Гөлфиә ЮНЫСОВА, Башҡортос­тандың халыҡ шағиры:
– “Башҡортостан” (унан алдағы исеме “Совет Башҡортостаны”) гәзите ғүмерем­дең балҡып торған нуры, яҡындарҙан-яҡын уҡытыусы-тәрбиәсем, серҙәш ду-­ ҫым, үҙемде белә башлағандан алып минең яҙмышымда ул. Тәүҙә гәзиттәге ҙурыраҡ хәрефтәрҙе танырға, аҙаҡ ҡу­шып уҡырға өйрәндем. Һәр өйгә көтөп алған ҡунаҡ булып килеп торҙо гәзитебеҙ. Үҫә килә, аң-зиһен офоҡта­рымды киңәй­тергә ярҙам итте. Башҡор­тостаны­быҙ­ҙағы хәл-ваҡиғалар, ҡы­ҙыҡлы, фәһемле яҙмышлы кешеләр, дан ғаиләләр, алдын­ғы хеҙмәт коллективтары, мәҙәниәт, фән, сәнәғәт яңылыҡ­тары, сәнғәт оҫталары менән таныш­тырҙы. Уның матурлыҡ, изгелек, хаҡлыҡ, илһөйәрлек тойғолары тәрбиә­ләүҙәге роле баһалап бөткөһөҙ.
Әҙәбиәткә, журналистикаға ҡыҙыҡ­һыныу уятҡан, унда үҙемдең дә ҡатна­шыу теләгемә фатиха биргән әйҙәүсем дә – ошо гәзитебеҙ. Уҙған быуаттың 60-сы йылдар уртаһынан алып уның биттәрендә күпме шиғри шәлкем­дәрем, мәҡәләләрем донъя күрҙе. Ижади тормошома арналған күпме әңгә­мәләр, очерктар баҫылып сыҡты. Ярты быуатҡа яҡын дауам иткән журналислыҡ хеҙмәтем дә тап ошонда, “Башҡортостан”да, башланды бит. Хаҡлы ялда булһам да Матбуғат йорто – минең өсөн иң ҡәҙерле, иң яҡын урын. Әле булһа “Башҡортостан”дың әүҙем авторымын, шуға ҡыуанам.
Шуныһы ҡыуаныслы: “Башҡортостан” гәзите аша бөгөн дә Башҡортос­таны­быҙҙың йөрәге тибешен, заман һулышын тоябыҙ. Республикабыҙҙың төп баҫмаһы – халҡыбыҙ өсөн йәшәү ориентиры ла, аҡыл-зиһен, илһөйәрлек, намыҫлылыҡ, әҙәплелек хис-тойғоларын дөрләтеп ебәр­гән илаһи үҫеш сығанағы ла. Гәзит­тең ниндәйҙер һанын уҡый алмай ҡалын­һа, нимәлер етмә­гән һымаҡ, күңел боша башлай. “Башҡор­тостан” аша үҙебеҙҙең район-ҡа­ла­ларыбыҙҙа ғына түгел, күрше өлкәләрҙә, Мәскәүҙә, донъяла барған хәл-ваҡиғалар, сәйәсәт, мәҙәниәт, сәнғәт һәм башҡа өлкәләрҙәге яңылыҡтар менән таны­шабыҙ, тарих төпкөлдәренә сәйәхәт ҡылабыҙ. “Башҡор­тостан” – туған теле­беҙҙе, йолалары­быҙҙы һаҡларға яр­ҙам итеүсе, бөйөк һәм күренекле шәхес­тәребеҙҙе күтәреүсе, иң алдынғы, иң шәп тормош хеҙмәт тәж­рибәләре менән ур­таҡ­лашыусы, миллә­тебеҙҙең рухи үҫе­шендә ҙур роль уйнаусы, алмаштырғыһыҙ рухи сығанағыбыҙ ул.
“Башҡортостан”ыбыҙҙың ҡәҙерен бе­лә­йек, йәмәғәт! Яҙылайыҡ, уҡыйыҡ, йә­шәтәйек уны. Хәҙерге көрсөк осоронда республика баҫмалары өсөн дә еңел тү­гел. Тираж­дарҙың кәмеүе йөрәкте һыҙ­лата. Бер ниндәй Интернет та, теле­ви- дение ла рәхәтләнеп, яйлап, үҙең теләгән ваҡытта, үҙеңә уңайлы урында ҡыш­тырлатып гәзит-журнал уҡыуҙы алмаштыра алмай. Хаҡы ла, заманына ҡарап, әллә ҡайҙа китмәгән: ярты йыл­лыҡҡа яҙылыу бәләкәйерәк табын ҡороу­ҙан да күпкә осһоҙораҡ бит. Өй тулы ҡиммәтле йыһаз, ғаиләләрҙә бер генә түгел, хатта ике-өс машина булыуы һәйбәт күренеш, әлбиттә. Тик уларҙың хужаларына рухи аҙыҡ та кәрәк бит. Яңы килгән гәзитте тотоп, унда ниҙер яҙыл­ғанын уҡыр өсөн өйгә ашығыу үҙе үк күңелгә күпме ҡыуаныс бирә.
Башҡортостан – халҡыбыҙ өсөн иң яҡын, иң ҡәҙерле, иң ғәзиз төшөнсә. Был изге һүҙ – республикабыҙҙың һәм милләтебеҙҙең төп рухи сығанағы булған гәзитебеҙҙең дә исеме. Ә инде уларҙы һәр саҡ бар итеү һәм дан итеү – һәр беребеҙҙең мөҡәддәс бурысы.