Республика Башлығы Рөстәм Хәмитов Белорет районына эш сәфәре барышында социаль һәм инфраструктура объекттарында булды, муниципалитет етәкселеге менән биләмәне үҫтереү мәсьәләләрен тикшерҙе.

Белоретта төбәк етәксеһе үҙәк район клиник дауаханаһының 1-се поликлиникаһын ҡарап сыҡты. Бында былтыр ноябрҙән “Һаҡсыл поликлиника” тәжрибә проекты тормошҡа ашырыла. Дауахананың баш табибы Евгений Кустов әйтеүенсә, проект нигеҙендә пациенттарҙың бөтә маршруттары анализланған, проблемалы мәлдәр, шул иҫәптән сират һәм медицина ярҙамы күрһәтеү менән бәйле мәсьәләләр асыҡланған. Поликлиникаға килеү маҡсатына ҡарап, әле пациенттар өсөн уңайлы ваҡыт билдәләнгән, дауалау-диагностика ғәмәлдәре стандартлаштырылған, диспансерлаштырыу үткәндә, анализ тапшырғанда сират бөтөрөлгән.
Евгений Кустов “Һаҡсыл поликлиника” проектының шулай уҡ үҙәк район клиник дауаханаһы ҡарама­ғындағы балалар, стоматология поликлиникаларында, ҡатын-ҡыҙҙар консультацияларында индерелеүе хаҡында хәбәр итте.
— Беҙҙең өсөн был — алға табан яҡшы аҙым: табиптар араһында эш тигеҙ бүленә, аңлашыл­маусанлыҡ юҡҡа сыға, тәртип барлыҡҡа килә, — тине Рөстәм Хәмитов. — Проект һиҙелерлек һөҙөмтә бирә. Ул табиптарға ла, пациенттарға ла файҙалы.
Башҡортостан Башлығы республика һаулыҡ һаҡлау министрынан быйыл “Һаҡсыл поликлиника” проектына нисә медицина учреждениеһының ҡушыласағы хаҡында ҡыҙыҡһынды. Әнүәр Бакиров әйтеүенсә, проект барлыҡ балалар поликлиникаларында, өлкәндәрҙекендә иһә 70 процентында ғәмәлгә ашырыла башлаясаҡ тип күҙаллана. Рөстәм Хәмитов киләсәктә проектты дауаханаларға ла таратырға тәҡдим итте.
Белоретта төбәк етәксеһе “Металлург” стадионын реконструкциялау барышы менән танышты. Комплекс республика Башлығы күрһәтмәһенә ярашлы яңыртыла башлағайны. Эш тамамланғас, бында күнекмәләр базаһын төҙөү, еңел атлетика, грек-рим көрәше, хоккей, футбол, волейбол, баскетбол, теннис, биатлон, тау саңғыһы, йөҙөү буйынса төрлө кимәлдәге ярыштар үткәреү күҙаллана.
Рөстәм Хәмитов реконструкцияланған бүлмәләрҙе ҡарап сыҡты, эштең тамамланыу ваҡыты менән ҡыҙыҡһынды. Быйыл заманса спорт залы төҙөү, стадионды яңыртыу, ҡорамалдар килтереү, велосипед, йүгереү юлдарын, трибуналарҙы реконструкциялау планлаштырыла. Шулай уҡ саңғы-роллер трассаһын төҙөү ҡарала.
Республика етәксеһенең сәфәре осоронда стадионда Советтар Союзы Геройы А.Г. Серебренников иҫтәлегенә Ватанды һаҡлаусылар көнөнә арналған саңғы ярышы уҙғарыла ине. Унда теләге булған һәр кеше ҡатнашты.
“Морат” тау саңғыһы үҙәгендә Рөстәм Хәмитов трассаны һынап ҡараны, туристар өсөн тыуҙырылған шарттар менән танышты, комплексты артабан үҫтереү мәсьәләләре буйынса кәңәшмә үткәрҙе. Унда тау саңғыһы курорттары өлкәһендәге Рәсәйҙең төп эксперттары ҡатнашты.
Рөстәм Зәки улы әйтеүенсә, “Морат” уңайлы географик урыны һәм трассаларының төрлөлөгө менән айырылып тора. Туристар өсөн бында байтаҡ шарттар тыуҙырылған. Төбәк етәксеһе, 2020 йылға инфраструктура йәһәтенән бөтә етешһеҙлектәр бөтөрөлөргә, сифатлы тау саңғыһы курорты ойошторолорға, ошоноң менән комплексты үҫтереүҙең тәүге этабы тамамланырға тейеш, тип билдәләне. Рөстәм Хәмитов тау саңғыһы комплексын һәм уның эргәһендәге биләмәне, ял итеүселәр өсөн тейешле инфраструктураны булдырыу зарурлығын иҫәпкә алып артабанғы үҫештең комплекслы планын төҙөргә ҡушты.