Раевка ҡасабаһы эргәһендә яңы ҡалҡып сыҡҡан биҫтәлә бер йорт алыҫтан уҡ күркәм булып күренеп тора. ”Был егет дәүләт ярҙамы алмаһа ла, өй һалып сығыр ине. Торғаны менән ут бит ул, тырыш”, – ти ауылдаштары йорт хужаһы Алмаз Йәнекәев хаҡында.
Бѳгѳн тѳҙѳлѳш алып барыуҙың ни тиклем ҡиммәткә тѳшкәнен ошо мәшәҡәтле эш менән булышмағандар ғына белмәй. Беҙ ҙә был ғаилә менән танышҡас, уларҙың бар яҡлап бөтмөр, уңған булғанын аңланыҡ. Йәнекәевтәр әгәр ҙә ”Бюджет хеҙмәткәрҙәренә торлаҡ тѳҙѳү”дәүләт программаһында ҡатнашмаһа, уларға ла ҡыҫҡа ваҡытта ѳй һалып сығыуы ауырға тѳшѳр ине.
– Ѳйләнешкәс, фатир яллап йәшәнек. Тѳҙѳлѳш ѳсѳн ерҙе аукцион аша һатып алдыҡ. Дуҫ егеттәр программа буйынса субсидия алғайны. Уларҙан күреп, беҙ ҙә документ йыйып тапшырҙыҡ. Сиратта өс йыл самаһы торғандан һуң, 2014 йылда 947 мең һум күләмендә субсидия алыуға өлгәштек. Аҡсаны тѳҙѳлѳш материалдарын алыуға тотондоҡ, ә тѳп эште үҙебеҙҙең кѳс менән атҡарып сыҡтыҡ. Йорт һалыуҙа туғандарыбыҙҙың да ярҙамы ҙур булды. Ѳмәләр ойошторҙоҡ, – ти Алмаз Самат улы.
Ғаилә башлығы сығышы менән Ибрай ауылынан. Бала саҡтан спорт менән шѳғѳлләнгән егет мәктәпте тамамлағас, Стәрлетамаҡ физик культура техникумында уҡырға инә. Һуңынан ошо һѳнәр буйынса юғары белем ала, ил алдындағы хәрби бурысын үтәй. Былтыр икенсе юғары белемгә эйә булған – Башҡорт дәүләт университетының тарих факультетын тамамлаған.
Алмаз Самат улы хеҙмәт юлын Стәрлетамаҡ районының “Рощинский” совхозы ауылы мәктәбендә уҡытыусы булып башлай. Бер йылдан һуң Раевка спорт мәктәбенә тренер-уҡтыусы булып күсә. Әлеге ваҡытта гимназияла уҡытыусы булып эшләй, шулай уҡ спорт мәктәбендә тренер.
Балаларҙы тәрбиәләү менән генә сикләнмәй, ул үҙе лә спорт менән ныҡлап шѳғѳлләнә. Кѳрәш, саңғы, велосипедта уҙышыу кеүек ярыштарҙа әүҙем ҡатнашып, яңынан-яңы еңеүҙәр яулай. 2016 йылда Урал кубогы ярышында – беренсе, былтыр йылда Пермь ҡалаһында уҙған Рәсәй чемпионатында икенсе урын да алған. Ғѳмүмән, Алмаз спорт мастеры исемен лайыҡлы йѳрѳтә.
Тормош иптәше Фидәлиә Дәүләкән районы Дүртѳйлѳ ауылынан. Ул Ѳфѳ урман техникумын, Башҡорт дәүләт аграр университетын тамамлаған. Әле Әлшәй урмансылығында эшләй.
Алмаз менән Фидәлиәнең ауылдары бер-береһенән ѳс саҡрым алыҫлыҡта ғына урынлашҡан. Шуға улар бала саҡтан танышып, дуҫлашып йөрөй. 2010 йылда өйләнешергә ҡарар итәләр. Ғаиләгә йәм өҫтәп, ҡыҙҙары Асель һәм Самира үҫеп килә. Әле өсөнсө сабыйҙарын кѳтәләр.
– Тормош иптәшем тырыш, яуаплы, балаларҙы ярата һәм тәрбиәләшә. Ѳйѳбѳҙҙә бѳтә уңайлыҡтарҙы булдырҙы ул. Ѳфѳ ҡалаһы хакимиәте башлығы исеменә уҙғарылған ярышта ҡатнашып, беренсе урын алғайны. Еңгән ѳсѳн бирелгән бүләк аҡсаһына аш бүлмәһенә мебель алып ултыртты, - ти Фидәлиә.
– Матур итеп кухня эшләп биргәс, хәҙер кәләш аш бүлмәһенән сыҡмайса беҙҙе тәмле аштар менән һыйлай, баҡсала ла тәртип урынлаштырып ѳлгѳрә, – тип бәхетле йылмая Алмаз.

Әлшәй районы.