Республикала социаль яҡтан иң әүҙем ғаилә асыҡланасаҡ “Өлгө ал!” конкурсында ҡатнашыуға ғаризалар ҡабул итеү тамамлана. Конкурсты Башҡортостандың Ғаилә, хеҙмәт һәм халыҡты социаль яҡлау министрлығы, Матбуғат һәм киң мәғлүмәт саралары агентлығы, “Башҡортостан” телерадиокомпанияһы ойоштора.

Төп бүләк – Башҡортостан Башлығынан автомобиль.

Сарала ҡатнашыу өсөн ғаиләләргә үҙҙәренең социаль әүҙем тормошо тураһында видеоролик төшөрөргә кәрәк. Уның оҙайлылығы бер минуттан артмаҫҡа тейеш. Роликтың рус һәм башҡорт телдәрендә төшөрөлөүе мөмкин. Уны #Берипример хэштегы менән социаль селтәрҙәрҙең береһендәге сәхифәлә урынлаштырыу һәм bash.news сайтындағы конкурстың сәхифәһендә ғаризаны тултырыу шарт. Әйткәндәй, ғариза 9 сентябргә урындағы ваҡыт буйынса 23 сәғәт 59 минутҡа тиклем ҡабул ителә.

Еңеүселәр өс этапта һайлап алына: халыҡтың тауыш биреүе, SMS-тауыш биреү, конкурс комиссияһы ағзаларының тауыш һаны буйынса. Төп бүләккә эйә булыусы ноябрҙә үтәсәк Ғаилә көнө йомғаҡтарына арналған тантанала асыҡланасаҡ.