Балалар һәм үҫмерҙәр өсөн талап ителгән шарттарға яуап биргән спорт майҙансығы булмауы Ҡараттамаҡ ауылы халҡын күп йылдар хафаға һалып килде: киләсәк быуын вәкилдәре оло юл янында ғына уйын ҡорҙо, ундағы таусыҡ та хәүеф тыуҙыра ине. Урындағы башланғыстарҙы яҡлау программаһы мәсьәләне ыңғай хәл итергә мөмкинлек бирҙе.


Был Иҫке Туймазы ауыл би­ләмәһе хакимиәте булышлы­ғын­да башҡарылды. Телгә алын­ған программаға ниндәй проект менән ҡушылыуҙы тик­шер­гәндә, әлбиттә, күпселектең тәҡдиме иң тәүҙә иҫәпкә алынды. Ойоштороу эштәрен тейешле кимәлдә үткәреү, инициатив төркөмдөң ныҡышмалылығы һәм, әлбиттә, халыҡтың әүҙем­леге республика конкурсында еңеп сығыуҙы тәьмин итте.
Программа буйынса ҡарал­ған өлөшләтә финанслау кәрәк­леген барыһы ла ыңғай ҡабул итте. Бағыусы иғәнәләре менән дөйөм сығымды ҡаплауға шулай уҡ урындағы “Ҡуш-Бүләк”, “Панакс-Агро”, “Ландыш” һәм “Наследник” крәҫтиән (фермер) хужалыҡтары ла ҡушылды, дөйөм хәстәрҙән район Советы депутаттары Марат Ғәйфуллин менән Фәнил Исламғолов та ситтә ҡалманы.
Хәҙер баскетбол, волейбол һәм мини-футбол яландары, тейешле ҡорамалдар ҡуйылып сафҡа индерелгән заманса спорт майҙансығында тәүге эштәр башланыу менән ауыл халҡы тағы ла әүҙемлек күрһәтте.
— Битарафтар бөтөнләй булманы, — тип һөйләне инициатив төркөм етәксеһе Әлфиә Шәрә­фет­динова, майҙансыҡты ҡороу барышын хәтергә төшө­рөп. – Һәр кем үҙ мөмкинле­генән сығып тырышты. Ауылдаштарым нигеҙҙәрҙе нығытыу өсөн ҡул арбаһы менән балсыҡ та ташыны, йәйәүлеләр һуҡма­ғын да һалды, яңы таусыҡ, эскәмйәләр ҡуйыуҙа ла ярҙам­лашты. Аҙаҡтан яҡын-тирәгә ағастар ултыртыу ҙа уртаҡ хеҙмәт менән башҡарылды.
Шуға ла район хакимиәте башлығы Айҙар Суфияновтың спорт майҙансығын асыу тантанаһында ауыл халҡына белдергән рәхмәте бик тә урынлы яңғыраны. “Бындай социаль объекттар спортты пропагандалау, йәш быуындың һаулығын нығытыу менән бергә демографик хәлгә лә ыңғай йоғонто яһай”, — тип билдәләне етәксе.
Әйткәндәй, Ҡараттамаҡ хал­ҡының башланғысы районда күптәр өсөн өлгө булды. Быйыл­ғы программала ҡатнашыу өсөн 12 ауыл биләмәһе ғариза бирҙе, ә Иҫке Туймазы һәм Ҡарат ауыл советтары тағы ла еңеүселәр исемлегенә инде. Уларға ҡараған Уяҙытамаҡ һәм Горный ауылдары балаларын һәм үҫмерҙәрен дә яңы уйын-спорт майҙансыҡтары шатландыра.

Туймазы районы.