Башҡортостандың ғаилә, хеҙмәт һәм халыҡты социаль яҡлау министры Ленара Иванова төбәктәге әүҙем ҡартлыҡтың иң яҡшы өлгөләре хаҡында һөйләне.
Өфөлә уҙғарылған “Граждандар баш­лан­ғысы” милли премияһының төбәк этабы лауреаттарын һәм номинанттарын бүләкләү тантанаһы, илдә граждандар йәмғиәтен үҫтереү йәһәтенән алдынғыларҙың береһе булараҡ, республикабыҙҙың әһәмиәтен раҫланы. Йәмғеһе 120 граждан һәм социаль әһәмиәтле башланғыс төбәк этабына һайлап алыу конкурсында ҡатнашырға теләк белдерҙе. Һөҙөм­тәлә республика егерме ике төбәк араһында тәүге өсәү иҫәбенә инде. Апрелдә баш ҡала­быҙҙа үткән “Берләшмә” форумы йомғаҡтары буйынса төбәктәге әүҙем ҡартлыҡ өлкәһендәге белем биреү практикалары хаҡында хәбәр иткәйнек инде. Ошо теманың дауамы булараҡ, Ленара Иванова Башҡор­тостанда был йәһәттән тағы ла ниндәй саралар күрелеүе тураһында белдерҙе. Баҡтиһәң, был өлкәлә дәүләт программалары нигеҙендә тотош башланғыстар комплексы ғәмәлгә ашырыла икән.
Министр әйтеүенсә, бөгөнгө өлкән быуын – дәүләтебеҙҙең әүҙем, аҡыллы, көр күңелле һәм талапсан граждандары. Уларҙың сафы даими тулыланғанға күрә, 2025 йылға тиклем иҫәпләнгән Рәсәй Федерацияһында өлкән быуын граждандары мәнфәғәтендәге ғәмәлдәр стратегияһы эшләнде һәм раҫланды. Уның төп маҡсаты – ололарҙың ғүмер оҙайлылығын арттырыу, йәшәү кимәлен һәм сифатын күтәреү. Башҡортостан Республикаһында ошо стратегияны ғәмәлгә ашырыу йәһәтенән 2016 – 2020 йылдарға иҫәпләнгән саралар планы төҙөлдө.
Республикала өлкән быуынға ярҙам күрһәтеүгә йүнәлтелгән башланғыстар иҫәбен­дә министр түбәндәгеләрҙе билдәләне:
lсоциаль туризмды үҫтереү (республика программаһына ярашлы);
lурындағы үҙидара органдарының саралар комплексы: күмәк мәҙәни саралар, экскурсиялар, туҡыу сәнәғәтен, ғәрәп телен өйрәнеү, хорҙа йырлау кеүек йүнәлештәр буйынса өҫтәмә белем биреү;
lреспубликала социаль хеҙмәтләндереүҙең инновациялы алымы – өлкән йәштәге граждандарҙы тәрбиәгә алыусы ғаилә институтын үҫтереү;
lстационар социаль хеҙмәтләндереү учреждениеларында ҡул эше (тегеү, сигеү, көршәк яһау, һүрәт төшөрөү), художество үҙешмәкәрлек, уйын спорты төрҙәре, скандинав йөрөшө кеүек шөғөлдәр клубын, шулай уҡ малсылыҡ, баҡсасылыҡ, үҫемлекселек буйынса хеҙмәт терапияһы практикаһын ойоштороу;
lреспублика һәм зона спорт ярыштары, художество үҙешмәкәрлек конкурстары, шаяндар һәм тапҡырҙар клубтары;
lстационар учреждениеларҙа “Изге ихтыяр-I” (эске ирекмәндәр хәрәкәте), “Гармонияға юл”, “Ҡулдарҙан ҡыуанайыҡ”, “Музыкаль калейдоскоп” һәм башҡа программаларҙы тормошҡа ашырыу;
lстационар учреждениелар эшмәкәрлеге нигеҙендә хәстәрлек мәктәптәрен ойоштороу;
lреспубликала мобиль бригадалар, социаль поликлиникалар, социаль ашханалар, социаль такси, техник реабилитация сараларын прокатҡа биреү пункттарының эше;
lтөбәктә гериатрия ярҙамын үҫтереү (Башҡортостандың Ғаилә, хеҙмәт һәм халыҡты социаль яҡлау менән Һаулыҡ һаҡлау министрлыҡтарының берлектәге “Хәстәрлек биләмәһе” пилот проекты);
lсоциаль ярҙам саралары буйынса интерәүҙем онлайн-консультант (“Өлкән быуын граждандарының йәшәү сифатын яҡшыртыу өлкәһендәге төбәк программаһы” номинацияһында А.П. Починок исемендәге премияға Бөтә Рәсәй төбәктәрҙе үҫтереүҙең социаль программалары конкурсы лауреаты): проекттың авторы һәм төҙөүселәренең береһе – Республика халыҡҡа социаль ярҙам үҙәге директоры Николай Калмацкий.
– Тәрбиәгә алған ғаилә моделе оло йәштәге яңғыҙ кешеләргә, даими ярҙамға мохтаж инвалидтарға ғаилә йылыһы бүләк итә, хәстәрлек сығанағы булып тора, социаль яңғыҙлыҡты иҫкәртеү, үҙ-ара ярҙам күрһәтеү мөмкинлеген бирә, – тине Ленара Иванова, республикала социаль хеҙмәтләндереүҙең инновациялы алымдарының береһенә аңлатма биреп.
Әйткәндәй, социаль хеҙмәтләндереүҙең был алымы 2016 йылда “Башҡортостан Республикаһында өлкән йәштәге граждандар һәм инвалидтар өсөн тәрбиәгә алыусы ғаиләләр тураһында”ғы Закон нигеҙендә ғәмәлгә индерелде. Ленара Иванова әйтеүенсә, әле өлкәндәргә рухи ярҙам күрһәтеүгә, уларҙы йәмәғәт тормошона, социаль-мәҙәни эшмәкәрлекккә йәлеп итеүгә, яңы социаль-иҡтисади шарттарға яраҡлаштырыуға ҙур иғтибар бирелә.
“Башҡортостан Республикаһы халҡын социаль яҡлау” дәүләт программаһының “Өлкән быуын” ярҙамсы программаһын тормошҡа ашырыу буйынса бурыстарҙы үтәү маҡсатында республикала 2011 йылдан “Өлкән быуын халыҡ университеты”нда оло йәштәгеләрҙе уҡытыу ойошторолған.