“Өс көнлөк кенә инде был донъя!” – ти торғайны атайым ҡорҙаштарын, замандаштарын һәм яҡындарын баҡыйлыҡҡа оҙатып ҡайтҡандан һуң. “Нисек инде ул өс көнлөк булһын?” тип уйлай торғайным үҫмер саҡта. Үҫә төшкәс иһә быны тәрән аңланым. Ғәзиз кешем тотош бер ғүмерҙе өс үлсәм (донъяға килеүҙе, йәшәүҙе һәм баҡыйлыҡҡа китеүҙе) менән сағыштырып әйткән икән.

Эйе! Был йәшәйештең һиҙелмәй генә тиҙ үтеүен өс көн, күҙ асып йомған ара, аҡҡан һыу менән дә сағыштыралар. Байтаҡ ваҡыт үтһә лә, беҙҙең дә тормош кисә генә башланған кеүек ине. Ейәнсура районының Бикбау ауылында тыуып үҫкән, Салауат ҡалаһындағы педагогия училищеһын тамамлаған 20 йәшлек Фәүзиә 1969 йылдың 13 авгусында миңә кейәүгә сыҡҡайны. Ҡыҫҡаһы, яҙмыштарыбыҙҙы бергә бәйләп ярты быуатҡа яҡын һоҡландырғыс матур ғаилә ҡорҙоҡ. Ул миңә Марс һәм Сабит тигән улдар табып биреп ҡыуандырҙы. Икеһе лә юғары белемле, үҙҙәре башлы-күҙле булып, беҙгә ейәндәр бүләк итеп шатландырҙылар.
Тормоштоң гүзәллегенә, матурлығына һоҡланып һәм кинәнеп йәшәргә лә йәшәргә ине лә бит... Көтмәгәндә барып юлыҡҡан сир менән ҡатыным оҙаҡ көрәште. Табиптар ҙа бар көсөн һәм тәжрибәһен һалды, әммә сир еңелмәне.
Ҡыҙғанысҡа ҡаршы, ышаныслы терәгем, һөйөклө ҡатыным Фәүзиә Абдулла ҡыҙы, 2017 йылдың 18 июлендә фани донъяны ҡалдырып, ахирәткә китеп барҙы.
Ғаиләбеҙҙең иңенә төшкән ауыр ҡайғыны еңеләйтер өсөн дуҫтарым, яҡындарым ҡулдан килгәнсә ярҙам итте. Һәммәһенә лә сикһеҙ рәхмәт. Республикабыҙҙың иң абруйлы “Башҡортостан”, “Йәшлек”, “Киске Өфө” гәзиттәренә, Башҡортостан телевидениеһына, Фәүзиәнең туған коллективы “Башҡортостан уҡытыусыһы” журналы хеҙмәткәрҙәренә һәм уның баш мөхәррире Салауат Кәримовҡа, Өфөлә йәшәгән яҡташтарым ейәнсураларға оло рәхмәтемде белдерәм. Йәнә бер рәхмәтем — тыуған ауылым Бикбауҙа мәрхүмәне ерләүҙә ҡатнашҡан ағинәйҙәргә, иманлы ауылдаштарыма, ғаилә дуҫтарыбыҙ Хәсән Ҡаҙаҡбаев, Мәсҡүҙә менән Салауат Сабировтарға.
Беҙ был донъяны еңеүҙәр һәм юғалтыуҙар аша асҡанда һәм аңлағанда атайымдың йыш әйткән һүҙҙәрен тағы бер мәртәбә ҡабатлағы килә: “Өс көнлөк кенә донъя!” Ошо өс көнлөк кенә донъяла бер-беребеҙҙең ҡәҙерен белеп, татыулыҡта йәшәйек, дуҫтар, туғандар. Һеҙҙең барығыҙға ла иҫәнлек-һаулыҡ, бәхет-шатлыҡтар, уңыштар теләйем!

Салауат ИТБАЕВ,
БАССР-ҙың атҡаҙанған артисы, Башҡортостан Республикаһының атҡаҙанған сәнғәт эшмәкәре, Өфөләге ейәнсураларҙың яҡташтар ойошмаһының элекке рәйесе.