Исламда спортҡа ҙур әһәмиәт бирелә. Тән һаулығы – йән сәләмәтлеге, рух ныҡлығы.
Борондан килгән шундай һүҙҙәр бар: “Көслө булғың килһә – йүгер, матур булғың килһә – йүгер, аҡыллы булғың килһә – йүгер!” Хәрәкәттә – бәрәкәт. Йүгереүгә, мәғлүм ки, башҡа спорт төрҙәре өсөн кәрәк булған ҡоролмалар ҙа хәжәт түгел. Барыһы ла үҙеңдән тора. Йүгерә башлау өсөн бер нисә сәбәпте ҡарап үтәйек:
1. Ул йөрәктең, ҡан тамырҙары­ның мөмкинлектәрен арттыра. Мускулдар өсөн күнекмә. Йөрәкте нығыта, уға көс бирә.
2. Йүгергәндә ҡандың кислород һыйҙырышлылығы арта. Йөрәк мускулдарына күнекмә үткәрелгән­лектән, ҡан әйләнеше йышая. Кислород алмашыныуы ла арта.
3. Нервы ҡаҡшауына ҡаршы яҡшы көрәш сараһы. Хәлһеҙлектән арыныу өсөн тейешенсә тирләргә кәрәк – был мәсьәләне яйға һалырға йүгереү ҙур булышлыҡ ҡыла.
4. Оҙайлы күнекмә ваҡытында ҡанға эндорфин гормоны һалына. Уның концентрацияһы артһа, кеше рәхәтлек кисерә, көсөргәнеш юғала.
5. Йүгергәндә аҡыл әүҙемлеге арта. Был ваҡытта йыш ҡына үҙенән-үҙе ниндәйҙер мәсьәләне хәл итеү юлы табыла. Күнекмә мәлендә организмда матдәләр алмашыныуы көсәйә, шул арҡала үҙәк нервы сис­тема­һының, мейенең эшмәкәрлеге әүҙемләшә.
6. Ҡанда эритроциттар, гемоглобин артыуы арҡаһында иммунитет нығый. Холестерин кимәле төшә, асығыу тойғоһо кәмей, эсәктәрҙең эшмәкәрлеге яҡшыра. Был матдәләр алмашыныуын яйға һала, тән ауырлығын нормаға һала.
7. Ваҡытҡа килгәндә, көндөң һәр ҡайһы мәлендә йүгерергә мөмкин. Иртәнсәк, ҡанда гормондарҙың кимәле юғары саҡта, яңы көнгә көс алына. Ә кис йүгереү көсөргәнеште бөтөрә, артыҡ аппетитты баҫа, тыныс йоҡоға нигеҙ һала.
8. Даими йүгергән кешеләрҙең бауыры, бөйөрө эшмәкәрлегендә ыңғай һөҙөмтә күҙәтелә – хәрәкәт барышында уларҙан ауырлыҡ төшә.
9. Йүгереү шулай уҡ терәк-хәрәкәт аппаратына ыңғай йоғонто яһай. Өлкәндәр өсөн бындай күнекмәләр айырыуса файҙалы – быуындарҙағы, мускул туҡымаларындағы үҙгәреш­тәргә ҡаршы тора.

Яҡшылығы тейҙеме һуң?

Бер ир күрше ауылда йәшәгән туғанының хәлен белергә китеп бара икән. Ҡаршыһына танышы килә, ти.
– Ҡайҙа китеп барыуың?
– Туғанымдың хәлен белмәк­семен.
– Ә уның һиңә берәй яҡшылығы тейҙеме һуң?
– Изгелеге генә түгел, Раббы­быҙ­ҙың ризалығы өсөн хәлен белергә теләйем, – тип яуаплаған ир. – Туғаныңды нисек яратһаң, Аллаһ Тәғәлә үҙеңде шулай һөйөр.