Заман менән йәнәш атлаған, интернет киңлектәрен байҡаған был геройҙарыбыҙ Сибай педагогия колледжында белем ала. Сәлимйән менән Нәғимйән Дәүләтбаевтар – ғәмәли информатика бүлеге студенттары. Игеҙәктәр Сибай ҡалаһында тыуып үҫкән, Рамаҙан Өмөтбаев исемендәге Башҡорт лицейында белем алған. Уҡыған саҡтарында халҡыбыҙҙың йыр-моңон үҙ иткән егеттәр “Урал батыр” эпосын яттан һөйләү конкурсында ҡатнашып, еңеү яулай. Ҡурайҙа һыҙҙырып, ҡумыҙ сирткән игеҙәктәр киләсәктә үҙҙәрен компьютерҙы тәрән белгән программист итеп күрә.


– Һөнәребеҙҙе аңлы рәүештә һайланыҡ. Бөгөнгө йәштәр замандан бер аҙым алда барырға тейеш, – ти улар. – Шуға күрә компьютерҙы биш бармағың кеүек яҡшы белеү, төрлө программалар төҙөү, төркөмдәр булдырыу, сайт төҙөү кеүек тәү ҡарашҡа ауыр күренгән эштәрҙе “һә” тигәнсә башҡара алыуыбыҙ үҙебеҙгә лә ярап ҡала. Бөгөн “Бәйләнештә” социаль селтәрендә “Вәт, әй...” исемле юморға ҡоролған төркөмөбөҙ бар. Уны һәр саҡ тулыландырып торабыҙ. Программист булараҡ, электрон китаптарға өҫтөнлөк бирәбеҙ. Дөрөҫ эш иткәндә, интернеттан үҙең һәм уҡыу өсөн кәрәкле бөтә мәғлүмәтте табырға мөмкин. Шулай уҡ үҫеш юлдары ла күрһәтелә унда. Тик ваҡытыңды дөрөҫ бүлеү генә кәрәк.
Нәғимйән менән Сәлимйән һәр саҡ бергә, йәнәш атлай, кәрәк саҡта бер-береһенә ярҙам итә. Уларҙың гел бергә булыуҙарына уҡыу йорто студенттары ла, уҡытыусылар ҙа өйрәнеп бөткән. Икеһе лә яҡшы билдәләргә өлгәшә, Сәлимйән – республика Башлығы стипендиаты ла.
Күптәр егеттәр тик виртуаль донъяла йәшәй тип уйлаһа, тәрән яңылыша. Улар йәй һайын Әбйәлил районының Хәмит ауылында йәшәгән өләсәй-олатайҙарына бара, бесән әҙерләшә, емеш-еләк йыя, йорт эштәрендә булыша. “Тормошоғоҙҙо интернетһыҙ күҙ алдына килтерә­һегеҙме?” тигән һорауға, бер-береһенә ҡарап йылмайып: “Бер нисек тә килтерә алмайбыҙ”, – тип яуапланылар.
Игеҙәк булыуҙары менән, бер яҡтан, бәхетле булһалар, икенсенән, икәүһе лә бер үк һөнәрҙе үҙ итеүҙәре менән отҡан. Кәрәк саҡта үҙ-ара ярҙамлашып, ҡайһы саҡта бәхәсләшеп тә алалар, әммә һәр саҡ бер уйҙа, маҡсатта, бер теләктә эш итәләр, заманса фекер йөрөтәләр. Ҡылған эштәре, өлгөлө тәртиптәре менән һәр кемдең ихтирамын яулай, һоҡландыра улар. Ҡала мөхитендә тыуып үҫеп тә, күңелдәренә башҡорт рухы һеңдерелгән, башҡорт йыр-моңон үҙ иткән игеҙәк егеттәр киләсәктә тормошта үҙ урындарын табыр, илебеҙгә кәрәкле шәхестәр булып үҫер.

Сибай ҡалаһы.