Белорет районында булған һәр кем уның ғәжәйеп матур тәбиғәтенә һоҡланалыр. Ҡуйы урмандары, сылтырап аҡҡан йылғалары, мәғрур бейек тауҙары кемде генә әсир итмәй икән? Республика, Рәсәй кимәлендә лә киң билдәлелек яулаған Асы шифаханаһының минераль һауыҡтырыу сығанаҡтары ғына түгел, гүзәл тәбиғәте лә күптәрҙе үҙенә ылыҡтыра.

Ауылды өс яҡлап уратып алған тауҙар, Юрмаш һәм Оло Инйәр йылғалары, ирәйеп үҫкән имән ағастары, хатта ваҡыты-ваҡыты менән уҙған поездар ҙа Асыға үҙенә генә хас йәм биргән кеүек.
Белорет районының гүзәл төбәгенә был юлы беҙҙе тәү ҡарамаҡҡа әллә ни ҙур ҙа булмаған ваҡиға алып килде – Асы ауыл советы, “Урындағы баш­ланғыстарҙы яҡлау” программаһына ярашлы, трактор ҡайтартҡан. Ошо айҡанлы тантаналы сара ла ойош­торғандар. Байрам күрке – шарҙар һәм флагтар менән биҙәлгән яңы “Беларусь” үҙәк майҙанда, мәҙәниәт йорто эргәһендә урын алған. “Тимер ат”ты йүгәнләгән Закир Тайыпов менән тап ошонда һөйләштек:
— Беҙҙең ауыл советы биләмәһенә тағы дүрт ултыраҡ – Береш, Береш­тамаҡ, Мулдаҡай, Исҡушты ауылдары ҡарай. Ҡыш беҙҙә күҙ асҡыһыҙ бурандар була, көслө ҡарҙар яуа, ҡайһы саҡ урамға ла сығырлыҡ түгел. Аллаға шөкөр, юлдарҙы таҙартырға хәҙер үҙебеҙҙең техника булды. Сүп-сар ташырға тағылмалы арбаһы ла бар. Яғыулыҡ өсөн картаны астыҡ та инде, тракторҙы теркәйһе генә ҡалды, — тип шатлығы менән уртаҡлашты ул.
Ул арала үҙәк майҙанға байтаҡ халыҡ та йыйылып өлгөрҙө. Асы ауыл советы хакимиәте башлығы Венер Йосоповтан программаның нисек тормошҡа ашырылыуы менән ҡыҙыҡһынабыҙ:
— Конкурста ҡатнашыу өсөн документтарҙы февраль айында уҡ әҙерләй башланыҡ. Тәүҙә ауыл халҡы менән йыйылып проблемаларҙы барланыҡ, барыһы ла трактор алыу кәрәклеген хуплап сыҡты. Хаҡы ла ҙур ғына – 1,6 миллион һум. Әлбиттә, кәрәкле сумманы йыя алырбыҙмы икән, тигән икеләнеүҙәр ҙә булды. Күреп тораһығыҙ: маҡсатыбыҙға өлгәштек. Төп сығымды – бер миллион һумды республика бүлде, 150 меңде — район хакимиәте, 100 мең һумын шифахана етәкселеге күтәрҙе.Ҡалған сумманы халыҡ үҙе йыйҙы, эшҡыуарҙар ҙа әүҙемлек күрһәтте, — тине Венер Ғариф улы.
— Ә быға тиклем юлдарҙы таҙартыу проблемаһын нисек хәл итә инегеҙ? — тип һорайым башлыҡтан.
— Был мәсьәлә беҙҙе күптән борсой ине. “Асы” шифаханаһы, Фират Ҡунаҡбаев фермер хужалығы, “4АиКО” фирмаһы, ауыл халҡы ярҙамы менән сетерекле хәлдән сыға килдек, әммә һәр кемдең үҙ эше, үҙ мәшәҡәте. Трактор алыу көн талабы ине. Киләсәктә юлдарҙы таҙартыу ғына түгел, соҡор-саҡырҙы ремонтлау, һуҡа тағып, урман ситтәрендә янғынға ҡаршы һыҙат булдырыу сараһын да күрербеҙ, ә арбаһына цистерна һәм мотопомпа ҡулай­лаштырһаҡ, янғын һүндереүселәр килгәнсе янғын һүндереүҙә лә ҡатнаша аласаҡбыҙ, — тип пландары менән уртаҡлашты Венер Йосопов.
Әйткәндәй, асылар күптән түгел “Берҙәм Рәсәй” партияһының “Реаль эштәр” программаһында ла ҡатна­шып, ауыл уртаһында ағып ятҡан минераль сығанаҡ эргәһен төҙөклән­дергән. Асы ташы һәм асфальт түшәп, кәртәләп, уңайлы майҙансыҡ эшләп ҡуйғандар.
Программаларҙа әүҙем ҡатнаш­ҡандары өсөн рәхмәт һүҙҙәрен еткереп, яңы тракторлы булыуҙары менән ҡотлап китте сығышында Венер Ғариф улы ауылдаштарын.
Иң изге теләктәрен Белорет районы хакимиәтенең финанс идаралығы начальнигы Әминә Зыяитдинова ла еткерҙе:
— Асы ауылы халҡының әүҙем, берҙәм булыуҙары, заман менән бергә атлауҙары арҡаһында республика конкурсында еңеп сығып, дөйөм эштәренең һөҙөмтәһен күрәбеҙ бөгөн. Киләһе йылда ла проектта ҡатнашып, спорт майҙансығын төҙөү мәсьәләһен күҙ уңында тоторға кәрәк. Спорт – ул һаулыҡ, ә һаулыҡ — иң ҙур хазина, — тип телмәр тотто сығыш яһаусы.
...Ә байрам дауам итте. “Еңгәләр” фольклор ансамбле сығышын бәләкәй артистар алмаштырҙы. Берҙәмлектә бәрәкәт икәнлеген аңлаған, бөгөн уның татлы емешен татыған асылар, төрлө конкурстарҙа, халыҡ уйындарында ҡатнашып, ихлас күңел асты.