Ғәзиз Ғәлинде Башҡортостан юлдаш телевидениеһы яңылыҡтары аша беләбеҙ. Тик һуңғы ваҡытта уның ҡыҙыҡлы сюжеттары сыҡмай, тип аптырайҙыр тамашасылар. Сәбәбе – шаулы, өмөтлө, ымһындырғыс Өфөнө ҡалдырып, Ғәлиндәр Ғәзиздең тыуған төйәгенә – Ишембай районының Урман-Бишҡаҙаҡ ауылына – ҡайтып төпләнде.


Эйе, хәҙерге йәштәрҙең күбеһе ҙур ҡалаға, гөрләп торған тормошҡа ашҡына. Райондарҙан – Өфөгә, унан – ҙурыраҡ ҡалаларға, артабан инде сит илгә күсеп китеү ғәҙәтигә әйләнә бара. Бына ошондай глобалләшеү ваҡытында ауылға ҡайтып төпләнгән ғаиләләрҙең осрауы ҡыуаныслы: кемдер кендек ҡаны тамған ерҙә тормошто дауам итергә тейештер бит!
– Башҡаларға ғына түгел, ҡапыл ҡубып сығып китеүебеҙ үҙебеҙ өсөн дә сәйер һәм көтөлмәгәнсә булды, – тип хәтерләй ул мәлде Лилиә. – Күрәһең, сабыйҙарыбыҙ­ҙың ризығы тартҡандыр. Үҙем дә алыҫтан түгел – Стәрлетамаҡ ҡалаһынан.
Ҡапыл ғына булһа ла, сәбәпһеҙгә йөрөмәй әҙәм балаһы. Был хәҡиҡәт ғаилә башлығының яуабында ла сағылды.
– Иртән эшкә киткәнемдә балалар йоҡлап ҡала, кис ҡайтып инһәм, тағы “әүен баҙары”на киткән булалар. Сабый­ҙа­рымдың нисек үҫкәнен дә күреү мөмкинлеге юҡ ине, – тип хәтерләй Ғәзиз баш ҡалалағы тормошон. Хәйер, бер Өфөлә генәме ни, бөтөн ерҙә тормош артынан ҡыуабыҙ, мал-бол, эш тип сабабыҙ, ә бына балаларҙың үҫкәнен, атай-әсәйҙең өлкәнәйгәнен, көн менән төн түгел, хатта миҙгелдәрҙең алмашынғанын да күрмәйбеҙ төҫлө. Дөрөҫөрәге, быға өлгөрмәйбеҙ.
...Өфөлә, әлбиттә, шарттар бүтәнсә: теләһәң, ғаиләң менән театрға бар, кәрәк икән, балаларҙы төрлө түңәрәктәргә йөрөтөргә була. Әммә был ғаиләләге сабыйҙар хәҙер шуныһы менән бәхетле: иртән тороуға уларға Торатау йылмая, өләсәй иртәнге һөт менән һыйлай һәм саф һауаны кинәнеп һулайһың!
Йән биргәнгә йүн биргән. Йәштәр ҡайтыу менән хеҙмәт урыны табыла, дөрөҫөрәге, уңған белгестәрҙе эш үҙе “ҡармаҡҡа ҡаптыра”: Ғәзиз Стәрлетамаҡтағы коррекция мәктәбендә белем бирһә, Лилиә Урман-Бишҡаҙаҡта уҡыта. Ер алып, өй һалып, хәҙер йорт туйларға йыйына Ғәлиндәр. Ғаиләнең күсеп ҡайтыуы бигерәк шуныһы менән бәрәкәтле: Өфөлә донъяға яралған һәм тәпәй атлап киткән Гөлсөм менән Исмәғил, Ишембайға күскәс, бер юлы ҡустылы ла, һеңлеле лә була. Бәләкәй Зөлфиә һәм Муса хәҙер инде ата-әсәһен, олатай-өләсәйҙәрен “алдаштырырға” эшкингән: береһенән-береһе шуҡ!
– Йәй бергәләп велосипедта елдерәбеҙ, тышта уйнайбыҙ, ғөмүмән, мәж киләбеҙ. Ауылда торһаҡ та, эштән ҡайтҡас, ғаилә менән аралашырға, балаларҙы тәрбиәләшергә ваҡыт ҡала – шуныһына ҡыуанам, – ти Ғәзиз.
Ә Лилиә:
– Ҡәйнәм менән ҡайныма рәхмәт: ейән-ейәнсәрҙәрен ҡарашалар, уларһыҙ эшкә сығып та булмаҫ ине, – тип өҫтәй.
Гөлсөм мәктәптә уҡыһа, Исмәғилдең әле саҡ хәреф танырға өйрәнгән ваҡыты. Игеҙәктәрҙең иһә кинәнеп уйнар мәле. Төрлө йәштә булһалар ҙа, балаларҙың шул яғы күҙгә ташлана: бер-береһе өсөн өҙөлөп тора улар. Тырыш үҙҙәре, матур итеп йырлайҙар, бейейҙәр. Ғөмүмән, рухлы, белемле, тәрбиәле булып үҫәләр.
Ишембай районы.