Яңыраҡ Салауат районының Тәкәй ауылы нигеҙендә ҡоролған таш тирмәлә батырыбыҙ, шағирыбыҙ Салауат Юлаевҡа иҫтәлекле таш асылыуы тураһында хәбәр иткәйнек инде. Был хәтер акцияһы Бөтә Рәсәй башҡорт йәштәре ҡоролтайы, Башҡортостан Диниә назаратының йәштәр бүлеге, “Салауат Юлаев” вариҫтары ойошмаһы һәм Әлкә ауыл биләмәһе хакимиәте ярҙамында уҙғарылғайны.

Сибайҙан алып килгән гранит­ҡа Салауат Юлаевтың шиғыр юлдары яҙылған: “Юҡ, мин үлмәнем, башҡорттар!” Был таш батырҙың рухы ҡайтыуға ишара төҫлө булды.
Уҙған аҙнала ла милли геро­йыбыҙға арнап был төбәктә матур саралар үтте. Башта Бөтә Рә­сәй Башҡорт йәштәре ҡорол­тайы рәйесе Ринат Рамаҙанов етәк­селегендәге “Арғымаҡ” төркө­мө Әлкә ауылында ҙур концерт ҡуйҙы. Аҙаҡ инде йыйылған халыҡ, балалар бергәләп таш тирмәгә барып, ҡурайҙа уйнап, ба­тырҙың шиғырҙарын яттан һөйләне. Әйткәндәй, яҙмалар Интернетта социаль селтәрҙәргә ҡуйылған. Унда мәктәп уҡыусы­ларының рухланып, үҙҙәрен батыр вариҫы итеп тойоп шиғыр уҡыуы күҙгә ташланып тора.
Ошо уҡ көндә Салауат райо­нында бурысын үтәгәндә һәләк булған хәрбиҙәргә, сираттағы ҡа­ҙаныштарына өлгәшергә ын­тыл­ғанда һәләк булған спорт­сыларға бағышланған “Йөрәк хәтерләй...” тип аталған спорт фестивале уҙҙы. Сараның төп маҡсаты – Баш­ҡортостан йәштәрен ватан­сы­лыҡ тойғоһонда тәрбиәләү, ҡаһармандарҙы иҫкә алыу. Фес­тивалдә туристик, эҙәрмән, хәрби-патриотик клубтарҙа шөғөл­ләнгән, секцияларға йөрөгән 12 – 18 йәшлек балалар ҡатнашты. Бында байрамға килгән халыҡ, йәштәр алдында сығышы менән Салауат районынан булған Азат Шаһмөхәмәтов етәкләгән Рәсәй Милли гвардияһының өлгөлө-күрһәтмә симфоник оркестры, “Арғы­маҡ” төркөмө концерт күр­һәт­те. “Салауат Юлаев вариҫ­тары” ойошмаһы рәйесе Виктор Хәкимов фестивалдә ҡатнашыу­сы­ларға Салауат районы тарихы хаҡында һәм Башҡорт ырыуҙары китаптарын бүләк итте. М. Аҡ­мулла исемендәге Башҡорт дәүләт педагогия университеты студенты Ислам Төхвәтуллин ҡунаҡтарға Ш. Бабичтың, Р. Ға­риповтың Салауат Юлаевҡа арналған шиғырҙарын тетрәндер­гес итеп яттан һөйләне.
Ә инде Музейҙар төнөндә барса халыҡ Салауат Юлаевтың музейына юлланды. Бина алдында ла халыҡҡа батырҙың шиғырҙары уҡылды, уға бағышлап телмәр то­толдо. Иң тулҡынландырғыс мәл алда булған: бер мәл музей эсенән Салауат батыр образы сығып халыҡҡа васыятын еткерҙе...