Республика Президенты Мөрәжәғәтнамәһендә ауылдарҙы төҙөкләндереүгә ҡағылышлы бурыстар ҙа ҡуйылған. Юлдарҙы яҡшыртыу, урамдарға асфальт түшәү, ҡаты көнкүреш ҡалдыҡтары полигондарын төҙөкләндереү кәрәклеге хаҡында әйтелгән. Был маҡсаттарҙа былтыр республиканың һәр ауыл биләмәһенә тәүге тапҡыр 200 мең һум күләмендә аҡса бүленде. Бындай финанс ярҙамы быйыл да буласаҡ.
Ҡаҙна аҡсаһын ниндәй маҡсаттарҙа ҡулландығыҙ, тип Иҫке Күктау ауыл биләмәһе хакимиәте башлығы Наил Хөрмәтуллинға мөрәжәғәт иттек.
— Беҙҙең ауыл Советына Красный Октябрь, Ибраһим, Иҫке Күктау ауылдары инә. Биләмәлә 414 хужалыҡ иҫәпләнеп, уларҙа 1043 кеше йәшәй. Ҡаҙнанан бүленгән аҡса ауылдарҙы төҙөкләндерергә мөмкинлек бирә.
Мәҫәлән, беҙ уны тәү сираттағы ихтыяждарға йүнәлттек. Иҫке Күктау ауылының Юлсы, Кесеһыу, С. Юлаев урамдарына ҡом-таш түшәлде. Барлыҡ эштәрҙе лә Илеш юл ремонт-төҙөлөш идаралығы эшсәндәре башҡарҙы. Яңы урамдарҙа йәшәүселәр ҡәнәғәт ҡалды, сөнки улар юлдың насар булыуынан яфа сигә ине. Шулай уҡ өс ауылда ла урамдарҙы яҡтыртыу һәм электр селтәрен яңыртыу йәһәтенән ҙур эш башҡарылды. Автоматик яҡтыртҡыстар урынлаштырылды, йәғни ҡараңғыла янып, иртән яҡтырыу менән үҙе һүнә торған энергия һаҡлаусы ҡоролмалар ҡуйылды. Унан тыш, аҡсаның бер өлөшөн урамдарҙы ҡарҙан таҙартыуға тотондоҡ. Был эшкә “Дорожник” йәмғиәте, Илеш юл-төҙөлөш идаралығы техникаһы йәлеп ителә. Былтыр юл буйҙарындағы сүп үләндәрен сабыуға ла тотонолдо был аҡса. Уны “Агроил” муниципаль унитар предприятиеһы эшсәндәре башҡарып сыҡты. Бағана, һайғауҙар һатып алып, баҡсалар һәм сүплектең ҡоймаларын яңырттыҡ.
Шуныһы һөйөнөслө: беҙҙә йәштәр ауылда ҡала. Әле бына Иҫке Күктауҙа 40 кешегә өй һалыу өсөн ер участкаһы бүлеп бирелде. Киләсәктә ауылды һыу менән тәьмин итеүҙә өҙөклөк булдырмау маҡсатында өҫтәмә скважина ҡаҙыу, Красный Октябрь ауылының урамына ҡом-таш түшәү һәм башҡа эштәр планлаштырыла, уларҙы уңышлы башҡарып сығырбыҙ, тип ышанам. Әлбиттә, бының менән генә туҡтап ҡалмаясаҡбыҙ, артабан да ауылдарҙы төҙөкләндереү буйынса эште дауам итәсәкбеҙ, сөнки райондың йөҙө уларҙың төҙөклөгө менән билдәләнә бит.
ҺҮРӘТТӘ: Иҫке Күктау ауылы биләмәһе башлығы Наил Хөрмәтуллин.