Дәүләт Думаһына микрофинанс ойошмалары эшмәкәрлеген көйләүгә йүнәлтелгән закон проекттары тәҡдим ителде. Рәсәй Федерацияһының Административ хоҡуҡ боҙоуҙар тураһындағы кодексына, Рәсәй Федерацияһының Енәйәт кодексына һәм “Ҡулланыу кредиты (займы) тураһында”ғы һәм “Микрофинанс эшмәкәрлеге һәм микрофинанс ойошмалары тураһында”ғы федераль закондарға тейешле үҙгәрештәр индерергә тәҡдим ителә. Был үҙгәрештәр финанс хеҙмәттәренән ҡулланыусыларҙың хоҡуҡтарын яҡлауға һәм ҡулланыу заемдары биргән легаль булмаған кредиторҙарҙың эшмәкәрлегенә кәртә ҡуйырға йүнәлтелә.
Закон проекттары хупланған осраҡта ҡулланыусыларҙы кредитлау буйынса законһыҙ эшмәкәрлек алып барған өсөн штрафтар арттырыласаҡ. Ошондай уҡ ғәмәлде ҡабатлап ҡылған осраҡта граждандар өсөн штрафтың иң ҙур күләме — 50 мең, вазифалы кешеләр өсөн — 200 мең, ойошмалар өсөн ике миллион һум тәшкил итәсәк. Шулай уҡ ҡулланыу заемдары биреү буйынса һөнәри эшмәкәрлекте законһыҙ тормошҡа ашырған өсөн енәйәт яуаплылығын ғәмәлгә индерергә һәм бер йылға бирелгән ҡулланыу кредиты килешеүе буйынса иҫәпләнгән процент күләмен кәметергә тәҡдим ителә.
— Микрофинанс ойошмалары эшмәкәрлеген закондар менән көйләү мәсьәләһе федераль, шулай уҡ төбәк кимәлендә лә беренсе тапҡыр ғына күтәрелмәй. Ул республика парламенты депутаттары тарафынан да тикшерелде. Беҙҙә хатта махсус эш төркөмө лә ойошторолғайны, — тине Башҡортостандың Дәүләт Йыйылышы — Ҡоролтай Рәйесе Константин Толкачев. — Әлеге тема ҙур әһәмиәткә эйә. Ҡалаларҙағы урамдар мохтаж булғандарҙың барыһына ла эш хаҡы алғанға тиклем аҡса биреп торорға теләгән конторалар, киосктар менән тулды. Уларҙың барыһы ла аҡсаны поручителһеҙ, залогһыҙ, документһыҙ бирергә әҙер. Заемдың был төрө нигеҙҙә килеме түбән булыу сәбәпле банктан кредит ала алмаған кешеләргә тәғәйенләнә. Улар ошондай контораларҙан йылына 500, хатта бер мең процентҡа арттырып түләү шарты менән аҡса алырға мәжбүр.
Константин Толкачев әйтеүенсә, Дәүләт Йыйылышы — Ҡоролтай депутаттары республикала үткәргән мониторинг барышында күпселек микрофинанс ойошмаларының законһыҙ эшләүе асыҡлана. Улар тураһында мәғлүмәт Рәсәй Банкының дәүләт реестрҙарына индерелмәгән. Законһыҙ кредитор эшмәкәрлеге өсөн яуаплылыҡты арттырыу маҡсатында республика парламенты депутаттары былтыр йыл башында уҡ Дәүләт Думаһына ошоға ҡағылышлы закон инициативаһын тәҡдим иткәйне.
— Ҡыҙғанысҡа ҡаршы, төбәк ҡануниәте был өлкәне шартлы рәүештә генә көйләй. Һөҙөмтәле сара күреү мөмкинлеге юҡ. Шуға күрә беҙ федераль үҙәккә тәҡдим индерҙек, — тине Константин Борисович. — Беҙҙең инициатива микрофинанс ойошмаларына ғына түгел, коллекторҙарҙың законһыҙ ғәмәлдәренә лә ҡағыла. Заемсыларҙың хоҡуғын яҡлау өсөн Дәүләт Думаһы депутаттары һәм Федерация Советы ағзалары әҙерләгән закон проекттары күп йәһәттән беҙҙең фекерҙәр менән ауаздаш. Әлеге рациональ башланғысты тулыһынса хуплайбыҙ, сөнки үҙебеҙ ҙә ошондай уҡ сараларҙы тәҡдим иткәйнек.