...Ҡыңғырау шылтырау менән уҡыусылар геү килешеп дәрескә ашыҡты. Коридорҙа сәғәттең текелдәгәне генә ишетелә. Бына башҡорт теле һәм әҙәбиәте кабинеты. Дәресте изге теләк, өгөт-нәсихәт менән башлап ебәргән уҡытыусының тыныс тауышы ишетелә: “Эргә-тирәләге һәр кемгә иғтибарлы булығыҙ, бәләкәстәргә – кеселеклелек, өлкәндәргә хөрмәт һулар һауалай кәрәк...”

Шишмә районы гимназияһы директоры Румия Ғайнанованың тәҡдиме менән беҙ ҙә башҡорт теле дәресен ҡарап сығыу бәхетенә өлгәштек.

Тәжрибәле уҡытыусы, Башҡортос­тандың мәғариф алдынғыһы Раузана Хәйруллина – эшен, балаларҙы мөкиббән яратҡан һөнәр эйәһе.
– Бөгөнгө балаларҙың шул ҡәҙәр аҡыллы булыуына хайран ҡалам, һоҡланам, – ти ул. – Белемгә ынтылыштары көслө, төрлө идея менән янып йәшәйҙәр, гимназия тормошонда әүҙем ҡатнашалар. Эшһөйәр үҙҙәре, һөнәр белеп үҫәләр. Күптән түгел, мәҫәлән, көҙгө йәрминкә ойошторолғайны. Балалар йәшелсәләрҙән оҫта итеп яһаған һындары, фантазияға байлығы менән тағы бер ҡат һоҡландырҙы. Һата белеү маһирлыҡтарына йәнә һөйөндөк.

Раузана Әсғәт ҡыҙы республикала бөгөнгө башҡорт теле уҡытыусыларына үҫешеү, белемде камиллаштырыу, сифатҡа йүнәлтелгән эшмәкәрлек ойоштороу, ижади хеҙмәт, үҙ көсөңдө күрһәтеү өсөн киң мөмкинлектәр асылғанына һөйөнөүен белдерҙе. Шул уҡ ваҡытта бала күңеленә туған телгә һөйөү тойғоһо һалыуҙың ни ҡәҙәр ҙур әһәмиәткә эйә икәнлегенә үҙ өлгөһөндә инандырҙы.

– Дәрестә был маҡсатҡа ҙур урын бирергә тырышам, – ти Раузана Әсғәт ҡыҙы. – Әҙиптәрҙең әҫәрҙәрен өйрәнеүгә ныҡлы иғтибар бүләбеҙ. Тәү сиратта балаларҙың телмәрен, фекерләү ҡеүәһен үҫтереү мөһим тип һанайым.

Башҡорт теле һәм әҙәбиәте кабинеты ифрат бай: стендтар, күргәҙмә материалдар, әсбаптар, әҙиптәрҙең портреттары, улар хаҡында белешмәләр, милли баҫмалар... Бөйөк яҡташтары Мостай Кәримдең тормошо һәм эшмәкәрлегенә бағышланған стендтан айырым күңел йылыһы бәрелеп торғандай.

Шишмә ҡасабаһында гимназия асылыуға быйыл 50 йыл тулған. Белем усағы һәр йәһәттән дә алдынғылыҡты бирмәй, өлгөлө эшмәкәрлек алып бара. Уҡыусылар ҙа тырыш, һәләтле. Мәҫәлән, 2017/18 уҡыу йылында X кластан Камил Тәминдәров Башҡортостан Башлығы стипендияһына лайыҡ булған.

Директор Румия Ғайнанованың билдәләүенсә, юғары эш һөҙөмтәһенә педагог та, уҡыусы ла берҙәй тырыш булғанда ғына өлгәшергә мөмкин. Камил кеүек өлгөлө балалар бихисап гимназияла. Уларҙың, заман технологияларын яҡшы белеүе менән бер рәттән, китап, гәзит-журнал уҡырға яратыуы йәнә һөйөндөрҙө. Уҡыған аҙашмаҫ, тигән ата-бабабыҙ.