Бөрйән районының ҡатын-ҡыҙҙар ойошмаһы республикала алдынғыларҙан һанала. Йәмғиәттә ҡатын-ҡыҙҙың абруйын күтәреү, ғаилә институтын нығытыу, сәләмәт тормошто пропагандалау, йәш быуынды патриотик рухта тәрбиәләү һәм башҡа йүнәлештәр буйынса һанап бөткөһөҙ күп эш башҡара ойошма. Уға лайыҡлы хеҙмәт юлы үтеп, әле лә йәмәғәт тормошонда әүҙем ҡатнашҡан райондың абруйлы кешеләренең береһе Рәмилә Салауатова етәкселек итә.

Күптән түгел Рәмилә Фәхретдин ҡыҙының тырышлығы менән “Бөрйәндең данлы ҡыҙҙары” тип исемләнгән китап донъя күрҙе.
— Йыш ҡына эш буйынса ауылдар буйлап йөрөйбөҙ, халыҡ менән осрашыуҙар, саралар уҙғарабыҙ. Һәр урында ябай, әммә һоҡланғыс ғүмер кисергән, тырышып эшләгән, аҡыллы балалар үҫтергән өлгө булырлыҡ ҡатын-ҡыҙҙар бихисап. Етәксе урындарҙы биләгән, табип, уҡытыусы һәм башҡа һөнәр эйәләренә ихтирам һәм хөрмәт күрһәтелә, ә ябай ҡатын-ҡыҙҙарға йәмғиәттә иғтибар етешмәй һымаҡ тойолдо һәм башыма райондың данлыҡлы ҡатын-ҡыҙҙары тураһында китап сығарыу фекере килде, — ти китаптың мөхәррире.
Рәмилә Салауатованың изге ниәтен ул ваҡытта Бөрйән районы хакимиәте башлығы булып эшләгән Динир Әхмәтйәнов та хуплай. Шулай итеп, 2013 йылда райондың хөрмәткә лайыҡ, данлыҡлы ҡатын-ҡыҙҙары тураһында китап сығарыу эше башлана.
— Иң тәүҙә мөхәрририәт төҙөп, буласаҡ китап тураһында “Таң” гәзитендә белдереү яһаныҡ. Материалдар йыйыуҙа һәр ауылдың ҡатын-ҡыҙҙар ойошмаһы ҙур ярҙам күрһәтте, урындағы хакимиәт башлыҡтары ла беҙҙең башланғысты күтәреп алды.
Ил төкөрһә, күл була, тиҙәр, өс йылда байтаҡ материал йыйыла. Райондың яңы етәксеһе Рөстәм Шәрипов хәстәрлеге менән китапты баҫтырып сығарыу өсөн аҡса бүленә.
Китап бик эстәлекле килеп сыға, ул район хакимиәте башлығының тәбрикләү һүҙе һәм Бөрйән районы менән таныштырыуҙан башланып китә. Икенсе өлөштә урындағы ҡатын-ҡыҙҙар ойошмаһы эшмәкәрлеге тураһында белешмә бирелә, артабан район үҫешенә тос өлөш индергән, йәмәғәт эштәрендә әүҙем ҡатнашҡан эшсән һәм талантлы ҡатын-ҡыҙҙар, алдынғы хеҙмәткәрҙәр, герой-әсәләр хаҡында ҡыҫҡаса биографик мәғлүмәт тупланған.
— Шөкөр, маҡсатыбыҙға өлгәштек, бөгөн “Бөрйәндең данлы ҡыҙҙары” китабы райондың һәр китапханаһында бар, уны ҡулдан-ҡулға йөрөтөп уҡыйҙар. Киләсәк быуын өсөн уның әһәмиәте әйтеп бөткөһөҙ ҙур. Китапты сығарыуҙа ярҙам иткән һәр кемгә, бигерәк тә Бөрйән районының “Берҙәм Рәсәй” партияһы бүлеге етәксеһе, хакимиәт башлығы Рөстәм Шәриповҡа сикһеҙ рәхмәтемде белдерәм, — тип ҡыуанысын йәшермәне Рәмилә Салауатова.