“Әсәлек хисе, әсәлек ғорурлығы — йәшәйештең асылы, моғайын, ул кешелек таңында уҡ тыуған иң изге, иң бөйөк, иң мәңгелек хистәрҙең береһелер”, — тип яҙған Сабир Шәрипов. Ҡатын-ҡыҙҙың бар булмышы, тәбиғәттән һалынған асылы ошоға ҡоролған. Бөрйән районының Әтек ауылында йәшәүсе Алина Иҙрисова биш балаға ғүмер бүләк иткән.


Ишембай ҡалаһында тыуған Алина Вил ҡыҙы бала сағында уҡ әсәһе менән Ағиҙел ҡасабаһына күсеп ҡайта. Әтек ауылында 9-сы класты тамамлай. 132-се һөнәрселек училищеһында ашнаҡсы, секретарь-машинист, һатыусы-кассир, эш башҡарыусы һөнәрҙәренә уҡып сыға. Бөгөн ул – Әтек мәктәбендә хужалыҡ эштәре мөдире.
Килен булып төшкән еренә ерегеп, тормош иптәше Йәүҙәт Тәлғәт улы менән ата-әсә нигеҙен һыуытмай йәшәп ятыуҙары. Быйыл улар әсәлек капиталына 9х9 кв. м ҙурлығында өй күтәреп, башын ябып ҡуйғандар. Маҡсаттары — киләсәктә төкәтмә төҙөтөү, иркен йортта балаларына айырым бүлмәләр бүлеү.
Йөҙөнән йәшәү дәрте, нур бөркөлөп торған был мөләйем 30 йәшлек ҡатынды биш бала әсәһе тип әйтмәҫһең дә. Сәскә кеүек балаларына исемдәрҙең дә ниндәйҙәрен һайлаған улар. Өлкән ҡыҙҙары Зөбәржәт 5-се класта яҡшы билдәләргә генә уҡый, баскетбол секцияһында, бейеү түңәрәгендә шөғөлләнә. Спорт менән дуҫ булған улдары Йәҙгәр 3-сө класта белем ала. Тик тормаҫ, бик сос һәм үткер егет Йәнгир мәктәпкә әҙерлек төркөмөнә йөрөй. Йыр-бейеүгә маһир дүрт йәшлек Хазинаның исеме лә есеменә тура килеп тора, ә балалар баҡсаһына йөрөгән ике йәшлек Назар тирәләй донъя үҙе әйләнгәндәй.
Эшһөйәрлек сифатын балаларға бәләкәйҙән һала башларға кәрәк, тип иҫәпләй ата-әсә. Шуға ла ишле ғаилә өс һыйыр тота, ҡош-ҡорт аҫрай, баҡса тултырып йәшелсә-емеш үҫтерәләр. Был йәһәттән Зөбәржәт менән Йәҙгәр һәр яҡлап ярҙамлаша.
— Һәр сабый үҙ ризығы менән тыуа. Иремдең терәген, ярҙамын тоймаһам, ишле балалар табырға баҙнат итмәҫ инем. Иң мөһиме — балаларым иҫән-һау булһын. Туғандар күп булһа, йәшәү күңеллерәк тә, еңелерәк тә бит ул. Йортобоҙҙоң балалар тауышы менән тулы булыуы беҙҙең өсөн ҙур бәхет, — ти Алина Вил ҡыҙы. Күптән түгел ул “Әсәлек даны” миҙалы менән бүләкләнде.
— Барлыҡ әсәйҙәргә ошо бөйөк исемде лайыҡлы күтәреүҙәрен, тәүфиҡлы, мәрхәмәтле балалар тәрбиәләүҙәрен, ғаиләләрҙең имен, илебеҙҙең тыныс булыуын теләйем, — ти Алина.

Бөрйән районы.