Бәләбәй районының Малиновка ауылында йәшәүсе тоғро дуҫыбыҙ, ышаныслы иптәшебеҙ Мәғдән Камалетдин улы Саҙретдиновты 60 йәшлек күркәм юбилейы менән ихлас ҡотлайбыҙ!
Ябай ҙа, кешелекле лә, ғәҙел дә Бәләбәй егете менән яҡындан танышып, бына нисәмә йылдар бер-беребеҙҙең хәлен белешеп, көйөнөс-һөйөнөстәрҙе уртаҡлашып, аралашып йәшәүебеҙгә бик шатбыҙ. 1986– 1988 йылдарҙа ғүмерҙең алтынға бәрәбәр, матур бер өлөшөн, ҡабатланмаҫ сәмле, дәртле йәшлек йылдарын Свердловск юғары партия мәктәбендә уҙғарыу һәммәбеҙ өсөн дә мәңгегә иҫтә ҡалырлыҡ гүзәл мәл булды. Ошо дуҫлыҡ, берҙәмлек уты йылдар үткән һайын һис һүрелмәй, киреһенсә, баҙыҡланып, ялҡынланып көсәйгәндәй генә.
“Ғүмер юлы — ауыр, оҙайлы юл,
Зауыҡлы юл — йәшәй белгәнгә”...
Шағирәнең был тапҡыр шиғри юлдарында тап Мәғдән Камалетдин улы менән ҡатыны Фәһимә Сәғит ҡыҙы тураһында әйтелгән төҫлө. Нисәмә йыл ҡулға-ҡул тотоношоп, аңлашып йәшәү, ҡыҙ һәм улдарын оло тормош юлына сығарыу, ейән-ейәнсәрҙәре менән аралашыу һөйөнөсө, районда төрлө вазифаларҙы намыҫ менән башҡарыу — барыһы ла ихтыяр көсөн, күңел киңлеген, донъянан йәм табып йәшәү һәләтен талап итә. Әле дуҫыбыҙ — райондың халыҡты эш менән тәьмин итеү үҙәге директоры.
Ысын иптәш, бына тигән ғаилә башлығы, ярҙамсыл һабаҡташыбыҙҙы оло юбилейы менән ҡайнар ҡотлап, уға ныҡлы һаулыҡ, йәшәү дәрте, бик күп аяҙ, сыуаҡ көндәр теләйбеҙ. Юбилейың ҡотло булһын, Мәғдән Камалетдин улы!