Ҡырмыҫҡалы районына эш сәфәре барышында республика Башлығы Рөстәм Хәмитов инфраструктура, етештереү һәм социаль объекттарҙы ҡарап сыҡты, биләмәнең үҫеш мөмкинлеген тикшерҙе.

Константиновка ауылында төбәк етәксеһе 2015 йылда асылған Ҡыр­мыҫ­ҡалы төҙөлөш материалдары за­водының етештереү майҙансы­ғында булды. Предприятие йыл һайын металдан бер мең тоннаға яҡын әйбер — профнастил, торбалар, сайдинг, металл черепица сығара, шулай уҡ ке­рамзит блоктар, тауар бетоны етеш­тереү менән шөғөлләнә.
Рөстәм Зәки улы шулай уҡ күп функциялы ауыл клубын ҡарап сыҡты. Ул былтыр әүәлге мәҙәниәт йорто ниге­ҙендә асылған. Клуб бинаһы тулы­һын­са яңыртылған, кәрәкле йыһаз һатып алынған. Ошо маҡсатҡа 20 миллион һум йүнәл­телгән, шул уҡ ваҡытта яңы үҙәк төҙөүгә кәмендә 150 миллион һум аҡса талап ителер ине.
— Афарин, 20 миллион һумға бик шәп клуб асҡанһығыҙ, — тине республика Башлығы.
Район үҙәгендә ул “Ҡырмыҫ­ҡалы­сельхозэнерго” яуаплы­лы­ғы сикләнгән йәмғиәте эше менән танышты. Директор Фәнис Мөхәмәт­йәнов әйтеүенсә, әле предприятие Ҡырмыҫҡалы һәм Благовар район­дарындағы 10 мең самаһы ҡулла­ныусыны, шул иҫәптән ҙур етеш­тереү объекттарын хеҙмәтлән­дерә. Йыл һайын энергетиктар 70 саҡ­рымлыҡ электр селтәрен төҙөк­лән­дерә, яңыһын үткәрә. Киләсәктә йәмғиәт Саҡ­мағош районындағы электр селтәрҙәре хужалығы менән дә шөғөлләнергә әҙерләнә.
Бынан тыш, Ҡырмыҫҡалы энергетиктары электр селтәрҙәренә тоташтырыу ваҡытын байтаҡҡа ҡыҫ­ҡартҡан. Рәсәй буйынса уртаса алғанда был эш биш этаптан торһа, ҡырмыҫҡа­лы­ларҙа ни бары икәүҙән. Ҡулланыу­сы­ларға уңайлы булһын өсөн яңы тө­ҙөл­гән административ корпуста “Бер­ҙәм тәҙрә” принцибы буйынса электр үткәреүгә ғариза ҡабул итеү ойош­то­роласаҡ.
Сахай ауылында республика Баш­лығы урта дөйөм белем биреү мәктә­бенең яңы корпусын ҡараны. Бында башланғыс кластар уҡыясаҡ. Буш торған административ бина реконструкцияланып, икенсе сменаны бөтөрөү маҡсатынан урын­дағы мәктәп­кә тапшырылған. Рөс­тәм Хәмитов тө­ҙөкләндереү һәм буш ҡоролмаларҙы мәктәп ихтыяжына яраҡлаштырыу тәжрибәһен ыңғай баһаланы, уны респуб­ли­ка­ның башҡа райондарында ла ҡулланырға тәҡдим итте.
Ошонда уҡ төбәк етәксеһе күп функциялы ауыл клубында булды. Клуб мәҙәниәт йортон, китапхананы, музей­ҙы берләштергән. Бинала шулай уҡ ауыл хакимиәте, почта, фельдшер-акушерлыҡ пункты, спорт һәм тренажер залдары урынлашҡан.