Был донъяға һәр кем үҙенсә яраҡлаша. Берәүҙәр еңел килгән бәхеткә ҡойоноп йәшәһә, икенселәр ғүмер буйы ҡаршылыҡтар аша алға атлай. Ни өсөн шулай? Минеңсә, был аҡлы-ҡаралы тормоштоң мәрхәмәтһеҙ, етешһеҙ яҡтарына битараф ҡалмай, ундай хәл-ваҡиғаларҙы йөрәге аша үткәргәндәр үҙҙәре лә һиҙмәҫтән ҡатмарлы юлды һайлай. Кемгәлер, нимәгәлер яраҡлашырға тырышып интекмәй улар. Ни өсөн тигәндә, үҙ ниәттәре, маҡсаттары, юлдары бар.

Бына шундай шәхестәрҙең береһе – ауырлыҡтар алдында һис ҡасан теҙ сүкмә­гән, тормош һынауҙарына бирешмәгән, шул уҡ ваҡытта кешелекле, кеселекле, ябай булып ҡала белгән уҙаман, Башҡорт­остандың һәм Рәсәйҙең Яҙыусылар союзы ағзаһы Ишғәле Нурғәлиев.
Йәмле Һәләүек йылғаһының урта ағы­шын­да, Сағыл тауҙары араһында ятҡан Әп­тек ауылында (Ишембай районы) донъя­ға килә ул. Ғаиләлә бишенсе бала була. Сә­йә­си золом йылдары уның атаһы менән олатаһын да урап үтмәй. Артабан – һуғыш. Шуға ла Ишғәленең күңеленә бала сағы әрнеү­ле хәтирәләр менән уйылған. Ул уҡыусы сағында шиғырҙар яҙа, китап уҡыуға әүәҫ була. Әптектә башланғыс мәктәпте тамамлағас, артабан белем алыуын күрше Сәлих ауылында дауам итә. Унан хәрби бурысын үтәп, әлеге Өфө дәүләт нефть техник университетын тамамлағас, барлыҡ ғүмерен хеҙмәткә бағышлай.
Ишғәле Ширәй улы менән уның матбуғат баҫмаларындағы яҙма­лары аша таныштым. Ҡәләме үткер уның. 2005 йылда Стәрле­тамаҡ яҙыусылары ойошмаһына тулы ижади багаж менән килде. Гәзит-журналдарҙа мәҡәләләре даими сыға, бынан тыш, урыҫ телендә “Моя медицина” тигән китабы донъя күрҙе.
“Ҡарабаш турғай” исемле повесында иһә Ишғәле Ширәй улының бар тормошо са­ғыл­дырылған. Ундағы ваҡиғаларҙың бе­реһе һаман йөрәгемде әрнетә: үҫмер ҡыш алты саҡрым алыҫлыҡта ятҡан күрше ауыл мәктәбенә яланаяҡ йөрөп уҡый. Ҡыҙғаныс­ҡа ҡаршы, был – ысынбарлыҡ. “Үткәндәре­геҙ­ҙән нимәгәлер үкенәһегеҙме?” тигән һо­ра­уыма яҙыусы: “Бер нәмәгә лә үпкәм юҡ, – тип яуапланы. – Тик, ниңә йәштән үк ныҡ­лап яҙыш­маным икән, тип кенә бошоноп алам”.
Ваҡиғалары йылдам үҙгәреп торған ҡатмарлы быуатта сыныҡҡан Ишғәле Ширәй улының ихтыяр көсөнә, рух ныҡлығына хайран ҡалмалы. Ифрат сабыр, сәмле һәм ғәмле кеше ул. Тап шундайҙар – йәмғиәттең терәк-таянысы.

Стәрлетамаҡ ҡалаһы.