Ошо көндәрҙә редакциябыҙға Ырымбур өлкәһе Һарыҡташ районының Түбәнге Аҫҡар ауылында йәшәгән Дәүләтбай Алтынсуриндан сетерекле бер хат килеп төштө. “Балаларҙың үҫеп еткәнен һиҙмәй ҙә ҡалабыҙ, ғәзиздәребеҙ иһә ҡанат сығарғас, йыраҡҡа осоп китә. Һәр кем үҙенсә тәрбиә бирергә тырыша уларға, күп ата-әсә илебеҙгә бынамын тигән шәхестәр биргәненә ҡыуанам. Ҡыҙғанысҡа ҡаршы, балаларҙың төрлөһө бар. Берәҙәктәрҙең күбәйеүе һағайта. Шытымлы орлоҡтар ғаиләлә генә була, ә бүтән ерҙә түгел. Ни өсөн шулай килеп сыға һуң? Һарыҡташ ҡасабаһына барғанда, бер төркөм үҫмерҙең тәртип боҙоп йөрөүен күреп борсолдом, йәнем әрнене. Башҡортостанда хәлдәр нисек икән? Йәш быуындың, милләттәштәремдең яҙыҡ юлға баҫыуын теләмәйем”, – тип яҙып һалған республикабыҙҙан ситтә ғүмер иткән ағай.

Башҡортостан етәкселегенең ғаилә институтын нығытыу өсөн етди эштәр башҡарыуы, бер нисә йылға иҫәпләнгән программалар ҡабул итеүе, күп сығымдар бүлеүе маҡтаулы. Республика Башлығы Рөстәм Хәмитов тиккә генә йәш быуынға айырым иғтибар йүнәлтмәй. “Бигерәк тә йәштәребеҙгә айырым рәхмәт һүҙҙәрен еткерге килә, сөнки улар – киләсәгебеҙ. Йәштәр дәүләтебеҙҙең өр-яңы йөҙөн бил­дәләй”, – тип йыш ҡабатлай Рөстәм Зәки улы.
Студенттарҙы ғына алып ҡарағанда ла, был асыҡ сағыла. Алдынғыларға дәүләт стипендиялары түләнә, социаль стипендияларҙың күләме лә ҙур ғына. Ысынлап та, йәштәргә белем эстәү, бер үк ваҡытта эшләү өсөн ҙур мөмкинлектәр асылды.
Рәсәйҙә иһә 18 йәшкә тиклемге балалар яҡынса 28 миллион тирәһе (илебеҙҙә 150 миллионға яҡын кеше бар) иҫәпләнә. Күпме алмаш үҫеп килә! Шатланырға кәрәк тә бит! Уның ҡарауы, ямғырҙан һуң баш ҡалҡытҡан бәш­мәктәр шикелле, йылдан-йыл тыуған йортон иркен урамға алмаштырырға мәжбүр үҫмерҙәрҙең күбәйеүе кемдәрҙе генә борсоуға һалмай – ул хатта ки социаль проблемаға әйләнде. Билдәле сығанаҡтарҙан алынған мәғлүмәттәр буйынса, һәр 50-се малай һәм ҡыҙ билдәһеҙ яҙмыш ҡосағына тапшырылып ҡуйылған, ти ғалимдар.
Берәҙәктәр тураһында иһә төрлө имеш-мимеш йөрөй. Рәсәйҙә 1,5–2 миллион тирәһе шундайҙар иҫәбендә, ә дөрөҫ һанды белеү өсөн ошоно икегә ҡабатларға ҡуша статистар. Шуны ла онотмайыҡ, был рәсми һандар, улар, әлбиттә, ысынбарлыҡтан бик йыраҡ тора, эйе, ә иҫәпкә ҡуйылмағандары күпме! Ундайҙар, бармаҡҡа ҡаҙалған шырау шикелле, ғүмер буйы йәмғиәтте артҡа һөйрәгән. Һүҙ ҙә юҡ, ил етәкселеге был мәсьәләгә күптән йөҙ менән боролған.