Бынан ҡырҡ йыл элек Сермән ауылында Нәзифә менән Риф Аҙнабаевтарҙың ғаиләһендә төпсөк малай булып донъяға килә Ғәҙел. Яҙ миҙгелендә тыуғанғамы, ул алсаҡ, ярҙамсыл, кеселекле булып буй еткерә.

Ул мәктәп йылдарында уҡ спорт менән дуҫ була. Саңғы ярыштарында ла, еңел атлетикала ла алдынғылыҡты бирмәй. Шуға күрә лә 1995 йылда Белорет районының Сермән мәктә­бендә XI класты тамамлағас, күп уйлап тормай, Стәрлетамаҡ физкультура техникумына уҡырға инә. Уны уңышлы тамамлап, диплом алып, тыуған яғына эшкә ҡайта. Студент сағында уҡ йәйге ялында “Ағиҙел” турбазаһында спорт буйынса өлкән инструктор булып эшләгән егетте Боғанаҡ мәктәбендә ҡуш ҡуллап ҡаршы алалар. Физкультура дәрестәре менән бер рәттән IX кластың класс етәксеһе итеп тә тәғәйенләйҙәр.
Уҡыусылар менән тиҙ уртаҡ тел таба, кис мәктәп ихатаһында волейбол, баскетбол уйнауҙар уларҙы тағы ла нығыраҡ дуҫлаштыра. Боғанаҡта Ғәҙелгә оҙаҡ эшләргә тура килмәй: 1997 йылда уны хәрби хеҙмәткә саҡыралар. Тәүҙә Алыҫ Көнсығышта, һуңынан Белогорскиҙа зенит-ракета полкында хеҙмәт итә. Хеҙмәт юлын рядовой, алты айҙан һуң кесе сержант, сержант, өлкән сержант булып үтә. Армиянан старшина званиеһында ҡайта. Өлгөлө хеҙмәте өсөн бихисап Маҡтау ҡағыҙҙары, күкрәк знактары менән наградлана.
Армиянан ҡайтҡас, хеҙмәт юлын Белорет ҡалаһында тикшереү изоляторында кесе инспектор-корпус бүлеге начальнигы булып башлай. Бер йыл эшләгәндән һуң, һайлаған һөнәренә өҫтөнлөк биреп, Сермән мәктәбенә эшкә ҡайта. 2002 йылдан бөгөнгә тиклем физкультура уҡытыусыһы булып эшләй. Хеҙмәт осоронда ул үҙен яҡшы яҡтан ғына күрһәтте.
Ғәҙел Риф улының көндәлек күнекмәләре арҡаһында Сермән мәктәбе спортсылары йүгереү буйынса ла, саңғы ярыштарында ла беренселекте бирмәй. Шығайҙа Советтар Союзы Геройы Шаһи Ямалетдинов иҫтәлегенә үткәрелгән эстафеталарҙа ла Ғәҙелдең уҡыусылары һәр ваҡыт алдынғы сафта. Ул уҡыусыларын спорт менән бергә көслө, ныҡышмал булырға, Тыуған илде яратырға өйрәтә.
Әлеге ваҡытта Ғәҙел Риф улы Аҙнабаев — юғары категориялы уҡытыусы, уҡытыусыларҙы аттестациялау буйынса эксперт комиссияһы ағзаһы, физкультура уҡытыусы­ларының методик берекмәһе етәксеһе. Үткән йылдың октябрендә “Башҡортос­тан Республикаһының мәғариф алдынғыһы” тигән маҡтаулы исемгә лайыҡ булды. Тынғыһыҙ хеҙмәте Баскетбол федерацияһының Маҡтау ҡағыҙҙары, мәғариф идаралығының “Иң яҡшы тренер” исеме менән баһаланды.
Ғәҙел Риф улы һәр яҡтан да уңған. 2006 йылда Айһылыу Әсҡәтулла ҡыҙы менән гөрләтеп туй үткәреп, үҙаллы тормош юлын башлайҙар. Искәндәр, Ирназар, Рамзан исемле өс егеткә ғүмер бүләк иткәндәр. Искәндәр V класта “5”ле билдәләренә генә өлгәшә, уҡыуҙан тыш музыка мәктәбендә баян класында шөғөлләнә. Баскетболға, еңел атлетикаға ла йөрөп өлгөрә. Ирназар ҙа ағаһынан ҡалышмай, II класта яҡшы билдәләргә генә өлгәшә, еңел атлетика секцияһына, баян түңәрәгенә лә йөрөй, инде өс йыл бокс менән шөғөлләнә.
– Ике улым да мәктәптә Мостафа Харисов етәкселегендәге “Омон” хәрби-патриотик клубында шөғөлләнә, – ти ғорурлыҡ менән Ғәҙел Риф улы. – Кистәрен бөтәбеҙ ҙә һөйөклө ҡатыным Айһылыу әҙерләгән табынға йыйылабыҙ. Йәйгеһен ғаиләм менән Башҡортостан буйлап сәйәхәт итергә яратам. Талҡаҫ күлендә, Мораҙым, Шүлгәнташ, Асҡын мәмерйәләрендә булдыҡ. Бигерәк тә ҡатынымдың тыуған яғы — Архангел районы Инйәр йылғаһы буйы яратҡан ял урынына әйләнде.
Йәйгеһен улар малайҙары менән велосипедта йөрөй, ҡыш саңғыға баҫа, ә кистәрен шашка, шахмат уйнап, китап-журналдар уҡып үткәрә. Бына шундай матур ғаилә йәшәй Сермән ауылында. Буласаҡ Ватан һаҡсыларын, үҙҙәренә алмаш үҫтерә Айһылыу менән Ғәҙел Аҙнабаевтар.