Башҡортостанда “Комдив Шайморатов. Геройҙың ҡайтыуы” тип аталған акция дауам итә. Ҡултамғалар бөтөн республиканың район-ҡалаларынан йыйыла. Хатта акция халыҡ-ара кимәлгә сыҡты. 112-се Башҡорт кавалерия дивизияһы музейына көн һайын тиҫтәләрсә хат, ҡултамға килә. Акция йәмәғәтселек менән бергә юғары вазифалы кешеләрҙә лә яҡлау һәм хуплау таба. Ҡайһы бер хаттар менән һеҙҙе лә таныштырмаҡсыбыҙ.

Рәсәй Дәүләт Думаһы депутаты Сәлиә Мырҙабаева:
— Республика халҡының, Бөйөк Ватан һуғышы ветерандарының башланғысын яҡлап һәм миңә күпләп мөрәжәғәт итеүҙәрен иҫтә тотоп, Рәсәй Президенты исеменә Миңлеғәле Шайморатовҡа Рәсәй Геройы исемен биреү мәсьәләһен ҡарауҙы һорап мөрәжәғәт ебәрҙем, — тине ул. — Башҡортостан халҡы өсөн Миңлеғәле Шайморатов һәр ваҡыт герой булды һәм шулай ҡаласаҡ. Минеңсә, уға был исемде биреү тарихи ғәҙеллекте тергеҙеү һәм йәш быуынды — буласаҡ Ватанды һаҡлаусыларҙы тәрбиәләүҙә өлгө булыр ине.

Илмира ҒӘЛИӘХМӘТОВА, Ҡырмыҫҡалы районы хакимиәте башлығының социаль мәсьәләләр буйынса урынбаҫары:
— Миңлеғәле Шайморатовтың тыуған ауылындағы мәктәптә музей эшләп килә. Ул йыл һайын ҡыҙыҡлы мәғлүмәттәр, экспонаттар менән тулыландырыла. Киләсәктә районда айырым йорт-музей асыу тураһында мәсьәлә хәл ителәсәк. Яҡташыбыҙға Герой исемен биреүҙе юллап ун меңгә яҡын ҡултамға йыйылды. Миңлеғәле Шайморатовҡа Өфөлә мемориал һәйкәл асыу — күптән өлгөрөп еткән мәсьәлә. Был барлыҡ башҡорт кавалерия дивизияһы яугирҙәре рухы, ҡаһарманлығы алдында баш эйеү булыр ине.

Илүзә ИШМӨХӘМӘТОВА, 112-се Башҡорт кавалерия дивизияһы музейы директоры:
— Бөгөн беҙҙә 300 меңгә яҡын ҡултамға йыйылды. Был акцияға республикала битараф кешеләр юҡ шикелле. Башҡортостандан ғына түгел, хатта күрше өлкәләрҙән, сит илдәрҙән дә хаттар, ҡултамғалар килә. Минеңсә, әлеге акция халыҡты бер ҡорға тупланы. Музей өсөн дә бик файҙалы булды. Республика баҫмалары, телевидение һәм радио аша ишетеп мөрәжәғәт итеүселәр күбәйҙе. Беҙҙең музей фонды быға тиклем билдәле булмаған материалдар менән тулыланды. Акция әле генә тамамланмай. Беҙ уны тарихи ғәҙеллеккә өлгәшкәнсе — генерал Шайморатовҡа Рәсәй Геройы исемен биргәнсе — дауам итмәксебеҙ. Ошо арала Башҡортостан Президентына мөрәжәғәт ебәрәсәкбеҙ, артабан уның ярҙамы менән Рәсәй Президентына сығырбыҙ тип уйлайбыҙ. Быйылғы йылдың Рәсәй тарихы йылы тип иғлан ителеүе тарихыбыҙҙағы аҡ таптарҙы бөтөрөү өсөн эшләнгән тип иҫәпләйем. Ғәҙеллектең тантана итеренә ышанабыҙ!

