Өфөлә “Уңышлы һәм шөғөллө булыу – трендлы булыу” I республика форумы үтте.

Хеҙмәт баҙарында йәш белгескә ихтыяж бармы? Йәштәр үҙ һөнәре буйынса эшләйме? Эш биреүсе барыһын да асыҡ йөҙ менән ҡаршылаймы? Ҡыҙҙар һәм егеттәрҙең ситкә китеп эш табыуы дөрөҫмө? Уңыш сере нимәлә? Ғөмүмән, йәштәргә ҡағылышлы саралар беҙҙә йыш ойошторола. Киләсәк өсөн һөнәр һайлау – көнүҙәк тема. Кисә Өфөлә йәштәр өсөн Карьера төҙөү көндәре башланды. Сара сиктәрендә Конгресс-холда йәштәрҙең мәшғүллегенә арналған “Уңышлы һәм шөғөллө булыу – трендлы булыу” (PROFуспех) тигән I республика форумы үтте. Сараның маҡсаты – студенттарҙы, X-XI класс уҡыусыларын төрлө тармаҡ эш биреүселәре менән таныштырыу, әүҙем йәштәрҙе дәүләт һәм муниципаль власть вәкилдәре менән осраштырыу.

Башҡортостан Башлығы Рөстәм Хәмитов билдәләүенсә, зал йәштәр менән шығырым тулы икән, был тиккә түгел.
– Башҡортостан – йәш респуб­ликаларҙың береһе, беҙҙә урта­са күрһәткес 38 йәш, – тине Рөс­тәм Зәки улы. – Бөгөн баҙар иҡти­садында йәшәйбеҙ. Ошондай шарттарҙа нимәгәлер өлгәшеү – уңыш. Нисек кенә булмаһын, күпте белергә һәм өйрәнергә кәрәк. Шул уҡ ваҡытта аңлау бер, ә нимә­нелер үҙгәртеү үҙеңә генә бәйле.

Республика етәксеһенең, тамаша залына мөрәжәғәт итеп, өлкән йәш­тәгеләр менән йәш­тәр араһындағы бәйләнеш ептәренең нә­ҙе­гәйә барыуын, үҫеп килгән йәш бы­уындың яңғыҙ тороп ҡалыуын билдәләп, егет һәм ҡыҙҙарҙың янында өйрә­теүсе йәки уҡытыусы булһа, бик тә яҡшы булыр ине, тип теләктәшлеккә өндәүе осраҡлы түгел. Рөстәм Хә­митовтың һүҙҙәренә ҡарағанда, йәштәр тураһында һәр йәһәттән дә хәстәрлек күреү – өлкәндәрҙең мө­ҡәд­дәс бурысы. Өлкәндәр йәш ҡыҙ һәм егеттәр менән тығыҙ бәйләнештә тороп, һәр саҡ ярҙам итергә тейеш.

Ысынлап та, тормош беҙ уйла­ғанса ҡорол­ма­ған, ә ҡатмарлы. Үҙеңә ышаныу күпте хәл итә. Быны Рөстәм Хәмитов та һыҙыҡ өҫтөнә алды.
Башҡортостан Башлығы Ҡытай эшҡыуары Джек Ман тураһында ла бер нисә һүҙ әйтте. Баҡтиһәң, билдәле бизнесмен эшҡыуарлыҡты ҡалдырып, яңынан педагогик эшмәкәрлеккә ҡайтырға теләүен белдергән. Күптәр уның тормошта кинәт боролош яһауы менән ҡыҙыҡһынған. “Йәштәр менән бергә ҡалырға булдым, уларға белем эстәү хаҡын­да уйланам. Һәр береһе хаталарҙы еңел йырып сыҡһын – шуға ынтыласаҡмын”, – тип яуап биргән ул.

– Джек Мандың үҙгәреш яҡлы бу­лыуы минең өсөн дә бик ҡы­ҙыҡлы, – тине Рөстәм Зәки улы. – Тағы ла бер миҫал. Нью-Йоркта Үҙәк паркты ирекмәндәр тәртипкә килтерә һәм һәр ваҡыт таҙа тота. Улар юғарынан бер ниндәй ҙә күрһәтмә көтмәй, быны күңел ҡушыуы буйынса башҡара. Шул иғтибарҙы йәлеп итә: парк – ул социаль тигеҙлек урыны, үҙ сиратында, кешеләр уны һаҡлауҙы үҙҙәренең бурысы итеп һанай.
Пленар өлөштән һуң face2face исеме аҫтында ун әңгәмәләшеү майҙаны эшләне, “түңәрәк өҫтәл” ойошторолдо, оҫталыҡ дәресе үткәрелде, семинар-практикумда ҡатнашыу­сы­лар ҙа күп булды, ғалимдар лекция уҡыны.

12-13 сентябрҙә сара сиктәрендә ВДНХ-Экспо күргәҙмәләр комплексында фестиваль үтәсәк. Сарала Рәсәй төбәктәренән дә йәштәр ҡатнаша.