…Баҡса гөжләй. Меңәрләгән бал ҡорттары йорттарына бер инеп, бер сыға, безелдәп осалар, ҡайталар. Күҙәтеп торһаң, үҙе бер мөғжизә инде был донъя. Ике тиҫтәнән ашыу умарта араһында күректән төтөн борҡой, бер “йорттоң” ҡапҡасы асыла, умартасының ҡыҙыу эше башлана.

Бал ҡорттарын кемдер күңел талабы буйынса аҫрай, ғаиләһен бал менән тәьмин итер өсөн тотҡандар ҙа бар, шул уҡ ваҡытта тик табыш хаҡында баш ватҡандар ҙа юҡ түгел. Зөлфәт Абдуллиндың тиҫтә йыл элек был шөғөлгә ниндәй маҡсат менән башкөллө сумғаны уның яуабында сағыла һымаҡ:
— Бала саҡта атай менән бергә умарта ҡарай инек, ул иһә олатаһынан өйрәнгән, — тип умартасылыҡтың быуындар бәйләнеше булғанына ишаралай ул. — Әллә ни табыш күренмәй, бигерәк тә быйылғы йылда, әммә умарталар араһында йөрөп кинәнес табам. Ҡорттарҙы ҡарағас, ҡатыным, ҡыҙҙарым менән бергәләп татлы бал ҡушып сәй эсергә яратам, — тип тә өҫтәй Зөлфәт рамдарға күҙ һалған мәлдә.
Ғаиләһе менән сәй эсергәме, донъяны бөтәйтергәме – нисек кенә булмаһын, татлы бал ҡыуыр өсөн башта әсе тир түгергә кәрәклеген дә оноторға ярамай. Был йәһәттән Зөлфәткә һүҙ тейҙерерлек түгел һәм уның тырышлығы умартасылыҡҡа ғына ҡайтып ҡалмай: ҡышын Абдуллиндарға ҡаза килгән – йорттары янған, тик төшөнкөлөккә бирелмәй ғаилә, йәй эсендә бынамын итеп яңыһын күтәреп тә ҡуйғандар. Инде быныһында бәлә-һынауһыҙ йәшәргә, шул йортҡа умартасылыҡ серҙәрен һеңдерергә малай алып ҡайтырға ғына ҡала.
Эйе, өҫтәлгә бал килеп ултырһын өсөн умартасыға күпме көс түгергә тура килгәне уның үҙенә генә билдәле. Көҙөн япҡас, имен генә ҡыш сыҡһындар, өшөмәһендәр, сирләмәһендәр тип бер ҡайғыраһың, тик яҡшы ҡышлаған хәлдә лә яҙғы һынауҙар, йәйге мәшәҡәт етерлек. Нисек кенә булмаһын, әйтергә кәрәк, район бал ҡорттары аҫрау өсөн уңайлы, һәм был мөмкинлектәрҙән файҙаланыусылар, Аллаға шөкөр, байтаҡ. Рәсәйҙең иң яҡшы умартасыһы ла Ишембайҙа йәшәүе ҙур мәғәнәгә эйә, минеңсә.
— Беҙҙә 600-ҙән ашыу кеше умартасылыҡ менән шөғөлләнә, шул иҫәптән 20 кеше – крәҫтиән (фермер) хужалыҡтарында, ҡалғандар – шәхси ихаталарында. Йәмғеһе 9 мең тирәһе умарта аҫрала, — тип билдәләй, мәҫәлән, райондың баш зоотехнигы Рафиҡ Ғабдуллин. Мөмкинлектәрҙән файҙаланып, был күрһәткестәрҙең артыуына өмөт итергә ҡала. Статистика мәғлүмәттәренә күҙ һалғанда, донъяла балдың 4 проценты ғына беҙҙең илдең умартасыларыныҡы. Тимәк, Башҡортостанға уның ундан бер өлөшө тура килә.
— Ожмахтай ерҙә йәшәйбеҙ, ошондай уңайлы шарттарҙа умарта аҫрамау, минеңсә, гонаһтыр, — умартасы Зөлфәт Абдуллиндың бындай һүҙҙәренә тағы ни өҫтәйһең?!.
…Умартасының эше тамам. Күрек ҡырын ауған, бал ҡыуып алынған, өйҙә тәмле бал еҫе таралған, ғаилә сәй табынына йыйылған. Быныһы инде мөғжизә түгел, Абдуллиндарҙың йортондағы бәхетле бер күренеш. Күсле булып, көслө булып йәшәүгә ни етә!