2017 йыл йомғаҡтары буйынса, Башҡортостан Волга буйы федераль округы төбәктәре араһында балаларҙы һауыҡтырыу лагерҙарында ялға йәлеп итеү йәһәтенән алдынғы урынға сыҡты. Былтыр йәйге һауыҡтырыу кампанияһы осоронда республикабыҙҙа 2 604 лагерь эшләгән һәм уларҙа мәктәп йәшендәге 189,1 мең бала ял иткән, һаулығын нығытҡан.

Мәғлүм булыуынса, ҡаланан ситтәге лагерҙар – иң һөҙөмтәле ял һәм һауыҡтырыу алымдарының береһе. Балалар лагерын һайлағанда тәү сиратта нимәгә иғтибар итергә һуң? Йәйге ял башланып ҡына тора, шуға күрә “Роспот­ребнадзор”ҙың Башҡортостан идара­лығы белгестәренең кәңәше ата-әсәләр­гә файҙалы булыр тигән ниәттәбеҙ.
Иң элек сменаның оҙайлылығын күҙалларға кәрәк. Ул кәмендә 21 көн булырға тейеш. Ошо ваҡыт эсендә генә балала мәктәп программаһын уңышлы үҙләштереү, уҡыу йылы дауамында төрлө сирҙәргә ҡаршы тороу мөмкинлеген биргән көс-ҡеүәт туплана.
Лагерҙың хәүефһеҙлек талаптарына яуап биреүенә инанығыҙ. Уның Рәсәй Федерацияһы субъектындағы ял итеү һәм һауығыу өсөн тәғәйенләнгән балалар ойошмалары реестрына индере­леүе, муниципаль район йәки ҡала округы комиссияһы тарафынан эшкә ҡабул ителеүе шарт. Лагерҙың дәүләт санитария-эпидемиология ҡағиҙәләренә һәм нормативтарына тап килеүе санитария-эпидемиология һығымтаһы менән раҫлана. Әйткәндәй, санитария-эпидемиология һығымтаһы бер йыл дауамында ғына ғәмәлдә була. Бындай документ юҡ икән, тимәк, һауыҡтырыу ойошмаһының эшмәкәрлеге законһыҙ.
Лагерҙа хәүефһеҙлек шарттарын тәьмин итеү өсөн үҙәкләштерелгән һалҡын һәм эҫе һыу бүлеү системаһы, йыһазландырылған йоҡо корпустары, сифатлы туҡландырыу булырға, медицина хеҙмәттәре күрһәтелергә, бүл­мәләрҙә һәм учреждение биләмәһендә дезинфекция, дезинсекция һәм дератизация кеүек саралар үткәрелергә тейеш.
Белгестәр әйтеүенсә, һауыҡтырыу учреждениеһында буш ваҡыттың нисек ойошторолоуын, көн тәртибен алдан уҡ асыҡлау зарур.
Лагерҙағы педагогтар, эшмәкәрлек программаһы тураһында мәғлүмәт алыу ҙа артыҡ булмаҫ.
Балалар араһында сирлеләр бул­маһын өсөн улар табиптың тейешле һығымтаһы, прививкалар тураһындағы мәғлүмәттәр, инфекциялы ауырыуҙар менән аралашмау хаҡындағы белешмә ҡағыҙы нигеҙендә ҡабул ителә.
– Ялды ойоштороу буйынса хеҙмәт күрһәтеүҙәре тураһындағы килешеүгә ҡул ҡуйғанда уның тексын ентекләп уҡып сығығыҙ, күрһәтелгән хеҙмәттәр исемлегенә, уларҙың хаҡына иғтибар итегеҙ. Балағыҙға лагерҙа кәрәкле әйберҙәр исемлеген төҙөргә онотмағыҙ. Бындай иҫкәрмә ойоштороусыларҙа булырға тейеш, – тип кәңәш бирә “Роспотребнадзор”ҙың Башҡортостан идаралығы белгестәре.
Мөмкинлектәре сикләнгән балалар лагерға табиптың рөхсәте менән генә ҡабул ителә. Был осраҡта лагерь етәксе­һенә һәм медицина персоналына алдан хәбәр итеү шарт. Шул уҡ ваҡытта ата-әсә лагерҙа балаһы өсөн тейешле шарттарҙың булыу-булмауын асыҡларға тейеш.
Дөрөҫ һайланған һауыҡтырыу учреждениеһында балағыҙ рәхәтләнеп ял итер, сағыу тәьҫораттар, тәжрибә туплар, иң мөһиме – һаулығын нығытыр.