Халыҡ-ара ҡатын-ҡыҙҙар көнө алдынан республика Башлығы Рөстәм Хәмитов баш ҡалабыҙҙа гүзәл заттар менән осрашты. Конгресс-холда үткән сарала 29 ҡатын-ҡыҙ — министрҙар, предприятиелар, белем биреү һәм медицина учреждениелары, йәмәғәт ойошмалары етәкселәре, шәхси эшҡыуарҙар ҡатнашты.

Рөстәм Хәмитов, уларҙы яҙ байрамы менән ҡотлап, ҡатын-ҡыҙҙарҙың төрлө эшмәкәрлек йүнәлештәрендә ҙур урын биләүен, республикала эшләгән халыҡтың 47 процентын тап улар тәшкил итеүен билдәләне. Төбәк етәксеһе Ғаилә йылына ҡарата ҡабул ителгән саралар планы, ишле, инвалид бала тәрбиәләгән ғаиләләргә ярҙам итеү, хәйриәлек йолаларын үҫтереү, үҫмерҙәргә иғтибар биреү зарурлығы тураһында һөйләне. Сабыйҙары булған әсәләргә шарттар тыуҙырыуҙы Рөстәм Хәмитов көнүҙәк мәсьәләләрҙең береһе тип белдерҙе.
— Ҙур төҙөлөштәр алып барабыҙ. Балалар баҡсалары, ясле төҙөү менән бәйле мәсьәләләрҙе хәл итергә тырышабыҙ. Яҡын арала байтаҡ мәктәпкәсә учреждениеларҙы сафҡа индерәсәкбеҙ. Ғаиләгә, өс йәшкә тиклем өйҙә ултырырға мәжбүр булған әсәләргә төшкән ауырлыҡты кәметеү йәһәтенән был тағы ла бер ҙур аҙым буласаҡ, — тине республика Башлығы.
Ғаилә, хеҙмәт һәм халыҡты социаль яҡлау министры Ленара Иванова М. Аҡмулла исемендәге Башҡорт дәүләт педагогия университеты менән Республика кардиология диспансерын миҫалға килтерҙе. Улар ҡарамағында балаларҙы тәрбиәләү буйынса махсус үҙәктәр ойошторолған. Кардиология диспансеры директоры Ирина Николаева ошондай төркөмдө төҙөү тәжрибәһе менән уртаҡлашты. Ул әле был төркөмгә ясле һәм кесе мәктәп йәшендәге ун бала йөрөүе хаҡында һөйләне.
Осрашыуҙа шулай уҡ мөһим ғаилә башланғыстары һәм проекттары телгә алынды. Улар иҫәбенә 15 майҙа Ғаилә көнөн (ҡатын-ҡыҙҙар өсөн эш көнөн бер сәғәткә ҡыҫҡартып), “Ҡатын-ҡыҙ — милләт инәһе” конкурсын, күкрәктәге яман шеште иртә диагностикалау маҡсатында ҡатын-ҡыҙҙарҙы тикшереү буйынса акция үткәреү инә.
Р. Нуриев исемендәге Башҡортостан хореография колледжы директоры Олия Вилданова һуңғы йылдарҙа колледжда биш балет спектакле ҡуйылыуы тураһындағы мәғлүмәт менән уртаҡлашты һәм һәләтле балаларға иғтибар биргән өсөн республика Башлығына рәхмәт әйтте. Рәсәйҙәге төп ижади уҡыу йорттарының береһендә балалар музыкаль театры төҙөү ниәте менән яналар.
Сибайҙан килгән вәкил — Балалар ижады үҙәге директоры Әлфиә Вәлитова һәләтле балаларҙы үҫтереү мәсьәләһен күтәрҙе. Ул Башҡортостандың көньяҡ-көнсығыш райондарында балалар технопаркы-кванториумын ойошторорға тәҡдим итте. Рөстәм Хәмитов был фекерҙе хуплап сыҡты.
— Теләк, башланғыс бар икән, ярҙам итәсәкбеҙ. Сибай — һәр йәһәттән ҡеүәтле, үҫешкән ҡала, — тине ул.
Төбәк етәксеһе күтәрелгән бөтә мәсьәләләр буйынса тейешле ведомстволарға күрһәтмә бирергә, яңғыраған башланғыстарға булышлыҡ итергә вәғәҙә бирҙе.