был юлға бер баҫ­ҡанһың икән, ул үҙенә тартып тик тора.
Сәйәхәт итә башлау өсөн студент саҡ – иң яҡшы мәл. Ата-әсәһенән фатиха һорап, шул осорҙо ҡул­ланып ҡалһын ине йәштәр. Оҡшаһа, донъя­ның сәфәр ҡылырға яңынан-яңы мөмкинлектәр биреүенә ина­нырҙар.

Бөтә нәмә лә тәжрибә аша килә. Осһоҙ хаҡҡа сәйәхәт итергә теләгәндәргә даими эҙләнергә, төрлө ысулдарҙы ҡулланырға, ҡунаҡханаларҙа түгел, ә мосафирханала (хостел – авт.) туҡтарға кәңәш итәм.

Денисты Башҡортостанда күптәр беләлер. Сит илдәргә даими сәфәр ҡылыуы менән бер рәттән, ул республикабыҙҙың төрлө ерҙәренә, айырыуса тауҙарға йыш йөрөй. Улай ғына түгел, төрлө илдәрҙә булғанда, төрлө милләт вәкилдәрен М. Аҡмулланың “Башҡорттарым, уҡыу кәрәк!” һәм Рәми Ғариповтың “Туған тел” шиғырҙарын ятлатып видеоға төшөрөүе рухлы егеткә ҡарата ихтирамды арттыра.

Күптән түгел Ҡырғыҙстанда үткән Бөтә донъя күсмә халыҡтар уйынында Башҡортостандан ҡатнашҡан бер төркөмдә Денис та булды. Уйындар бөткәс, ул үҙе кеүек сәйәхәт “сире” йоҡҡан бер нисә дуҫы менән Урта Азия илдәре буйлап сы­ғып китте. Инстаграмдағы сәхифә­һендә егет был сәфәр хаҡында бына ни тип яҙа:

“Өс республика, бер халыҡ-ара сара, ике мең саҡрым юл, утыҙ автомобиль, дүрт автобус, бер ишәк, дүрт мосафирхана, өс баҙар, йөҙ саҡрым йәйәүле юл, өс тау һырты, ике тауға күтәрелеү, диңгеҙ кимәленән 4400 метр бейеклектә булыу, 3000 фото­һүрәт, унлаған яңы танышыу, тонна яҡшы кәйеф һәм ҡыуаныстар”.