Беҙҙең ҡасабала Темәс интернатының Түбә өлкән йәштәгеләрҙе һәм инвалидтарҙы яҡлау үҙәге, үҙебеҙсә әйткәндә, ҡарттар йорто эшләп килә. Үҙәктә ниндәй генә кеше юҡ: ғүмере буйы тир түгеп, ҡартлыҡ көнөндә кеше ярҙамына мохтаж өлкәндәр, ауырып һаулығын юғалтҡан йәшерәктәр менән күреүҙән мәхрүм ҡалғандар, ҡул-аяғы зәғифләнеп йөрөй алмағандар. Йорт-ерһеҙҙәр, урамға сығарып ташланғандар ҙа ошо йортта һыйыныр урын тапҡан.

Бөтә уңайлыҡтар булдырылған бүлмәләрҙә дүрт-биш кеше йәшәй. Беренсе ҡаттағы ике бүлмәлә генә йөрөй алмағандарҙы ҡарау уңайлы булһын өсөн күберәк урын-карауат ҡуйылған. Аҫҡы ҡаттағы ҡунаҡ бүлмәһендә ҙур экранлы телевизор тора, уны йомшаҡ диван, кәнәфиҙәргә ултырып ҡарарға мөмкин. Ике йөҙгә яҡын лазер дискта кино тупланған. Туғандар хәл белергә килһә, ошонда уҡ осрашып, һөйләшеп ултырабыҙ. Янда ғына медицина пункты бүлмәһе бар. Ауырыуҙарҙы шәфҡәт туташы Гөлминиса Үҙәнбаева ҡарай.
Ошо ҡатта уҡ заман талаптарына ярашлы йыһазландырылған аш бүлмәһе менән ашхана урынлашҡан. Туҡланыу бер сменала ойошторолған, йөрөй алмағандарҙы санитаркалар үҙҙәре ашата. Беҙҙе тәмле аштары менән һыйлаған ашнаҡсылар һәм аш бүлмәһе хеҙмәткәрҙәрен дә атайым: Фәниә Мәҡсүтова, Гөлназ Боҫҡонова, Гөлнәзирә Таһирова, Рәүилә Аслаева. Уларҙың тырышлығы менән көнөнә дүрт тапҡыр туҡланабыҙ. Рацион бик бай, ашты һәр ваҡыт төрләндереп бешерәләр.
Ә инде үҙәктә иң ауыр йөк (беҙҙе ашатыу, тәрбиәләү) санитаркалар Мәҙүнә Ишниязова, Регина Яхина, Айһылыу Әхмәтова, Рәзилә Абдуллина, Венера Мусина, Эльвира Баҡыева, Розалиә Әхмәтова, Марина Ишкова, Валя Кишкина, Гөлсәсәк Йәнтүрина иңенә төшә. Улар алмашлап бөтә бүлмәләрҙе йыуып сыға, көн һайын йөрөй алмаған ауырыуҙарҙың түшәген алмаштыра.
Вахтерҙар Әхтәр Мәмбәтҡолов, Исмәғил Әхмәтов, ҡарауылсылар Булат Рәхмәтуллин, Илдус Байназаров ғүмеребеҙ һағында тора, тәртип һаҡлай. Берәй ауыр хәл килеп сыҡһа, шунда уҡ килеп етәләр. Кер йыуыусы Миңһылыу Ғәйнуллина тырышлығы арҡаһында өҫтөбөҙ бөтөн, таҙа түшәктә йоҡлайбыҙ. Хужалыҡ эшсеһе Ринат Хәлитов мунса яғып ҡуя, башҡа эштәрҙе башҡара.
Өҫкө ҡаттағы ҙур залда китапхана урынлашҡан. Китап фонды — меңдән ашыу дана. Ошонда уҡ бөтә байрам саралары үткәрелә. Һәр береһендә концерт күрһәтелә. Уҙған йыл Байыш, Һаҡмар ауылдары, Баймаҡ ҡала мәҙәниәт йортоноң үҙешмәкәр артистары сығыш яһаны. Ә Темәс интернаты үҙешмәкәрҙәре Темәс — Түбә юлына саң ҡундырмай. Бигерәк тә “Овация” төркөмөн билдәләп үтке килә.
Үҙәктә 54 кеше йәшәй. Иң олоһона быйыл 90 тулһа, кесеһенә 48 йәш. Күптәре 80-де үткән “һуғыш балалары”. Уларҙың бала сағы ауыр йылдарға тура килгән. Байтағы әле лә ауырыуға, ҡартлыҡҡа бирешмәй дәртләнеп йәшәй. Коллективҡа Руслан Хәмитов етәкселек итә.

Баймаҡ районы,
Түбә ҡасабаһы.