* * *

“Ҡояшлы Ташкенттан сәләм! Башҡортостанда “Комдив Шайморатов. Геройҙың ҡайтыуы” тигән акция барыуын ишеттек. Беҙ был башланғысты шунда уҡ хупланыҡ һәм ихлас күңелдән ҡушылабыҙ. Үзбәкстанда йәшәүсе башҡорттар берләшеп ҡултамға йыя башланы. Улар араһында башҡорттар ғына түгел, башҡа милләт вәкилдәре лә күп. Өлкән быуын кешеләре менән бергә уларҙың балалары һәм ейәндәре лә ихлас күңелдән ҡултамға йыя. Быны беҙ дөйөм эшебеҙ тип иҫәпләйбеҙ һәм уның уңышлы тамамланыуына ышанабыҙ”.


* * *
“Латвия башҡорттары ҡоролтайы” һәм ошонда йәшәүсе барлыҡ башҡорттар акцияны ойоштороусыларға ҙур рәхмәт белдерә һәм уға дәррәү ҡушыла. Был хаҡта белеп ҡалыу менән ҡултамғалар йыя башланыҡ. 112-се Башҡорт кавалерия дивизияһының легендар командиры Миңлеғәле Шайморатовтың батырлығы халыҡ хәтерендә мәңге йәшәй. Шуға күрә тарихи ғәҙеллек ҡасан да булһа тантана итергә тейеш. Беҙ, Латвияла йәшәүсе башҡорттар, уның тураһында бала саҡтан ишетеп үҫтек.
Тиҫтәләрсә йыл үтеүгә ҡарамаҫтан, лайыҡлы награда үҙ геройын табырға тейеш.
Миңлеғәле Шайморатов — легандар шәхес һәм Бөйөк Ватан һуғышында ҡатнашҡан башҡорт халҡының хәрби даны символы. Башҡортостандан меңәр километр ситтә йәшәһәк тә, беҙ тыуған илебеҙ һәм халҡыбыҙҙың батырҙары тураһында онотмайбыҙ. Генералға Герой исеме бирелер тигән ышаныстабыҙ. Уңыштар һеҙгә!”


* * *
“Мин — подполковник, Чернобыль АЭС-ындағы аварияны бөтөрөүҙә ҡатнаштым, хеҙмәт ветераны. “Рәсәй-Башҡортостан” радиоһы, 112-се кавалерия дивизияһы музейы һәм хәрби хәрәкәттәр союзы ветерандарының башланғысын хуплайым һәм “Комдив Шайморатов. Геройҙың ҡайтыуы” тигән акцияға ҡушылам.
Әлшәй районының Ҡыҙыл Юл ауылында тыуып үҫтем. Беҙҙең ауылдан барлыҡ ирҙәр һуғышҡа китте, күбеһе ҡайта алмай яу яланында ятып ҡалды. Кире ҡайтҡандары ла оҙаҡ йәшәй алманы. Улар тормоштоң ҡәҙерен белде, яугирҙәр һөйләгән тарих иҫ китмәле ҡыҙыҡлы һәм аяныслы ине. Ватаныбыҙҙың азатлығы өсөн ғүмерен биргән совет кешеләре ҙур хөрмәткә лайыҡ. Хәрби хәрәкәттәрҙә ҡатнашҡан, унда һәләк булып ҡалған бер һалдат та онотолмаҫҡа, улар тураһында мәғлүмәттәр асыҡланырға тейеш.
Башҡортостан халҡына был башланғысты аҙағына еткереүҙе һәм тарихи дөрөҫлөккә өлгәшеүҙе теләйем.”


* * *

“Миңлеғәле Шайморатов, һис шикһеҙ, Рәсәй Геройы исеменә лайыҡ. Ул беҙҙең яҡтарҙа һуғышҡан саҡта һәләк булған. Украина халҡы уның батырлығын онотмай һәм ҡәҙерләп һаҡлай. Беҙҙә хәҙер уның исемендәге аллея бар, таҡтаташ ҡуйылған. 23 февралдә — Ватанды һаҡлаусылар көнөн байрам иткән саҡта — уның таҡтаташына сәскә һалдыҡ, матур кисә ойошторҙоҡ. Акцияға Башҡортостан халҡы ғына түгел, күрше төбәктәр һәм сит илдәрҙең дә ҡушылыуы ҡыуаныслы хәл, уны еренә еткерерһегеҙ тип ышанам. Миңлеғәле Шайморатов тураһындағы хәтер — мәңгелек.