1 апрелдән Рәсәйҙә әрмегә яҙғы саҡырылыш башланды. Ул 15 июлгә тиклем дауам итәсәк.

Был юлы хеҙмәткә алынғандар былтырғы яҙғы саҡырылыштан 10 про­центҡа аҙыраҡ буласаҡ. Бының сәбәбен хәрби белгестәр армияла бер үк ваҡытта контракт буйынса ил­де һаҡлаусыларҙың арта барыуы ме­нән аңлата. Рәсәй Ҡораллы Көс­тәре ойоштороу-мобилизация ида­ралығының Генераль шта­бы начальнигы урынбаҫары вази­фаһын башҡарған Евгений Бурдинский белдереүенсә, былтыр яҙ хәрби хеҙ­мәткә 142 мең егет алынһа, был миҙгелдә 128 мең кеше саҡырыла. Ә көҙ иһә 134 мең егет һалдат формаһы кейгән.
Был юлы шаҡтай үҙгәрештәр ҙә бар. Мәҫәлән, әлеге указ барлыҡ тө­бәк­тәргә лә ҡағылмай. Коми Рес­пуб­ли­каһында, Ненец һәм Ямал ав­то­номиялы округтарында, шулай уҡ Камчатка, Красноярск, Пермь кра­йы, Амур, Иркутск, Магадан һәм Сахалин өлкәләренең ҡайһы бер тө­бәктәрендә егеттәрҙе һалдатҡа йылына бер тапҡыр ғына саҡыралар. Унда йәштәр көҙөн генә ҡулына ҡо­рал аласаҡ. Әгәр улар ошо яҙҙа ар­мияға барырға теләһә, башҡа төбәктә хәрби иҫәпкә баҫырға тейеш.
Яҙғы саҡырылыштың йәнә бер үҙенсәлеге – бығаса һаулығы буйынса рәсми хеҙмәттән кисектереү алғандар ҙа ғәскәри бурысын үтәүгә алынасаҡ. Яҡынса өс мең самаһы егет хәрби-табип комиссияһы тарафынан ошоғаса һаулыҡ торошонда кәмсе­лектәр табылып, армияға алын­маһа, хәҙер сәләмәтлектәре һәй­бәт­ләнгән­лектән улар хеҙмәт итер­гә теләк белдергән. Мәғлүм бу­лы­уынса, әлегәсә 27 йәштән уҙғандар һалдатҡа алынмай ине. Рәсәй Президентының 2017 йыл­дың 29 декабрендәге указы менән хәҙер был сикте үткәндәр ҙә һалдат формаһын кейә ала.
Күптән түгел “Хәрби бурыс һәм хәрби хеҙмәт тураһында”ғы Законға йәштәрҙе һөнәри психологик йәһәт­тән һайлап алыу хаҡында үҙгәреш индерелде. Ул граждандарҙы хеҙ­мәт­кә әҙерләү буйынса мотлаҡ өлөш­кә әүерелде. Уның һөҙөм­тәләренә ҡарап хәрби комиссариаттарҙа йәш­тәрҙе ниндәй ғәскәрҙәргә тәғәйенләү сараһын күрәсәктәр. Бөгөн илдә хәрби хеҙмәткә яраҡлылыҡ 78,6 процент тәшкил итә.
Саҡырыу комиссияһы составына быйыл яҙ һалдат әсәләре комитеттары, “Юнармия” хәрәкәте вәкил­дәре индереләсәк. Атай-әсәйҙәр улда­рының ҡайҙа хеҙмәт итеүен хәл иткән саҡырыу комиссияһы ултырыштарына килә ала. Ғәҙәттәгесә, армияға саҡырылған барлыҡ призывниктар ҙа хәрби кейем формаһы, кәрәк-яраҡ, ә хеҙмәт итә башлағас та банк картаһы менән тәьмин ителәсәк.
Республикабыҙҙан был яҙҙа биш мең самаһы егет хеҙмәткә оҙаты­ласаҡ.