Бәхетте ваҡ-ваҡ шатлыҡтарҙың хасил итеүендә тамсы ла шик юҡ. Эш урынындағы һөйөнөстәр, ғаиләгә килеп ингән ҡыуаныстар шуға миҫал. Ошо аҙнала бер төркөм хеҙмәт алдынғылары, Башҡортостан Башлығы Рөстәм Хәмитов ҡулынан илебеҙҙең һәм республикабыҙҙың дәүләт наградаларын алды.

– Бөтәбеҙ ҙә илебеҙ үҫе­ше, респуб­лика­быҙ­ҙың киләсәге өсөн фиҙакәр хеҙмәт өлгөһө күрһәтәбеҙ. Беҙҙең өлөшкә сәскә атҡан Рәсәй субъектында, Баш­ҡорт­ос­танда йәшәү һәм эшләү яҙмышы төшкән, – тип башланы сығышын Рөстәм Зәки улы. – Баш­ҡортостанда һәр йәһәттән дә – бюджетты тәьмин итеү, иҡти­сад, социаль үҫеш буйынса – күрһәт­кестәр яҡшы. Был тәңгәлдә үҙебеҙгә алған йөкләмә­ләрҙе теүәл үтәйбеҙ, киләсәктә лә уй-ниәттәрҙе ошо йүнәлештә дауам итәсәкбеҙ. Барыһы ла һеҙҙең тырышлыҡ менән уңышлы бойомға ашырыла.
Салауат Юлаев орденын алған Бөтә донъя башҡорттары ҡоролтайы Башҡарма комитеты рәйесе урын­баҫары Вельмир Аҙнаев билдә­ләүенсә, ҡоролтайҙың өй туйлауында республика етәкселегенең өлөшө ҙур, улар һәр саҡ тос ярҙамды тоя.
Уңғандар араһында ҡәҙерле ҡунаҡ – Үзбәкстан башҡорттары ҡоролтайы ағзаһы, Зәки Вәлиди исемендәге Башҡорт мәҙәни үҙәк Советы рәйесе Илшад Хәсәновтың булыуы ҙур мәртәбәгә тиң ине. Салауат Юлаев орденын алған Илшад Хәсән улының һүҙҙәренә ҡарағанда, Үзбәкстанда милләттәштәребеҙ башҡортса радио тыңлап кинәнә, телетапшырыуҙар ҡарай. Улай ғына ла түгел, әле Өфөлә юҡ саҡта Ташкент ҡалаһының иң күркәм урамдарының береһе мәғрифәтсе Әхмәтзәки Вәлидиҙең исемен йөрөтөүе күпте һөйләй.
Исемлектә хеҙмәттәштәребеҙҙе күреү шулай уҡ күңел күтәренкелеге бирҙе. Мәҫәлән, “Уфимское времечко” телетапшырыуын алып барыусы Эрнест Хәйруллинға, радио хеҙмәтенең тауыш режиссеры Люциә Тимер­баеваға Башҡортостан Республи­каһының Почет грамотаһы бирелде, ә Асҡын мәғлүмәт үҙәге директоры Фәйрүзә Юнысова ошо көндән “Баш­ҡортостандың атҡаҙанған матбуғат һәм киң мәғлүмәт хеҙмәткәре” тигән маҡтаулы исемде йөрөтә башланы. Республиканың финанс министры Рида Собханҡолова – “Рәсәйҙең атҡаҙанған иҡтисадсыһы”, Баш­ҡортостандың Арбитраж суды судьяһы Светлана Чернышова “Баш­ҡорт­остандың атҡаҙанған юрисы” тигән юғары исемдәргә лайыҡ булды.
Баш ҡалалағы 21-се лицейҙың һәм 97-се мәктәптең VIII класс уҡыусылары Илфат Ғәлин менән Денис Кузнецов Рәсәй Ҡотҡарыусылар союзының Почет грамотаһын алды. Ғәҙәттән тыш хәлдә юғалып ҡалмаған батыр малайҙарға афарин!
– Беҙҙә бөтә тармаҡҡа ла иғтибар тигеҙ бүленә, һуңғы ваҡытта айырыуса һаулыҡ һаҡлау темаһы көнүҙәк. Ошо көндәрҙә Медицина форумы асылды. Һаулыҡ һаҡлау тармағы яңы бейеклектәргә күтәрелһен өсөн – матди-техник яҡтан тәьмин итеүҙә, өр-яңы клиникалар һәм поликлиникалар төҙөүҙә – ҡулдан килгәндең барыһын да эшләйәсәкбеҙ, – тип тамамланы һүҙен Рөстәм Хәмитов.

И. МӨХӘМӘТОВ.