Ейәнсура районының Буран­ғол ауылында тыуып үҫкән ҡәҙерле әсәйебеҙ Хәзирә Абдулла ҡыҙы ДҮШӘНБАЕВА ошо көндәрҙә 70 йәшлек күркәм юбилейын билдәләй. Ул Абдулла менән Нәбирә Ҡунаҡҡужиндарҙың ғаиләһендә унынсы бала булып донъяға килә.
Тырыш, уңған, белемгә ынтылған ҡыҙ, ауыл мәктәбен уңышлы тамамлағас, Салауат педагогия училищеһына уҡырға инә, унан һуң йүнәлтмә буйынса Иглин районына эшкә ебәрелә. Ике йылдан һуң тыуған районына ҡайтып, Таҙлар урта мәктәбендә пионервожатый була, математика, география фәндәренән дә уҡыта.
Үҙенең ғүмер юлдашы, атайыбыҙҙы ла ошонда осрата әсәйебеҙ. Ошоға тиклем башланғыс кластар уҡытыусыһы булып эшләгән Исмәғил Сәлимгәрәй улы Дүшәнбаев Таҙлар мәктәбендә хеҙмәт уҡытыусыһы, магазин директоры, ауыл Советы рәйесе лә булып эшләне. Ҡайҙа ғына эшләһә лә, алдынғы сафта, эшенә яуаплы ҡарағаны өсөн оло хөрмәткә лайыҡ булды.
Хәзирә Абдулла ҡыҙы тормошта ла, эштә лә һынатманы. Ниндәй генә эш тапшырһалар ҙа, ихлас күңел менән башҡарҙы, күп һанлы маҡтау грамоталары шул турала һөйләй. 40 йыл фиҙакәр хеҙмәте “Башҡортостан Республикаһының мәғариф алдынғыһы” исеме менән билдәләнде. Иң ҙур бүләк – уҡыусылары рәхмәте, атай-әсәйҙәрҙең хөрмәте.
Тырыш, абруйлы ғаиләлә өс бала донъяға килә. Улдары Юнир урта мәктәпте уңышлы тамамлағас, хәрби сафтарҙа ил алдындағы бурысын үтәп, Башҡорт дәүләт медицина университетына уҡырға инә. Уны тамамлағас, Иҫәнғол дауаханаһына эшкә ҡайта, унан Салауат ҡалаһына эшкә ебәрелә. Бер аҙ эшләгәс, Өфөләге “Аҡбуҙат” шифаханаһында, 46-сы поликлиникала баш табип урынбаҫары булып эшләй. 2010 йылдан алып 44-се поликлиникала баш табип вазифаһында Альбина киленебеҙ менән өс бала үҫтерә. Радмила ата-әсәһе юлынан китте – медицина университетында икенсе курс студенты, Булат 35-се мәктәптә белем ала, бәләкәстәре Тимурға – йәш.
Икенсе ҡыҙҙары Хәлиҙә Башҡортостан мәғарифты үҫтереү институтында эшләй. Хәлиҙә менән Миҙхәт Атнағоловтар ғаиләһендә Әҙилә исемле ҡыҙ үҫә. Иң кесе ҡыҙҙары Зилфирә Өфө статистика һәм иҫәп-хисап технологиялары колледжын тамамлап, Башҡортостан мәғарифты үҫтереү институтында эш башлай, Өфө авиация техник университетын тамамлап, Башҡортостан Мәғариф министрлығында эшен дауам итә. Кейәүебеҙ Нашиҡ менән Астамир һәм Алан исемле ике ул тәрбиәләйҙәр.
Балаларҙы ир еткереп, ейән-ейәнсәрҙәргә һөйөнөп, бергә-бергә йәшәргә ине лә бит, ҡәҙерле атайыбыҙ өс йыл элек яҡты донъяларҙан китеп барҙы. Шулай ҙа әсәйебеҙ бирешмәй, тыуған нигеҙебеҙҙең ҡотон һаҡлап, үҙаллы донъя көтә.
Ҡәҙерлебеҙҙе һағынып, талпынып йыш ҡайтырға тырышабыҙ ата йортона.
Рәхмәт, әсәй, барыһы өсөн дә! Юбилейың ҡотло булһын, иҫән-һау бул, беҙҙе, ейән-ейәнсәрҙәреңде ҡыуандырып оҙон-оҙаҡ йәшә, бәхетле, матур ҡартлыҡ насип итһен Хоҙай!
Тормош юлдарынан атлағанда,
Һинең менән генә көслө беҙ,
Бул һин һәр саҡ беҙҙең арабыҙҙа,
Иң ҡәҙерле яҡын кешебеҙ!

Иң изге теләктәр менән балаларың Юнир, Хәлиҙә, Зилфирә, киленең Альбина, кейәүҙәрең Нәмиҡ, Миҙхәт, ейән-ейәнсәрҙәрең Радмила, Булат, Тимур, Астамир, Алан, Әҙилә.